Ёмвошн мира нётты ёх вәӆӆӑт, щи щира ӑкмум ёх «Мўӊ ёхӆўв пӑта ёнтӆўв» нєм тӑйӆӑт. Щи тӑхия щи мир юхтыйӆӆӑт, хуйтат ӆаӆь пӑнта питум мирева нётты каш тӑйӆӑт. Щи ӑктупсы лыпӑт хойты тыӆӑщн 2022-мит оӆн тывӑс, щи хӑтӆ пийн тыв арсыр мир юхтыйӆты питсӑт, арсыр нәптӑӊ ёх, ар тӑхетн рәпитты хуятӑт. Тӑм ёх рәпитты оӆӊитмеӆн ушӑӊ хот ӑн тӑйсӑт, ушӑӊ ёнтӑсты машинайт ӑн тӑйсӑт, тәп каш тӑйсӑт ӆаӆь хӑра питум хуятӑта нётты.

Тӑмхӑтӆ «Мўӊ ёхӆўв пӑта ёнтӆўв» тăхи оӆӑӊӑн Ём­вошевн па Югра тум­пи арсыр мўв сўӊӑтн сащӆ. Ӆыв посылкайт ӆэ­щӑтӆӑт па ӆаӆь хӑрн вәӆ­ты мирева китӆӑт. Тыв юхтыйӆты мирев хо­шум ӆәмӑтӆяты сухӑт ёнт­ӆӑт, маскировочной сухӑт па хоӆпӑт, термобельё, сэвӑӊ вейт, милӑт, балаклавайт, лаӊ­купӑт, мўв хотӑта мосты свечайт па па ар­сыр ӆаӆь хӑрн мосты пур­мӑсӑт вєрӆӑт. 
Мєт ар хуят – щит имет, пенсияя мӑнум ёх, рәпитты хуятӑт, няврємӑт вәнӆтӑты ёх па щи хӑннєхуятӑт, хуйтат йирн ӑн ӆоӆьӆӑт.
Щӑта «Луима сэрипос» газетайн айкеӆӑт ӑкӑтты па хӑншты ими Т. Мерова каркама рәпитӆ. Ӆўв пут­рӑӆн, щив ӊхты кашӑӊ хуят, муй вєрты пӑкӑӆ, щит щи вєрӆ. 

- Мўӊ иса ӆаӆь хӑрн вәӆ­ты ёхӆўва мосты пурмӑ­сӑт вєрӆўв. Вєра мосты пурмӑс – щит лаӊкупӑт, щитӑт ищи ёнтӆўв. Хоӆпӑт иса пўш сэвӆўв, мўв хотӑта мосты свечайт вєрӆўв. Щиты щи вәӆӆўв. Мӑтта хуятэв ваньщӑсӆ, мӑтта хуятэв ёнтӑӆ, тәх ёхӆўв па вухн муй па ӆєтутӑтн нётӆӑт. Муй щира пӑкӆӑт, щи щира щи нётӆӑт. Тәп каш тӑйты мосӆ, – лупӑс Т. Мерова.

Мєт щира вәӆты пищ – маскировочной хоӆпӑт вєрты пищ, щит хуты ӆєваса хән вєрӆа, сащ тӑйты мосӆ, муй тӑхийн ӆаӆясты ёха щи хоӆуп вєрӆа, муйсӑр тәрум пӑта вєрӆа, тӑӆ тәрума муй па ӆўӊ тәрума, товия муй па сўса.
Волонтёр нє Наталья Шилова тәнӆуп тыӆӑщ 2023-мит оӆ эвӑӆт щи вєрӑт вєрман вәӆ: 

- Ӆаӆь хӑрн вәӆты ёхӆўв мўӊева хӑншӆӑт, муйсӑр хоӆуп ӆывеӆа мосӆ: тӑӆ тәрум ки – аршӑк нуви су­хум вўӆўв, вәнт мўвн ки ёх ӆаӆясӆӑт – аршӑк вусты сух хоӆпӑта вєрӆўв. Муй вўрн щи хоӆпӑт вєрты – щит мўӊ кан нумӑсн вєрты питсўв, тәх утӑт па па ёх эвӑӆт вантсўв. Ин ӆаӆь хӑрӑтн вәӆты ёх мўӊева хӑншӆӑт, щит пӑта мўӊ ма вәӆэв, мўӊ вєрты хоӆупӆўв ма щи нётӆӑт. Щит хӑннєхә вәӆупсы ӆавӑӆты хоӆпӑт, – путӑртӑс Н. Шилова.

Тӑта рәпитты ёх ар щирн рәпитты каш тӑйӆӑт па и нумӑсн вәӆӆӑт.
Итәх хуятӆўв ӆаӆь хӑра пухӆаӆ, икиӆаӆ, яйӆаӆ мӑнсӑт. Итәх хуятӆўв хотӑӊ ёхӆаӆ щӑта кўш ӑнтәмӑт, тәп и мўв ёхӆаӆ щӑта ӆа­ӆясман вәӆӆӑт, щит пӑта щи нётӆӑт.

- Саранпауль вош эвӑӆт щи ӆаӆь хӑра ар хуят мӑ­нӑс, итәх ёх щӑта вәшсӑт, Тарӑн уӊӑӆа питсӑт. Мўӊ каш тӑй­ӆўв, нух питты хӑт­ӆэв ва­намӑты па ёхӆўва нётты, – путӑртӑӆ Тамара Сергеевна.

Тӑм нётӑсты тӑхия ар­сыр рәпитты мир юхтыйӆ­ӆӑт. Щи кўтн «Ӆыӆӑӊ союм» хуща няврємӑт пиӆа рәпитты кӑтӊӑн Светлана Астапович па Татьяна Афанасьева. Ӆын юхтыйӆӆӑӊӑн, хән рўть­щӑты хӑтӆ тӑйӆӑӊӑн, тәх щос па рәпитты хӑтӆӑн кәщаеӆн єсӑӆӆайӊӑн. 

2023-мит оӆ Ас нопӑтты тыӆӑщ вўш эвӑӆт тӑта Л. Садыкова р­ә­питӆ: 

- Хән пенсияя мӑнсум, мухӑлая иса нємӑӆт хуят ӑнтә, сый-кий ӑнтә. Газета  эвӑӆт ӆўӊӑтсум, хуты «Мўӊ ёхӆўв пӑта ёнтӆўв» тӑхи вәӆ па тыв щи юхӑтсум. Каш ки хӑннєхә тӑйӆ, нётты пищ иса пўш вәйтӑӆ.

Тӑм ёх спонсорской вух ӛрн рәпитӆӑт па нёт­ты каш тӑйты мир мӑ­ты вух ӛрн вәӆӆӑт. Де­путатӑт, оса щирн вәӆты ёх, ведомствайт па ӑӆ мирев ищи нётӆӑт. «Почта России» па нётӆ, ӆыв пурмӑсӑт мосты тӑхета тәрум пӑта китӆӑт.
«Мўӊ ёхӆўв пӑта ёнт­ӆўв» тӑхи кәща ими Е. Пар­саева ясӑӊӑн, мєт мос­ты вєр – щит ӆаӆьн вәӆ­ты хӑннєхуятӑт хошум па нємасыя мосты сух ат тӑй­ӆӑт.

- Тӑмхӑтӆ мўӊ хущева 200 муӆтас хӑннєхә вәӆ – щит ёнтӑсты 70 ими па сэвӑӊ вейт сэвты 30 ими. Иса пўш мўӊева нётты каш тӑйты мирев аршӑка йиӆ. Мўӊ хущева нётты щира Выкатной па Бобровской кәртӑт эвӑӆт хӑннєхуятӑт юхӑтсӑт. 2022-мит оӆ вәйт ӆор тыӆӑщ вўш эвӑӆт 2025-мит оӆ вәнты ӆаӆь пӑнта мўӊ ёшӆувн вєрум 35 щурӑс пурмӑс китсўв, – лупӑс ӆўв.

2025-мит оӆ лыпӑт ты­ӆӑщн «Мўӊ ёхӆўв пӑ­та ёнтӆўв» тӑхийн рә­пит­ты мирев кӑсты тӑ­хийн нух питсӑт. Ӆыв ан­титепловизионной лаӊ­купӑт вєрты пӑта Югра кәща грант ёша павӑтсӑт. Щимӑщ пурмӑсӑт ӆаӆь хӑрн вәӆты мирева мєт вєра мосӆӑт. Иса ӆаӆь хӑ­ра ин 250 щимӑщ ланкуп китсăт.
Тӑм хӑтӆӑтн волонтё­рӑт кашӑӊ хӑтӆ рәпитӆӑт, тәх щос етн вән­ты. Тәх ёх шимӆ щос мӑра юхтыйӆӆӑт, тәх ёх юӆн рәпитӆӑт. Тәп иса хӑннєхуятӑт и нумӑсн вәӆӆӑт: щи кўш еша нёт­ӆӑн, ищимурт щит вән вєр, щи нётупсы ӆаӆь хӑрн вәӆты мирева хошум рўв тәӆ па щи щира нётӆ.

Путӑр хӑншӑс: Пётр Айев