Ас хӑӆты тыӆӑщ 16-мит хӑтӑӆн Ём­вошн биатлон нємуп кӑсупсы пўншсы. Щит айӆат ёх кўтн, мӑ­та хуятӑт 17-мит па 18-мит оӆ ӆувата йи­сӑт, ӆәӆн Югра мўв Росгвар­дия ОМОН «Стерх» тӑхийн слу­житум хә Виктор Ни­колаев нә­мӑӆмӑты. 

Кӑсупсэт пўншты пу­райн Югра мўв Рос­гвардия тӑхи кәща Е. Си­маков иха ӑктӑщум хӑн­нєхуятӑт еӆ­пийн пу­тӑртӑс:

- Тӑм биатлон кӑсупсы пўншсўв, ӆәӆн «Орден Мужества» кавалер, полиция тӑхи сержант Виктор Николаев шәӊӑт нәмӑӆмӑты, мӑта хә СВО тӑхи хуща ухӆ пунсӑӆэ. Ин тӑта машина вәӆ, мӑта ут пўӊӑӆн 2022-мит оӆн ай кєр тыӆӑщ ӆапӑмит хӑтӑӆн Виктор Николаев ӆаӆь хӑрн ӑнтәма йис. Щӑта мўӊ сыр-сыр ӆаӆь пурмӑсӑӊ ванӆтупсы тӑмхӑтӆ вєр­сўв, ӆәӆн ӑӆ хуятӑт щитӑт ат вантсӑт.

Ӆаӆь хӑрн ӑнтәма вум хә ӑӊкеӆ Вера Николаевна Николаева тыв па юхтӑс. Ӆўв лупӑс, Виктор ӆыв хоттєӆ хуятӆаӆ кўтн мєт ай пуха вәс. Ӆўв шєӊк шимӆ тӑм нуви тәрум иӆ­пийн вәс. Ӆўв тәп 26 оӆа вӑнтӑс. Ай пураитн ӆўв иса вәрт хәйӆ иты ОМОН хуща служитты ӆӑӊхас. Кашӑӊ пўш пухӑӆ путӑртӑс, хуты рәт мўвӆ шєӊк ма ӆавӑӆты питӆ. Ӑшколайн вәӆман, Виктор ищиты арсыр кӑсупсэта ӊхӑс. Ӑшколайн вәнӆтыйӆты пураитн тӑмиты хӑншӑс: «Пәмащипа, солдат хә, хуты нӑӊ мўӊ рәт мўвев ма ӆавӑӆсӑн!». Ӛхӑт па ӆўв университет етшуп­тӑс, армияйн служитӑс па Камчатской область Мильково кәртӑӆн мєт ай няврємӑт биатлон кӑс­ты щирӑта тўӊщирӑӊа вәнӆтӑс. Щи вєрӆаӆ пийн Югра мўва мӑнӑс па Рос­гвардия ОМОН «Стерх» тӑхи хуща служитты пи­тӑс. Ӛхӑт ӆаӆь хӑрн хуӆт пєӆы тәсы. Рәт мўвӑӆн ин тӑмхӑтӆ вәнты Вик­тор Николаев шәӊӑт иса мсыева хуятӑтн нәмӆы па ӑн юрємӑӆы.

Тӑм биатлон кӑсупсы артаӆӑты «ЮграМега Спорт» тӑхи эвӑӆт вәӆты айӆат хә В. Заикин путӑр­тӑс, хуты кӑсты вєрӑт Виктор Николаев шәӊӑт нәмӑӆмӑты пăта тӑм хӑт­ӆӑтн вєрсыйт. Щи кинь­ща пухӑт па эвет Ас хӑӆты тыӆӑщ 17-мит па 18-мит хӑтӆӊӑнӑн 11-14-кєм щос пурайн кӑссӑт.
Араттєӆн Югра мўвн пўншум биатлон нємуп кӑсупсыйн 109 хӑннєхә кўтэӆн кӑссӑт. Щи айӆат хӑннєхуятӑт ӆапӑткєм арсыр район па вош эвӑӆт тыв, Ёмвоша, тӑм хӑтӆӑтн кӑсупсэта иха юхӑтсӑт. Хән тӑм кӑсупсэт Ас хӑӆты тыӆӑщ 18-мит хӑтӑӆн сухнуптӑсыйт, щи пурайн биатлон кӑсты щирӑт лӑп тәхӑрсыйт. 
Мосӆ лупты, тӑм кў­тӑтн биатлон нємуп кӑсупсэта айӆат пухӑт па эвет Кон­динской, Сәрханӆ район­ӊӑн, Нефтеюганск, Нижневартовск, Нягань па Ёмвош эвӑӆт иха юхтыйӆсӑт. Ӆыв хуӆыева тӑм хӑтӆӑтн кӑсупсыя ӆэщӑтыйӆсӑт. 

Иха ӑктӑщум хӑн­нє­хуятӑт еӆпийн Югра мўв биатлон нємуп кӑсупсэт пўншты пӑта ок­ругев физической куль­тура па спорт департамент тӑхи кәща нє С. Конух єтӑс па вўща вєрӑс: 

- Ешӑк хәйт па нєӊӑт, шєӊк м, хуты нын тӑмхӑтӆ биатлон кӑсупсы пўншты юхӑтсӑты. Тӑм кӑсупсы ӆаӆь хӑрн пӑрум, Россия мўвев «мастер спорта» нєм тӑйты хәя Виктора Николаева кантсы. Тӑмхӑтӆ мўӊ пиӆэва ӆўв ӑӊкеӆ па ӆўв пиӆэӆа Росгвардия хуща служитум ёх тӑта па вәӆӆӑт. Мўӊ тӑм кӑсупсыйн кӑсты питӆўв, айӆат ёхӆўв ӆухн хәхӑӆты па пушкан эвӑӆт тәса арсыр посӑта єсӑӆты вўянтӆӑт. Ма нәмӑстємн, мўӊ ӑнтә тәп кӑсты питӆўв, мўӊ ӆаӆь хӑрн пӑрум хәев тӑм кўтн ма нәмӑӆмӑӆўв.

Мєт хӑщум кўтн и­ха кӑсупсыя юхтум ай­ӆат па вәнӆат хәйт па нєӊӑт еӆпийн Ёмвош кӑс­ты тӑхийн рәпитты па олимпийской чемпион хә Е. Редькин путӑртӑс: 

- Ешӑк хӑннєхуятӑт! Мўӊ кашӑӊ оӆ биатлон кӑсты  вєрӑт тӑта пўншӆўв па уша вєрӆўв, мӑта айӆат ёх мўӊева пириты рӑхӆ, ӆәӆн ӆыв еӆӆы Россия хон пєлӑк па Мўвтєӆ ми­рӑт кӑсупсэтн кӑсты па вєритсӑт. Щи пӑта кашӑӊ хәя-нєӊа м кӑсты вєр тӑмхӑтӆ шєӊк ӆӑӊхаӆум.

Путӑр хӑншӑс: 
Владимир Енов