Вотас тыӆӑщ 1-мит хӑтӆ вўш эвӑӆт Югра мўвев СФР тӑхи рәпатнекӑт иса социальной нётупсы вухӑт йиӆпа ӆўӊӑтсӑт па ин щитӑт 5,6 процента арат вәншӑка йисӑт. Мєт сыры Росстат ёх тәса нух ӆўӊӑтсӑт, муйкєм арат тәняӆ инфляция вәс, щӑӆта щи оӆӑӊӑн Россия мўв кәщайт поступсы вєрсӑт.

Ин щи вәншӑк нётупсы вух 97 щурӑс муӆтас Югра мўв хӑннєхә ёша хоӆумтӑӆ. Щит мәшӑӊ хӑннєхуятӑт, Вуӆаӊ Оте­чественной ӆаӆьн па па ӆаӆятн ӆаӆясум ёх, ра­диация щирн хоюм ёх па па федеральной нётупсэт ёша вўюм увӑс хуятӑт. 
Щи тумпи Югра мўв фонд ёх йиӆпа социальной нётупсэт нух ӆўӊӑтсӑт, ин щит 1825, 25 шойт вуха йис. Тӑм нётупсы кӑтсыр щирн ёша хоӆумты рӑхӆ: льгота иты муй па вухн.
Ищиты щи вотас тыӆӑщ вўш эвӑӆт няврємӑт тӑйты хоттєӆ ёха сухуптӑты вухӑт 5,6% арат вәна йисӑт. Ин 1,5 оӆ вәнты няврєм єнмӑӆты рәпитты муй ӑн рәпитты ӑӊкия-ащия тыӆӑщ мӑр 16004,46 шойт вух сухуптӑты питӆы. Няврєм сєма питум муй па шәкащты няврєм єнмӑӆты вўты пурайн 42675,68 шойт вух сухуптӑты питӆы.
Мәшӑӊ няврєм тӑйты ӑӊкет-ащет тыӆӑщ мӑр 17344,80 шойт вух ёша хоӆумты питӆӑт. 
Щи тумпи рәпатнекӑт социальной страхования па мәшитты пурайн больничной вухӑт 5,6 процента арат вәншӑка йиӆӑт.
Щи вухӑт ёша хоӆум­ты пӑта вохты нєпекӑт хӑншты ӑн мосӆ.

Рәпитты хӑтӆӑтн муӆты вєрӑт оӆӑӊӑн иньщӑсты щи 8-800-100-00-01 карты кеӆ хўват рӑхӆ.

Хӑнты ясӑӊа тулмащтӑс: Людмила Гурьева