И пўш ӆапӑт Мєӊк вәнт хăрн ха ăктӑщсӑт. Нәмӑсты питсӑт, муй щирн Ими хиӆы нух питты. Ӆыв мурта щи йисӑт, иса щи Ими Хиӆы нух питӆ. 
Лупӆӑт:
– Ин тăӆта питӆўв кўлащты, мӑта хәев нух питӆ, щи хәев Ими хиӆы пиӆа кўлащты питӆ.
Хăтӆ кўлащӆӑт, кимӑт хӑтӆ кўлащӆӑт – нємӑӆт хәеӆ  нух ăн питӆ. 
Щирн кашӑӊ Мєӊк вән наӊк ӆєрӆаӆ муйн нух мăншӑс. Питсӑт ин наӊкӑтн кўлащты. И хәеӆ  ух эвӑӆт хăтщӑӆы, ӆўв шанш вәнта мўва ӆуӊӑӆ. Па хәеӆ ух эвӑӆт хăтщӑӆы, сәйм вәнта мўва ӆуӊӑӆ. Щиты щи ӆыв мєт кәсӑӊ Мєӊк пирисӑт, мєт вән хәя ӆапӑт Мєӊк эвӑӆт пирисӑт.
Щăӆта ӆўвеӆа вәна єнумты йиӊк мăсӑт. Ӆўв вәна-вәна єнмӑс. Кăрӑщ х эвӑӆт па кăрӑщ, кăрӑщ рєп эвӑӆт па кăрӑщ. 
Мєт кәсӑӊ Мєӊк ӆапӑт Мєӊкӑт кўтн щи мăнӑс Ими хиӆы хот кимӆа.
Ўвӆ:
– Ими хиӆы, ким єта, кўлащты питӆумн. Ӆапӑт Мєӊкӑт кўтн ма мєт кәсӑӊ Мєӊк.

Ими хиӆы ким щи хотӆ эвӑӆт єтӑс.
Мєӊкен лупӑӆ:
– ӊтая лот щўрта, мăта хәев ким щўртӑӊ лот эвӑӆт пәхӑӆӆумн, щитємн мєт кәсӆы щи.
Ин Ими хиӆы ӊтая лот щўрӑтты щи питӑс, щи кўтн мўвн вўс хирӑс. Мєӊк кўтӆупа мăнӑс, па Ими хиӆы вєрум вўса кўрӆ иӆ лакнємӑс. Ӆапӑт Мєӊкӑт кўтн мєт кәсӑӊ Мєӊк иӆ рăкнӑс, уӆ, щи щутӑӆ. Ими хиӆы сора ӊтая щўртум лотӑӆ вәшӑн нух кўшмӑӆсӑӆӆэ. Ин мєт кәсӑӊ Мєӊк ӆапӑт Мєӊкӑт эвӑӆт шәхмӑс, хуӆыева Мєӊкӑт щив щи юхтумсӑт. Ими хиӆыен кўшмӑӆтум пăта ин щўртум лота ӆуӊты ӛр ăн тăйӆӑт. 
Ин Мєӊкӑт щи ўвӆӑт:
– Ими хиӆы, нăӊ нух щи питсӑн, мўӊ мєт кәсӑӊ Мєнкэв ӆапӑт Мєӊк эвӑӆт єсӆэ.
Ими хиӆы єсӑӆсӑӆӆэ ӆўвты па лупӑӆ:
– Ӆапӑт Мєӊкӑт кўтн вәӆты мєт таксар Мєӊк мăна, тәп ма ӊхты ӛшєм мăнєма аӆ єта. Хән акань вєншуп мир тывтыйн, нын сєм сая вәӆты питӆӑты. Хәӆум х сайн хăннєхәйт йиртаӆн, нӆ х сайн хăннєхәйт йиртаӆн.

Матвей Обатин хӑншум моньщ
хӑнты ясӑӊа тулмащтӑс: Валентина Гатченко