Лыпӑт хойты тыӆӑщ 18-мит хӑтӆӑн Сәрханӆ район Русскинской кәртӑн округ шуши мир няврємӑт вәнӆтӑты вєр тәты ёх пӑта семинар-практикум ӆэщӑтсы. Щи вәнӆтӑ­ты вєр ӑшкола-интернат хуща вәс. Тыв Сўмӑтвош, Манстӑр, Нуви сӑӊхум, Кондинской, Нижневартовской районӑт, Ёмвош, Сәрханӆ вош, Лямина, Угут, Русскинской ӑшколайн няврємӑт вәнӆтӑты ёх юхӑтсӑт.

Щи вәнӆтӑты вєр пу­райн Тром-Аган, Пим па Юган юханӑт хо­нӑӊӑн вәӆты няврємӑт пӑта мӑӊхӑтӆ вєрсы. Щи вєр пўншум пурайн ок­руг шуши мир вәӆупсы ӆавӑӆты нє Л.А. Алфёро­ва, Русскинской кәрт кә­ща хә А.Н. Соболев па хӑнты арӑт ариты ими З.А. Кирилишина вўща вєрсӑт.
«Хӑтӆ» нємпи хӑнты-вухаӆь мирӊӑн театр ари­ты-якты ёх етнхот аӆьман щи мӑӊхӑтӆ пўншсӑт.
Щи мӑӊхӑтӆ пурайн Русскинской, Лямина па Угут кәртӑӊ ӑшколайтн вәнӆтыйӆты няврємӑт хә­ӆум кăсупсыйн кăссăт, щит:

- «Нӑӊ мӑта юхан эвӑӆт?» команда ёх аӆьты вєр;
- «Ма щемьям» ай кина;
- «Ма юханєм. Кәм, ву­лия!» хурӑӊ ванӆ­тупсы.

Щи тумпи няврємӑт шу­ши мир кӑсупсэтн кӑссӑт. 
Артаӆӑты ёх, щит округ шуши мир вәӆупсы ӆавӑӆ­ты нє Л.А. Алфёрова, СурГУ «Физическая культура» кафедра кәща нє Н.В. Пеш­кова, СурГУ шуши мир вєрӑта вәнӆтӑты инс­ти­тут кәща нє О.Ю. Мул­лер, округ вәнӆтӑты вєр па наука департамент хуща вәӆты шуши мир вәнӆтӑты вєр тӑхи тәты нє О.С. Рыжкова па Сәрханӆ район вәнӆтӑты вєр тәты тӑхи кәща ӆӑӊкӑр нє Е.И. Суровцева. Шуши мир кӑсупсэт судья хә Е.А. Викулов па СурГУ «Физическая» культура кафедрайн рәпитты ёх нух вантсӑт. 

Эвет-пухӑт, вәнӆтӑты ёх тәса тӑм мӑӊхӑтӆа ӆэ­щӑтыйӆсӑт, щирн ма тәса, хурамӑӊа, әмща щит ванӆтӑсӑт. Тӑм мӑӊхӑтӆ няврємӑт пӑта ищи урок иты, вантэ, ӆыв па эвета-пухӑта вәнӆтӑсӑт, муй щирн әмща етнхот ӆэщӑтты мосӆ. Няв­рємӑт тӑта кў­тэӆн ӆәхсӑӊа йисӑт.

Мєт ма мӑӊхӑтӆа ӆэ­щăтыӆум командайт нух питман ишӑкты нєпекӑт па тынӑӊ мойӆупсэт ёша хоӆумсӑт.

«Нӑӊ мӑта юхан эвӑӆт?» кӑсупсыйн нух питум хуя­тăта округ шуши мир вә­ӆупсы ӆавӑӆты нє Л.А. Алфёрова ишӑкты нє­пекӑт па мойӆупсэт мӑс. 1-мит тӑхия Русскинс­кой ӑшкола, 2-мит тӑхия – Угут кәртӑӊ ӑшкола, 3-мит тӑхия – Ляминской ӑшкола няврємӑт питсӑт.

Округ шуши мир вәнӆ­тӑты вєр тәты тӑхи кәща нє О.С. Рыжкова «Ма ще­мьям» ай кина пӑта 1-мит тӑхи – Угут кәр­тӑӊ ӑшкола, 2-мит тӑхи – Лямина кәртӑӊ ӑшкола па 3-мит тӑхи Русскинс­кой кәртӑӊ ӑшкола няврємӑ­та ишӑк нєпекӑт па мойӆуп­сэт мойӆӑс. 

СурГУ шуши мир вєрӑта вәнӆтӑты тӑхи кәща нє О.Ю. Муллер «Ма юханєм. Кәм, вулыя!» хурӑӊ ванӆ­тупсы пӑта 1-мит тӑхи Лямина кәртӑӊ ӑшкола, 2-мит тӑхи – Русскинской кәртӑӊ ӑшкола па 3-мит тӑхи Угут кәртӑӊ ӑшкола няврємӑта ишӑкты нєпек па мойӆупсэт ёша мӑс.

Шуши мир кӑсупсэтн нух питсӑт: 1-мит тӑхи – Виктор Покачев (Рус­скинской кәртӑӊ ӑш­кола), 2-мит тӑхи – Илья Восто­ков (Лямина кәр­тӑӊ ӑшко­ла), 3-мит тӑхи – Савелий Комтин (Русскинской кәр­тӑӊ ӑш­кола) вўсӑт.

«Увӑс арсыр кӑсупсэт» нємн 1-мит тӑхия Рус­скинской ӑшкола, 2-мит тӑхия – Лямина кәртӑӊ ӑшкола па 3-мит тӑхия Угут кәртӑӊ ӑшкола няв­рємӑт питсӑт.

Няврємӑӊ мӑӊхӑтӆ – щит муй? Щит няврємӑт пӑта мӑӊхӑтӆ, щит ӆыв па эвет-пухӑт пӑта ӆэщӑтӆӑт па аӆьӆӑт, муй щирн тәса ариты, якты, стихӑт ӆўӊӑтты па етнхотӑт ванӆтӑты рӑхӆ. 

Щимӑщ мӑӊхӑтӆӑн ӆэщӑтман вәӆӆӑт: ариты-якты етнхотӑт, моньщ хўват спектаклят, хур хӑншты па якӑт якты вәнӆтӑты хӑрӑт, арсыр нумсӑӊ юнтупсэтн юнт­ты вєр, Увӑс мир кӑсупсэт, арсыр вәнӆтӑты щирӑт па па вєрӑт. Мосӆ няврємӑ­та нётты уша вєрты, муйсӑр вєрӑта ӆыв сӑмӑӊа вәӆ­ӆӑт па щи вєрӑта вәнӆтӑты. 

Русскинской кәртӑӊ ӑш­кола кәща нє Ольга Юрьевна Ермакова вәнӆ­тӑты хӑра па мӑӊхӑтӆа юхтум мойӊ хуятӑта вән пәмащипа лупӑс.  

Фаина Иштимирова
Хӑнты ясӑӊа тулмащтӑс: Людмила Лонгортова