Лыпӑт хойты тыӆӑщн 9-мит хӑтӆ вўш эвӑӆт 11-мит хӑтӆ вәнта Нью-Дели хуща «ИННОПРОМ. Индия» мўв ӆуват вәйтантупсы вәс. «Россия» национальной центр хуща «Универмаг» вєр ванӆтӑсы, муй тӑхийн российской мўвев хуща ӆапка пурмӑсӑт вєрты ёх па арсыр мўв сўӊӑт эвӑӆт юхтум шўкщӑты хуятăт вәсӑт.

Югра эвӑӆт щӑта Еле­на Федотова па Мария Игишева вәсӊӑн. Ӆын мастер-класс вє­рӑнт­сӑӊӑн, ванӆтӑсӊӑн, муй вўрн пўнӑӊ сух пиӆа па нюки пиӆа рәпитты.
«Торум Маа» музей кә­ща ими Елена Федотова «Россия» национальной центр проектӑт хуща ки­мӑт пўш ӊхӑс. Мєт оӆӑӊ ӆўв Узбекистан мўвн вәс.
Ӆўв ясӊӑӆн, щи центр па хон пєлӑк мўвӑтн иса пўш ванӆтӑӆ, муй вўрн йис пурмӑсӑт тӑм хӑтӆ вәнты ӆыӆӑӊ хӑннєхәй­тӑн вєрӆайт.
«Универмаг» ванӆтуп­сы хуща тӑм хӑтӆ вўша юхтум йис пурмӑсӑт мўӊ Россия мўвев арсыр тӑхет эвӑӆт вәсӑт, щит дым­ковской па арсыр юнту­тӑт, оренбургской пўн эвӑӆт тыюм ухшамӑт, жос­товс­кой подносӑт, гже­льс­кой па башкирской фар­форӑт, оӆюпн хӑншум хохломской пурмӑсӑт па арсыр утӑт. Юг­ра эвӑӆт юхтум кӑтӊӑн увӑс мирев йис шўкщӑты вєрӑт ванӆтӑсӊӑн. Елена Федотова па Мария Иги­шева ванӆтӑсӊӑн, муй вўрн вўӆы па кўрӑӊ вой ню­ки пиӆа увӑс мирев рә­питсӑт, ванӆтӑсӊӑн, муй­сӑр пурмӑсӑт щи утӑт эвӑӆт вєрӑнтӆайт. Юхтыӆум мир вантсӑт, муй вўрн ёх рә­питӆӑт, иньщӑсты пищ па тӑйсӑт. Мўӊ кӑтӊӑӆўв эвӑӆт ӆыв увӑс мирев йис вєрӑт оӆӑӊӑн, хӑншет оӆӑӊӑн па сыр-сыр вєрӑт оӆӑӊӑн иньщӑссӑт. Мўӊ шўкщӑты кӑтӊӑӆўв тулмащтӑты ёх ӑн тӑйсӑт, щит пӑта путӑртты ӆавӑрт вәс. Щит пӑта Елена Федотова карты щўӊк ху­ща хурӑт ванӆтӑс. Щитӑт мухты Югра мўвев оӆӑ­ӊӑн путӑр тывӑс. Шўкщӑты имєӊӑн пиӆа индийской институт ёх путӑртсӑт, ӆыв ищи пўнӑӊ сух па нюки пиӆа рәпитӆӑт, щит ай мис сухӑт па ош сухӑт.

Сӑк эвӑӆт вєрум пур­мӑсӑт мирн ищи әмщӑ­ӆӑсыйт. Индия мўв тәх хӑншет мўӊ хӑншиӆўв хураспет. Щит хуты и тӑхи эвӑӆт мӑнум утӑт. Индия мирев ванӆтăсӑт ӆыв йис щира вєрты пурмӑсӆаӆ.
Елена Федотова ясӑ­ӊӑн, Индия мўв ёх ма вәӆэӆ рўщ мирев йис пур­мӑсӑт, щит хохлома, гжель, матрёшка аканят па дымковской юнтутӑт. Щи кўтн увӑс мирев йис вәӆупсы оӆӑӊӑн шимӆ вєр вәӆ. 

- Россия – щит хуты иса тӑхета сащмӑӆтум рўщ йис вєрӑт хән, щит арсыр мирев йис пурмӑсӑт, йис вєрӑт. Тӑта мўӊ увӑс мирев йис вєрӑт ванӆтӑсўв, мӑта утӑт мўӊ тӑм хӑтӆ вәнта ӆавӑӆман тӑйӆӑӆўв, – пу­тӑртӑс шўкщӑты ими. 

ӊхум тӑхетн тӑм кӑт­ӊӑн и щирн – увӑс мирев йис пищӑт ванӆтӑсӊӑн, кимӑт щирн – йиӆуп ӆәх­сӑт вәйтсӑӊӑн па еӆӆы иха юхтыйӆты оӆӑӊӑн путӑртсӑӊӑн.
Щи киньща па уша йис, тӑмӑщ ар мир ӑкмум тӑхетн мўӊ йис вәӆупсэв, йис пурмӑсӆўв па хон пє­лӑк мўвӑтн ма ванӆтӑты пӑта муй еӆӆы вєрты мосӆ.
Елена Федотова ясӑ­ӊӑн, щимӑщ тӑхия ӊх­тыйн пӑнӑн тӑйты мосӆ сувенирной пурмӑсӑт, ви­зиткайт па карты щўнкӑт мухты ванӆтӑты ӆыӆӑӊ хурӑт. Щи ӆыӆӑӊ хурӑт мухты Югра оӆӑӊӑн пу­тӑртты, шўкщӑты ёх па увӑс мирев йис вәӆупсы ванӆтӑты пищ вәӆ. 
ӊхум кӑтӊӑн Индия эвӑӆт сувенирӑт тәсӊӑн, щи кўтн магнита вєрум Индия мўв йис пурмӑсӑт. Елена Федотова ясӑӊӑн, еӆӆы вәӆтыйн ӆўв щӑта хоӆмум нумӑсӆаӆ вєр вәнта тәты питӆӑӆэ: визитка вєрӆ, пў­нӑӊ сух эвӑӆт сувенирӑт ёнтӑӆ па па вєрӑт.
«Россия» национальной центр «Универмаг» нємуп вєр па хон пєлӑк мўвӑтн сыры па вәс.  Вән кєр ты­ӆӑщн 2026-мит оӆн Таш­кент хуща «ИННОПРОМ. Цент­ральная Азия» ванӆ­тупсыйн вәсӑт, Ас нопӑт­ты тыӆӑщн – Харбин вошн Российско-Китайской ЭКСПО хуща. Лыпӑт хой­ты тыӆӑщн па Нью-Дели хуща ӊхсӑт.
«ИННОПРОМ. Индия» вєр мухты ӊхум кӑтӊӑн пищ тӑйсӑӊӑн хӑнты ми­рев оӆӑӊӑн па хон пєлӑк мўв мира путӑртты. Пўнӑӊ сух, нюки, хӑншет мухты ӆын увӑс мирев ӆыӆӑӊ вєрӑт ванӆтӑсӊӑн.

Путӑр хӑншӑс: Пётр Молданов