(еӆӆы путӑр)

Ай эвеӆ лупӆ: 
– Ими хиӆыйн ащєм щи веӆса. Ими хиӆы ма эвӑӆтєма хуӆта лэ мӑнӆ. Ма щӑха умлєп ова йиӆум, Ими хиӆы йиӊкӑӊ пєлӑк, вәнтӑӊ пєлӑк кєрӑттаӆн ай кукӑр сәные умлєп ова омсӑӆӆєм.
Кўтуп эвеӆ лупӆ:
– Ма щӑха Ими хиӆы йиӊкӑӊ пєлӑк кєрӑттаӆн, нӛрум кўтупн мәрха йи­ӆум. Ими хиӆы шәштаӆ са, щӑ­ха шуваӆӑӆӆэ, муй мәрӑх сємия, ма юхи ӆавємӑӆєм. Юхи ӆавємӑтаӆ тӑхийн щӑта ӆәӆн щӑта яньщӆум.
Вән эвеӆ лупӆ:
– Ма щӑха Ими хиӆы йиӊкӑӊ пєлӑк, вәнтӑӊ пє­лӑк кєрӑттаӆн, ма щӑха хӑр ёхума мӑнӆум, м юрн әхӆа йиӆум. Ёхумн Ими хиӆы шәштаӆ са әхӑӆ шуваӆӑӆ, муй м әхӆые. Әхӑӆ сиӊ лак ӆыпия ӆєӆтаӆ тӑхийн, щӑта ӆєӆєм, щӑта яньщӆєм.

Ин мєӊк ики эвиӆаӆн ӆэщитса, шависа.
Ими хиӆы щитӑӆн вәнта мӑнӑс. Вәнтӑн шәштаӆ са, йиӊк яньщты ӆӑӊхматӑс. Щиты хўӆт шәшиӆытаӆ кўтн умлєп овие вәйтӑс:
– Муй хӑншӑӊ ай кўк­рые омӑсӆ.
Йиӊк умлєп эвӑӆт ӑмӑрмӑс, юхи щи яньщлэ, тӑм яньщӆэ, имуӆтыйн нумӑсн щи юхӑтса:
– Ин муӆхатӆ хӑщ па щи Мєӊк ики ай эвєм щи апӑрӆӑӆ.

Ин умлєп ов лӑп пә­рӑнтсӑӆӆэ. Ин ай кўкӑр шўк­ӆы пәрӑнтсӑӆӆэ. Па щи мӑнӑс. Па мӑнӑс, мӑ­нӑс. Имуӆтыйн мәрӑх сємие вәйтӑс:
– Муй мәрӑх сємие. Юхи ки ӆавємӑӆєм.
Уӊӆа тәтаӆ са, нумӑсн щи юхӑтса:
– Ин муӆхатӆ мєӊк кў­туп эвєм ӆўв щи апӑрӆӑӆ.
Шўкӆы пәрӑнтсӑӆӆэ.
– Хәнты хӑнты хәйе йисӑӊ тәрумн тывты йирн тӑмӑщ атум аӆ вәӆ.
Па щи мӑнӑс, мӑнӑс. Ёхума юхтӑс. Карты әхӑӆ омӑсӆ. Ин карты әхӑӆ хущи мӑнӑс:
– Муй әхӆые, юхи ки тәӆєм, м щи.
Имуӆтыйн нумӑсн щи юхӑтса:
– Ин муӆхатӆ Мєӊк ики вән эвєм ӆўв пищӆаӆ щи. 
Ай ӆаюм шәп аӆємӑс, әхӑӆ кўрӑт эвӑӆт щи сэвӑрӆ. Ин әхӆӑӆ имуӆтыйн щи ўвтӑс:
– Ананна, кўрӆам щи сэвӑрӆайт!

Щӑӆта шўкӆы сэвӑр-сӑӆӆэ, тәрма хоюм, мўва хоюм вән тўтн тӑхсӑӆэ. Иӆ мӑнум суӆтум иӆ ӑнт єсӑӆсӑӆӆэ, нух мӑнум суӆтум нух ӑнт єсӑӆсӑӆӆэ. Нухӆы йи суӆтум єсӆӑс:
– Хӑнты хә и йисӑӊ тәрум тывты йирн тӑмӑщ укщум тӑмӑщ вәрт аӆ тывӑӆ. 
Ин Ими хиӆы Вошӑӊ вәрт ики хуща щи мӑнӑс. Вошӑӊ вәрт ики воша юхтӑс. Вошӑӊ вәрт ики тўтӆы хот кӑмщӑр хотн тӑйты ай эвеӆ ӆўвеӆа ом­сӑӆсӑӆӆэ. Щӑӆта атӆ по­ры яньщӆӑт, хӑтӆ поры яньщӆӑт. Хўв щуньсӑт, ван щуньсӑт, хуйн вәӆы. Щӑӆ­та Ими хиӆы лупӆ:
– Вошӑӊ вәрт ики упєм, эвен ӆэщӑтӆэн ки, ӆэщӑ­тэ, йиӊкєм нумӑсн, мўвєм нумӑсн питсаюм. Ма щи мӑнӆум. Эвен ӆэщӑтӆэн ки, ӆэщӑтэ!

Вошӑӊ вәрт ики лупӑӆ:
– Эвєм йи пўш щи луп­сєм па аӆ ӆэщӑтӆєм.
Щи сонтумӑсӊӑн мӑн­ты. Вошӑӊ вәрт ики упӑӆ ӑктыйӆӆум питы вой, вўрты вой эвеӆ пиӆа ӆэщӑтсӑӆӆэ. Хураӊ анас кӑрӑтсӑӊӑн, щи мӑнты питсӑӊӑн. Хўв тӑхеӆ хўв мӑнсӑӊӑн, ван тӑхеӆ ван мӑнсӑӊӑн, хуйн вәӆы. Имуӆтыйн тўӊ­ӊӑн ӆопасӊӑн ай хота юхӑт­сӑӊӑн. Ими хиӆы анасӆ хори ӆаки матӑр, вои ӆа­ки матӑр щи вў­ӆытсӑӆӆэ. Щухал ова нух хәӊхӑс. Щащеӆ ими тўт сєм ӊки сўвӑӆ, ӆоньщи сўвӑӆ оӆӑ­ӊӑн лӑп хәрӑтсӑӆэ.
Щащеӆ ими лупӆ:
– Йивӆап-ӑсӆап хи­ӆымн хӑйӆум тўт сємєм муя иӆта мӑнум шаӊўшпин лӑп хәрӑтса, муя нәмӑӆта мӑнум шаӊўшпин хәрӑтса.
– Щащєм ими, тўт сє­мен нӑӊ хиӆэнӑн хәрӑтса.
Нух ӆоӆюмтӑс, хиӆэӆ хущи хәхӑӆмӑс, хиӆэӆн шәӊхсӑсы, єтӑрӊӑн пӑӆӑӊ­ӊӑн вўша аӆмийӆса. Иӆӆы кєримаӆн ухшам роспеӆ иӆта таӆӆийӆты ай эвия вмаӆ.
Ими хиӆы ӆўв хоӆум­тыӆум питы войӆ, вўрты войӆ пӑнӑн ӆєӆсӑӆӆэ.

Щӑӆта тәканӆум хорӑӊ анас кӑрӑтӑс. ӊкӑӊ шәмӆӑп ар вошӆ хӑймаӆ пийн имуӆтыйн тыйӊ Ас тый­ӆа юхтӑс. Щєп эвӑӆт мӑ­шӑк похӑл ӆуват нуви пўталы эӆӑтӑс, ух пӑт эӆты вўщкӑсӆэ:
– Хәнты хӑнты хәйе тә­рум тывты йирӑӊ йир ка­тӑӆман йирӑӊ ӆәӊха, по­ры катӑӆман порӑӊ ӆәӊ­ха ки муӆӆаюм, ух пӑты эӆты вущкум нуви пўталєм тывум кев хота ат йиӆ.

Хәӆум пєлӑк хот сў­ӊӑӆ питы вой, вўрты вой тӑхӑрсӑӆӆэ. И еӆ щўнь­мӑт­сӑт и еӆ хоӆмӑтсӑт. Щи щў­няӆ хоӆӑн ин па вәӆӆӑт.

В. Штайниц киника эӆты вўюм моньщ 
мосты щира ӆэщӑтӑс: Наталья Краснопеева