Хӑнты нє Любовь Дмитриевна Собяни­на ар оӆ мӑр Тюмень вошн вәӆ па рәпитӆ. Ӆўв унтасӑӆн вән вошн вәӆты хӑннє­хуятӑт па мойӊ ёх хӑнты мир йис вєрӑт оӆӑӊӑн уша вєрӆӑт. Ӆўв финно-угорской мирӑт культура тӑхи кәща нєӊа вәӆ. 

Любовь Дмитриевна Нуви сӑӊхум район Тўкъякӑӊ хӑнты кәртӑн (сыры Сўмӑтвош район вәс) сєма питӑс. Ӆўв яӊ оӆа вмаӆн ӑӊкеӆ такӆы хӑщӑс, щи еӆпийн ащеӆ ищи ӑнтәма йис, щирн ӆўв Людмила Дмитриевна Боковая упеӆн Ваньща­вӑт кәртӑн єнмӑӆсы. Упеӆ леккӑра вәс, Люба эвие ӆўвеӆа нётӑс, иха кәрт хўват мәшӑӊ ёх лекщит­ты ӊхийӆсӑӊӑн. 

- Ма ай пура вўш эвӑӆт арӑт ариӆум. Ваньщавӑт кәртӑн мўӊ мӑӊхӑтӆӑт вєрсўв, арисўв па сти­хотворенияйт ӆўӊӑтсўв. Ин вәнты хӑнты арӑт ари­ӆум па хӑнты якӑт як­ӆум, – лупӑс Любовь Дмит­риевна.
Ӆўв ясӑӊӆаӆ щирн, ащеӆ Дмитрий Петрович Гришкин ищи арӑт арийс па нарӑс хн нарӑсӑс. Ӆўв Вуӆаӊ Отечественной ӆаӆьн мўвев ӆавӑӆман вәс. Любовь Дмитриевна вән семьяйн мєт ай эвия, кӑтхущъяӊмит няврєма вәс. Ӑӊкеӆ Евдокия Конс­тантиновна ар няврєм єн­мӑӆмаӆ пӑта хәӆум пўш мевӆ посн катӆуптӑсы. 

Ваньщавӑт кәртӑн ӑш­кола етшуптумаӆ пийн айӆат эви Светлый вошн интернатн вәс, ӆўв яӊ класс вәнты щӑта вәнӆтыӆӑс. Щӑӆта Тюмень вошн «ГПТУ №16» училищайн вәнӆтыӆӑс, щи пийн кам­вольно-суконной комби­нат хущи рәпитӑс.  

1996-мит оӆн Любовь Дмитриевна Герцен нємпи педагогической институтн заочной щирн вәнӆтыйӆ­ты питӑс. Щи вєр пӑта ӆўв вән пәмащипа лупӆ Диана Васильевна Герасимовая, ӆўв ух нєӊӑӆа вәс. 1997-мит оӆн Л.Д. Собянина Тю­мень вошн культура хо­та рәпитты вохсы. Щиты щи пура вўш эвӑӆт па ин вәнты ӆўв вошӑӊ мир пӑта мӑӊхӑтӆӑт ӆэщӑтӆ, арсыр мир творчества хотн ар оӆ мӑр рәпитӆ. 

Мосӆ лупты, Любовь Собянина Тюмень вошн финно-угорской мир йис вєрӑт ӆавӑӆты пӑта оса тӑхи вєрӑс. Щи тӑхия хӑн­тэт, вухаӆят, марийцӑт, уд­муртӑт, сӑранӑт, юрн ёх, селькупӑт ӆуӊман вәӆӆӑт. Ӆыв Тюмень вош пўӊӑӆн вәӆты районӑт хўват ӊх­ӆӑт па финно-угорской мир йис вєрӑт ванӆтӑӆӑт.

 Мӑнєма әмӑщ арсыр мир пиӆа рәпитты. ма нәмӆєм, айӆат пурамн ма Ева Шмидт па Зоя Рябчикова пиӆа вәтаӊа йисум, иха хӑнты арӑт арисўв, хӑнты ясӑӊ вәнӆ­тӑсўв. Интӑм ма вәнӆтӑты хӑрӑт ӆэщӑтӆум. Щӑта мўӊ имиӆўв пиӆа вошӑӊ мир вәнӆтӑӆўв арсыр мир йис вєрӑта. Вурӊа хӑтӆ па па арсыр мӑӊхӑтӆӑт вошӑӊ мира шєӊк мәстӑӆӑт.  

Любовь Дмитриевна икеӆ пиӆа кӑт эви єнмӑӆ­сӑӊӑн. Хәт оӆ мӑнӑс, хуты икеӆ ӑнтәма йис. Интӑм Любовь Дмитриевна иса пурайн рәпатайн вәӆ, арсыр вошӑт па кәртӑт хўват ӊхӑӆ. Эвеӊӑӆ па хиӆыӆаӆ ӆўв хущеӆа юх­тыйӆӆӑт, ӆыв ищи хӑнты мир йис вєрӑт пєӆы сӑмӑ­ӊа вәӆӆӑт.

Мўӊ Любовь Дмит­риевная па ӆўв хотӑӊ ёх­ӆаӆа ӆӑӊхаӆўв м ясӊӑт лупты, тӑӆаӊа, ма, уяӊа-пищӑӊа ат вәӆӆӑт, найн-вәртӑн ат ӆавӑӆӆыйт!

Путӑр хӑншӑс: Надежда Рагимова