– Ма хәт тӑӆ вәнты щащєм па щатьщащєм хущи нӛрум мўвн шуши кәртӑн єнумсум. Рўщ ясӑӊӑн путӑртты иса ӑн хошсум, тәп рәт нганасанской ясӊєм ма тӑйсєм, – щиты лупӆ Лидия Кундылеевна Аксёнова. Тӑмхӑтӆ ӆўв Дудинка вошн Таймырской краеведческой музей хущи вуӆаӊ научной сотрудника вәӆ. 

Хутыса шуши хӑн­нєхәя тӑм йиӆуп йисн вәӆты, ӆәӆн рәт яс­ӊӑӆ па йис вєрӆаӆ аӆ вәт­шӑты па ищимурт па мир щирӑт уша вєрты па щитӑта вәнӆтыйӆты. Щи оӆӑӊӑн мин ӆўв пиӆэӆа пу­тӑртсумн Санкт-Пе­тербург вошн Увӑс мир институт мӑӊхӑтӆ постӑты пурайн. 

Нулевой класса Тай­мыр мўв ай кәртӑтн вәӆты няврємӑт Дудинка воша вертолёт тухӆӑӊ хопн тәть­ӆясыйт. Ай эвие пӑта щит шєӊк ӆавӑрт вєра вәс. 

 Ма тухӆӑӊ хопн хуӆт пєӆы вән хота щи тә­сыюм. Хӑннєхуятӑт па ясӑ­ӊӑн путӑртӆӑт, вәӆы вән хуятӑт мўӊ эвӑӆтэва иса щи муӆты вохӆӑт, хуӆт пєӆы мӑнты, муӆты вєр­ты партӆыюв. Ӆәӆн тәп рўщ ясӑӊӑн кўтэвн ат пу­тӑртсўв, – нәмӑӆмӑс Ли­дия Кундылеевна. – Мўӊ па ӑспухӆам-вәртыӆам па ортнєӆам-асэвиӆам пиӆа уӆты нури иӆпия ӆуӊӆўв па щӑта рәт ясӑӊӑн щи путӑртӆўв. Имуӆтыйн вос­питатель нєӊев юхӑтӆ, пӑӆӆўв саты нух щи таӆ­ӆыюв. «Муй нын щӑта рәт ясӑӊӑн вўшиӆӑты?». Ма нумӑс вєрсум, рўщ ясӑӊ тәса вәнӆтӑты, ӆәӆн ма пӑӆ­ӆам хўват нємхуятн па аӆ таӆӆясыюм.
Щи миюм ясӊӑӆ хў­ват ӆўв рўщ ясӑӊ ма вәнӆ­тӑсӆэ. Ӑщкола ет­шуп­тум пийн Лидия Ленинград воша А.И. Гер­цен нємпи института фи­лологической факуль­те­та питӑс. 
Ӆўв еша вәс рўщ ясӑӊ па литература па рәт ясӑӊ па литература учителя йис, Таймыр мўв ай кәрта рәпитты китсы. Щӑта ӆўв ики вєрӑс па ӑшколайн рәпитты оӆӊитӑс. Икеӆ долган хә вәс. Няврємӑӆ сєма питӑс па айӆат хот­тєӆ ёх Дудинка воша вәӆты касӑӆсӑт. Щӑта ӆўв телевидения тӑхия рәпитты вохсы. 
Тәп еша вәс, ӑӊкеӆ кӑ­шаӊа йис па рәт кәртӑӆа кєрӆӑс па па щи ӑшколая рәпитты мӑнӑс. 2017-мит оӆн эт­нографической музей хота научной сотрудник щирн рәпитты вўсы. Ӆўв нәмӑсӆ, хуты Герцен нєм­пи институтн павтум так нумсӑт ӆўвеӆа ма нётсӑт. Щит унтасн ӆув арсыр м рәпата тӑхетн рәпитты вєритӑс. 

- Мўӊ институтн ма вәнӆтӑсыюв, ин мўӊ ар­сыр тӑхетн рәпитты щир тӑйӆўв, – лупӆ ӆўв. 
Ӆўв ӆӑӊхас, ӆәӆн Дарья эвеӆ ищи Герцен нємпи институтн ат вәнӆтыӆӑс, тәп эвеӆ щив мӑнты ӑн ӆӑӊхас.

- Ӑӊка, ма няврємӑт вәнӆтӑты нєӊа йиты ӑн ӆӑӊ­хаӆум. Щит няврємӆам хәнты ма итєма ӑӊкиӆы юӆн омӑсты питӆӑт. Нӑӊ иса ӑшколайн вәсӑн, аӆӑӊ мӑныйӆсӑн етн вәнты. Ет­нӑтн няврємӑтн хӑншум нєпекӑт вантсӑн, урока ӆэщӑтыйӆсӑн, конспектӑт хӑншсӑн. Ӑнта, ӑн ӆӑӊхаӆум щиты вәӆты, – лупӑс эвеӆ.
Эвеӆ дизайнер-рек­лам­щика вәнӆтыӆӑс, тәп рәпата щи вєрн ӑн вәйтӑс. Тӑмхӑтӆ айӆат хуятӑта ӆавӑрт м рәпата вәйтты па ар хуят па рәпатая мӑнӆӑт, вәнӆтыӆум щирӆаӆн ӑн рәпитӆӑт.  
- Ма нәмӑсӆум, хуты нӑӊ учителя вәнӆтыйӆсӑн ки, ӑшколая рәпитты мӑнты мосӆ. Щив рәпитты ӑн мӑн­сӑн ки, щит пӑта го­су­дарственной муй па ӑӊ­кен-ащен вухӑт нӑр­там­ӆы тӑруптӑсыйт. Учи­теля вәнӆтыйӆты мосӆ тәп щи хуятӑта, хуйтат ӛхӑт ӑш­колайн рәпитты питӆӑт, хуйтат ӆӑӊхаӆӑт щӑта рә­питты, – лупӆ тӑм ими. Ӆўв нәмӑсӆ, итәх пурайн мосӆ вән хуятӑт хәӆӑнтты. – Айӆат хуятӑт тӑмхӑтӆ пу­тӑртӆӑт: «Мӑнєм аӆ вәнӆ­таӆн, ма вәйтӆум, муй вєрты мосӆ, хутыса вәӆ­ты мосӆ». Щит, мосӑӊ, ӆыв пӑ­тэӆа итәх пурайн м, тәп вәнӆат хуятӑт ну­ви тўтн хўв­шӑк вәӆӆӑт, аршӑк мос­ты вєр вәйтӆӑт. Айӆат ёх ат хәӆӑнтӆӑт, ат вантӆӑт, щит мосӆ муй ӑнтә. 
Ищиты ӆўв рәт ясӑӊ ӆа­вӑӆты вєр оӆӑӊӑн нә­мӑсӆ. Ӆўв тыштӑӆ, хуты арсыр мирӑӊ семьяйт ху­щи рәт ясӑӊ айкємн вәт­шӑӆы. 
Ӆўв хиӆнєӆаӆ па хи­ӆыӆаӆ айкємн нгана­санской ясӑӊӑн путӑртты вәнӆтӑӆ. Вантэ, эвеӆ кӑт мир эвӑӆт йиӆ: долганӑт па нганасанӑт. Ащеӆ – долган мир эвӑӆт вәӆты хә, ӆўв па ӑӊки – нганасан мир эвӑӆт йиӆ. Лидия Кунделеевна хиӆыӆаӆ пиӆа ӑӆ ясӊӑтн путӑртӑӆ: нянь, шай, тўва, мия. 

- Хиӆнєӆама ма рәт нганасан мирєм йис вєрӑт оӆӑӊӑн путӑртӆум, ӆыв ӑӆ ясӊӑт уша вєрты питсӑт. Мосӑӊ, хән вәншӑка йиӆӑт, ушн юхӑтӆыйт па мўӊ итэ­ва рәт ясӊеӆ па рәт миреӆ вана тӑйты питӆэӆ, – лупӑс Л. Аксёнова.
Ищиты Лидия Кунде­леевна ӆӑӊхаӆ, ӆәӆн айӆат ёх аршӑк арсыр киника ат ӆўӊӑтсӑт. Щи унтасн ӆыв нумсӑӊа йиӆӑт па еӆӆы вәӆупсэӆ тумтака ӆэщӑтты щир тӑйӆӑт. 

Путӑр хӑншӑс: Надежда Вах