Мўӊ мўвевн хурамӑӊ нєӊиет вәӆӆӑт, ӆыв рәт мир йис вәӆупсы еӆӆы тәӆӑт. Марина Ивановна Пяк Ас хӑӆты тыӆӑщн сєма питум хӑтӆӑӆ вәс, 45 оӆа йис. Ӆўв Русскинской кәртӑн хӑнты семьяйн 1981-мит оӆн сєма питӑс.   

Марина ая вәӆум оӆӑт оӆӑӊӑн путӑртӑӆ:  

- Русскинской вош ӑш­колайн вәнӆтыйӆсум, ӑӊкєм-ащєм пиӆа Сәр­ханӆ районӑн вәнт кәр­тӑн вәсмӑн. Ащєм Иван Русскин, ӑӊкєм Альбина Григорьевна Русскина вәс­ӊӑн. Ӑӊкєм-ащєм вўӆэт ӆавӑӆсăӊăн. Интӑм ӆўв упєм пиӆа Русскинской вошн вәӆ, ӆўв юӆн ӑн омӑсӆ, упєм пиӆа Русскинской вошн пурмӑсӑт шавиты хота ӊхийӆ, йис моньщӑт, путрӑт путӑртăӆ. Имиета па няврємӑта ванӆтӑӆ, муй вўрн йистєӆн хӑншиет, пурмӑсӑт, әмӑтсухӑт, тўрӆопсӑт ёнтты. Вәнта воньщумута ӊхийӆ. Мўӊ айтєӆн ёнтсўв, ӑӊкєм муй вєрӆ, иса нётсўв.  

Эвиӆаӆ ищи ӑӊкеӆ иты вўӆы сух пиӆа тәса рәпитӆӑт, вейт, сӑхӑт, моӆщаӊӑт ёнтӆӑт, тунты эвӑӆт арсыр пурмӑсӑт вєрӆӑт, сӑк кӑрӑтӆӑт. Юӆн ӆўвеӆа иса нётӆăт. 
Марина ищи вән се­мья тайӆ, икеӆ – Павел Айваседа, няврємӆаӆ – Иван, Денис, Вера па Паша ай пухие. Хоттєӆ ёхӆаӆ сӑмӑӊа тӑйӆӑӆэ, иса ӑӊкеӆ нумсӑӆ няврємӆаӆ оӆӑӊӑн, рәт ёхӆаӆ оӆӑӊӑн.

- Икєм пиӆа вәнт кәртӑн Тәрумор вош пўӊӑлн вәӆӆумн. Ӆўв яйӆаӆ пиӆа вўӆы кәртӑн вўӆыӆаӆ ӆавӑӆ. Ӆўӊӑн, хән няврємӆўв айт вәсӑт, рўтьщӑты пурайн мўӊ хущева юхтыйӆсӑт. Кәртӑн, вантэ, иса вєр вәӆ, юӆн ӆєтут кавӑртты, нянь вєрты, пурмӑсӑт ёнт­ты мосӆ. Ӆўӊӑн па сўсн воньщумут ӑкӑтты ӊх­ӆумн.

Интӑм Марина Касум вошн ӑшколайн рәпитӆ, Паша ай пухиеӆ ӑшколайн вәнӆтыйӆты питӑс. Иван вән пухӑӆ рәпитӆ, семьяйӆ пиӆа вәӆ.
Денис армия пийн Тәрумор вошн тўт хә­рӑтты тӑхийн рәпитӆ. 
Вера эвиеӆ икия мӑнӑс, Леня ай пухие єнмӑӆтӑӆ. Вера ая вәӆмаӆн, ӑшко­лайн вәнӆтыйӆмаӆн, хот­тєӆ ёхӆаӆ оӆӑӊӑн м яс­ӊӑт, путрӑт хӑншӑс:

- Ма 9-мит класс ет­шуптӑсум. Ӑӊкєм-ащєм – Марина Ивановна Пяк па Павел Львович Айваседа. Ма Иван Пяк яй, Денис Пяк па Павел Айваседа апщеӊӑн тӑйӆум. 
Ма әмща киникайт ӆў­ӊӑтӆум, арӑт хәӆӑнтӆум. Ма ӆәйӊӆам – Алиса, Вера, Саша па Соня. Иван яюм армияйн служитӑс, Денис апщєм ма пиӆама вәнӆтыйӆ. Павел апщєм юӆн ӑӊкєм-ащєм пиӆа вәӆ, ӆўв тәп хәӆум оӆа йис. Мўӊ вәнт шушевн вәӆӆўв. Иса хоттєӆ ёхӆам пиӆа ӆўӊ пурайн воньщумут ӑкӑтты ӊхӆўв, мәрӑх, сэвупсы, вўрты воньщумут, тохтӑӊ вәӆ ӑкӑтӆўв. Итәх пурайн тулӑх ӑкӑтӆўв. Аӊкаӊкев нємӆ Альбина Григорьев­на Русскина, ӆўв Сәрханӆ районӑн Русскинская вошн вәӆ. Аӊкаӊкєм хӑнты ӆәмӑтсухӑт ёнтӑӆ, вўӆы ӆон вєрӆ, вейт тәса ён­тӑӆ. Ӑшкола етшуптумєм пийн ма Нягань вошн еӆӆы вәнӆтыйӆты ӆӑӊ­хаӆум. Денис апщєм Ну­ви сӑӊхум вошн еӆӆы вәнӆтыйӆты питӆ. Ӆўв м, ром пухие, мӑнєма иса вєрӑтн нётӆ. 

Марина Ивановна – вєрӑӊ нєӊие, муй рнас, муй пўнӑӊ сухӑт тәса ваньщӑсты па ёнтты хошӆ. Касум вош музея вәйтантупсэта, вәнӆтӑты хӑрӑта, мӑӊхӑтӆӑта иса юхтыйӆ.

Ас хӑӆты тыӆӑщн иху­щьяӊмит хӑтӆӑн Мари­на Ивановна сєма пи­тум хӑтӆӑӆ постӑсӆэ. Ма ӆӑӊхаӆум Марина Ива­новная па ӆўв хоттєӆ ёхӆаӆа м ясӊӑт лупты, тӑӆаӊа, ма вәӆаты. Хўв нәпӑт!

Путӑр хӑншӑс: 
Светлана Рандымова