Кашӑӊ оӆ Ёмвош округев хущи вәӆты мира грипп мәш эвӑӆт прививка ӆоньщӆтӑӆы. 2026-мит оӆн ищи лыпӑт хойты тыӆӑщ вўш эвӑӆт тӑм вєр тәты питсы. Ай тӑхет потты тыӆӑщ оӆӊитты пура вәнты округевн 500 щурӑс хуят прививкайн вєрсыйт. 

Муйсӑр пуртәнӑт щи пӑта тӑм оӆ вўсыйт?

Щит «Ультрикс Квадри» пуртән – тӑм ут няврємӑт, кӑшаӊа вәӆты имет па вән хуятӑт пӑта вәӆ. «Со­виг­рипп» па «Флю-М» пур­тәнӊӑн – вән хуятӑт па пирӑщ ёх пӑта йиӆ. «Грип­пол плюс» пуртән – няв­рємӑт па вән хуятӑт пӑта питӆ.

Мӑта хуята мєт оӆӑӊӑн щи пуртәнӑт ӆоньщӆтӑты мосӆ?

Мєт оӆӑӊӑн щит:
- 6 тыӆӑщ вўш эвӑӆт ай пушхӑта;
- вәнӆтыйӆты няврємӑта па айӆат хуятӑта;
- ар мир пиӆа рәпитты хӑннєхуятӑта;
- кӑшаӊа вәӆты имета;
- 60 тӑӆ вўш эвӑӆт вәнӆат ёха;
- арсыр хронической мәш тӑйты па ванкўтӆы кӑ­шитты хуятӑта.

Мӑта тӑхетн щи при­вивкайт вєрты рӑхӆ?

Щи пуртәнӑт тәрум пӑ­та хӑннєхуятӑт вана вәӆ­ты пәӆьницайт хущи вєр­ӆыйт. Щит вән хуятӑт па няврємӑт ӆекщитты хо­тӑтн. Ӑшколая муй па са­дика ӊхты няврємӑт иса щӑта прививкайн ӆоньщӆтӑӆыйт. Вән хуятӑт пӑта ищи рәпитты тӑхета пуртән вєрты пӑта тохтурӑт вохты щир вәӆ. Щит пӑта кәща ёха мосӆ пәӆьницая нємасыя нєпек хӑншты.

Щи оӆӑӊӑн вәты мосӆ: 

Ӑн мосӆ прививка вєр­ты, хән хоньщупсы кӑши тӑйӆӑты. 
Прививка вєрум пийн хӑннєхә еша вевӆы йиӆ, 37,5 вәнты хоньщупсыйн юхӑтӆы, пуртән ӆоньщум тӑхеӆ еша кӑшитӆ муй па вўртышӑка йиӆ. Ӛхӑт и-кӑт хӑтӆ мӑнум пийн ма йиӆ. 
Мосӆ лупты, хуты мєт ар хӑннєхә грипп муй па ОРВИ мәшӊӑнӑн тӑӆн кӑшитӆӑт. 

Айкеӆ хӑнты ясӑӊа тулмащтӑс: Надежда Вах