Ай ӛрамӑт потты ты­ӆӑщн 8-мит хӑтӆӑн Юг­ра мўв 8-мит со­зыв депутатӆўв оӆӑӊ мирхо­та ӑктӑщсӑт. Тӑм мирхот хўв мӑр депутата рәпитты хуят Еремей Айпин пўншӑс.

Округ кәща хә Рус­лан Кухарук оӆӑӊ ясӑӊ вўс. Ӆўв ястӑс: 

- Мўӊ округ мирев пи­рєсты тӑхета депутатӑт пириты юхтыӆысӑт. Ӆыв вәйтӆэӆ па нынана пу­нантӆӑт, ӆәӆн нын ма ат рәпитсӑты па мир вәӆты вєрӑт нын рәпатайӆӑн унтасн еӆӆы ма вәӆты питӆӑт. Щирн ин, йиӆпа пириюм депутатӑт, тўӊа-щирӑӊа мир кєши рә­питаты.

Денис Корнеев Югра мўв 8-мит созыв депутат­ӆӑв 40 хуят нємӆаӆ ястӑс. Щи ёх вет политической партия эвӑӆт: «Единая Россия», «ЛДПР», «КПРФ», «Справедливая Россия», «Новые люди» пирисайт.
Ин округ Думая 17 хуят йиӆпа пирисы. Йиӆпа юх­тум айӆат хуят оӆӑӊӑн яс­тӑӆум, щит Иван Лаптев – хӑнты айӆат хә. Ӆўв депута­та па увӑс мир Ассамблея тӑхия ищи пириса. Сергей 2022-мит оӆ вўш эвӑӆт СВО ӆаӆь хӑрн вәс. Ӆўв «За храб­рость», «Жуков» па «Суворов» мевӆ посӑтн мӑ­са. Щирн ин депутат тӑхийн така па тўӊа-щи­рӑӊа рәпитты питӆ.

Йиӆпа пириюм депу­татӑт округ дума кәща хәя Борис Хохряков пирисэӆ. Щӑӆта па хәӆум хуят де­путатӑт эвӑӆт округ ду­ма кәща хә ӆӑӊкӑр ёха пирисайт: Наталья За­паднова, Всеволод Коль­цов па Еремей Айпин.
Щи пийн округ дума депутатӑт ӆыв кўтэӆн вет комитет еӆӆы рәпитты щира ӆэщӑтсӑт. 
Кимит вәйтантупсэӆн депутатӑт ищи ар вєр оӆӑӊӑн путӑртсӑт. Ӆыв 13 закон йиӆпатсӑт – щит мўвăт-йиӊкӑт оӆӑ­ӊӑн, округ мирев вәӆуп­сы ӆэщӑтты оӆӑӊӑн, округ бюджет 2026-мит хӑщум оӆн па еӆӆы вәӆты 2027-2028-мит оӆӑта па па вєрӑт оӆӑӊӑн.
Округ Дума ёх вет пос­тупсы оӆӑӊӑн путӑр тә­сӑт. И ут оӆӑӊӑн яс­тӑ­ӆум «О наделении пол­номочиями сенатора Российской Федерации представителя от Думы Ханты-Мансийского ав­то­номного округа –Юг­ры». Щӑӆта округ Дума депутатӑт Александр Новьюхов Российской Федерацияя сенатора пирисэӆ.
Пресс-конференция вәӆум пурайн Наталья Западнова путӑртӑс, хуты «О поддержке семьи, материнства, отцовства и детства в Ханты-Ман­сийском автономном ок­руге – Югре» поступсы йиӆпатсы. 
Щи тумпи ӆўв ястӑс, муй­сӑр вєрӑт округ законӑт хущи йиӆпа пунсайт. 

- Йиӆпа закона пунса щи оӆӑӊӑн, хән шәкащты хӑщум няврємӑт йиӆуп хотӑӊ ёх хущи вәӆтэӆн па ӑшкола етшуптӑтэӆ пийн еӆӆы ки вәнӆтыйӆты пит­ӆӑт, 23 тӑӆа йитэӆ вәнты ӆыв вухн ат сухуптӑсайт, – нӛхмӑс Н. Западнова.

Йиӆпа пириюм депу­татӑт ещаӆт округев по­чётной хуят – Василий Семёнович Сондыков па Нижневартовской район почётной хуят – Анатолий Прокопьевич Кауртаев вўща ясӑӊ путӑртсӑӊӑн. Ӆын лупсӑӊӑн, ӆәӆн йиӆ­па пириюм депутатӑт тў­ӊа-щирӑӊа, мсыева ат рәпитсӑт.

Путӑр хӑншӑс: 
Наталья Краснопеева