Тăмхăтӆ хӑнты Обатин рәт оӆӑӊӑн хӑншӆум. Поӆнавӑт кәрта ӊхмємн ма леккăр хотн м хӑнты ими пиӆа вәтаӊа йисум – щит Галина Александровна Кытманова (Обатина). Путӑртумн ма уша вєрсум, ӆыв семьяеӆ йистєӆн ар хуят мир лекщитман вәс.

Галина Александровна тӑм ванӑн, лыпӑт хойты тыӆӑщ 19-мит хӑтӆӑн, сєма питум хӑтӆӑӆ постӑсӆэ – 64 оӆа йис. Мўӊ ӆўвеӆа ар хошум ясӑӊ китӆўв – опращӆăн партум м вєрӑт еӆӆы тўваӆн, щўняӊа па тумтака вәӆа!

Тӑм хӑнты ими Сўмӑтвош (ин Ну­ви сӑӊхум) район Касум кәртӑн сє­ма питӑс. Ащеӆ Алексей Данилович Обатин Ёмвошӑӊ национальной педучилища етшуптумаӆ пийн рәт кәртӑӆн ай няврємӑт вәнӆтӑс, ӛхӑт культура хот кәщая, хўӆ веӆпӑсӆӑты хәя вәс. Щӑӆта мәшитмаӆ пурайн рыбкооп хот ӆавӑӆты хәя рәпитӑс. 

Ӑӊкеӆ Евгения Даниловна хӑнты Ерныхов рәт эвӑӆт вәс. Ӆўв Ёмво­шӑӊ национальной медицинской училища етшуптумаӆ пийн ими леккăра йис. Рәпатаеӆ щирн ӆыв семьяеӆ ванкўтӆы арсыр кәртӑта вәӆты па рәпитты щира касӆыйӆсӑт. Щиты Касум кәрт эвӑӆт Анеева, Новинской, Тўкъякӑӊ, Поӆнавӑт кәртӑта ӊхсӑт па вәсӑт. 

- Хӑнты Тўкъякӑӊ кәртӑн єнум­сум, щӑӆта 1974-мит оӆн Поӆнавӑта касӑӆсўв. Мӑнєма ай пурайн әмӑщ вәс, хуты Касум кәртӑн ар пєлӑк хӑнтэт вўӆэт тӑйӆӑт, Вән Ас хонӑӊӑн вәӆты хӑнтэт ӆовӑт, мисӑт, ошӑт па па хот войт тӑйсӑт. Ай пурам – щўняӊ пура, арсыр єпӆӑӊ хӑнты ну­ви хўӆ ӆєсум, Ас хўват хопн ӊхсум, вәщийӆсум, – Галина Александров­на нәмӑӆмӑс.

Тўкъякӑӊ кәртӑн Галя эвие нуле­вой класса мӑнӑс, щӑӆта 1974-мит оӆн ветмит класс вўш эвӑӆт Поӆна­вӑт кәртӑӊ ӑшколайн вәнӆтыӆӑс. Ӆўв ма вәнӆтыӆӑс, щи тумпи ар­сыр кружок тӑхета ӊхиӆӑс.
Ая вәӆмаӆн Галя итәх пурайн ӑӊкеӆ рәпата тӑхия юхтыӆӑс па вантӑс, муй щирн ӑӊкеӆ мәшӑӊ мир вантӑӆ, няврєм тӑйты имет пєӆы шєӊк сӑмӑӊ вәс. Щи пурайн ай эвие нумӑс вєрӑс ищи тохтура йиты, щирн ӑшкола етшуптумаӆ пийн Ёмвоша юхтӑс. Тӑта экзаменӑт ма мӑс па ӑӊкеӆ иты ими тохтура вәнӆтыйӆ­ты питӑс. 

- Тӑм пура вәнты мўӊ группаев кәща нєӊев Людмила Сергеевна Вахрушева м нумӑсн нәмман тӑйӆєм. Ӆўв мўӊев латынь ясӑӊа па «фармакология» вєра вәнӆтӑсӆэ. Мєт вуӆаӊ практика вєр Сәрханӆ пәӆьницайн тәсум. Иса государст­венной экзаменӑт ма мӑсӆам. Еша Ёмвошн вәсум па рәпитсум, щӑӆта рәт Поӆнавӑт кәртєма кєрӆӑсум. Щи пурайн Ирина эвєм сєма питӑс. Няврємєм єнмӑӆтуман юӆн омӑссум, щӑӆта ӑшкола-интернат хуща рәпитсум, вантэ, кәртӑӊ пәӆь­ницайн тӑхи ӑнтәм вәс. Тәп 1989-мит оӆн пәӆьницая рәпитты вох­сыюм. Щӑта ар м па мир пєӆы сӑмӑӊ хуят рәпитӆ. Ӆывеӆа вән пә­мащипа ясӑӊ лупӆум. Вантэ, айӆат пурайн тыв рәпитты юхӑтмємн мӑнєма вән тохтурӑт иса пурайн нётсӑт па вәнӆтӑсӑт. Ин ма ищи айӆат ёха сӑмӑӊа нётӆум, – Галина Александровна лупӑс. 

2005-мит оӆн Галина Алек­сандровна Ёмвошӑӊ медицинской академияйн вәнӆтыӆӑс па фельд­шер-лаборанта йис, тӑм пура вәнты мир лекщитман Поӆнавӑт пәӆьни­цайн рәпитӆ. 
Тӑм кәртӑн ӆўв Василий Ни­колаевич Кытманов икеӆ пиӆа вәйтантыӆӑс. Хәӆумъяӊкєм оӆ иха, и нумӑсн сӑмӑӊа вәӆӆӑӊӑн. Икеӆ арсыр рәпатайт тәс, юхи хӑщум 15 оӆ «Центроспас-Югория» тӑхийн рәпитӑс. Тӑм оӆ вәйт ӆор тыӆӑщ вўш эвӑӆт пенсияя мӑнӑс.

Ӆын Ирина эвӑн 2016-мит оӆн Ёмвошӑӊ медицинской академия етшуптӑс па тохтура йис. Ин Ём­вошн округ пәӆьницайн трансфузиоло­га рәпитӆ.

Мосӆ лупты, тӑм хӑнты ими Ер­ныхов рәтэӆ ар хуят мир лекщитман вәс. Ӆўв аӊкаӊкеӆ Анна Григорьев­на Ерныхова катра пурайн Мущаӊ кәртӑн ищи нєӊӑт вантман тӑйс па мӑӆтӑс. 

Кытмановӑт-Обатинӑт рәтӑт мир лекщитты вєр тўвман 2014-мит оӆн «Рәпатайӊ рәт» кӑсупсыйн нух питсӑт па щи пурайн округ кәща нє Н.В. Комарова эвӑӆт ишӑкты нєпек па мойӆупсы ёша хоӆумсӑт.

Рўтьщӑты щира ӆўв хўӆ веӆ­пӑс­ӆӑты, воньщумут воньщты, тулӑх ӑкӑтты, арсыр хурамӑӊ ӑня лыптӑт па овощӑт єнмӑӆты вєрӑт мосман тӑйӆ. Ӆўв хущеӆа Ёмвош эвӑӆт Гриша па Евгений хиӆєӊаӆ мойӊа юхтыйӆӆӑӊӑн. 

Поӆнавӑт кәртӑн вәӆмємн ар хуят тӑм хӑнты имия вән пәмащипа луп­сӑт. Ешӑк Галина Александровна, хўв йис, хўв нәпӑт тӑӆаӊа вәӆа!

Путӑр хӑншӑс: 
Людмила Шульгина