Васы мӑнты тыӆӑщ 5–8-мит хӑтӆӑтн Пермской мўв Коми-Пермяцкой округ Кудымкар вуӆаӊ вошн пермской сӑран ясӑӊӑн ӆўӊтарӑт хӑншты нє Елена Коньшина финно-угорской писателят ӑктӑс. Щит удмуртской писатель Вячеслав Ар-Серги, удмуртской поэт Николай Мерзляков, эрзянской поэтесса Татьяна Мокшанова, марийской поэтесса Альбертина Иванова, марийской поэтӊӑн Игорь Попов, Геннадий Григорьев па ма, вантэ, тӑм ванӑн рўщ ясӑӊ эвӑӆт путрӑт па ӆўӊтарӑт тулмащтӑты питсум. Мўӊ пиӆэва пермской сӑран писателят вәсӑт.

Пермской сӑран мир па финно-угорской ясӊӑтн ӆўӊӑтты арӑт хәӆӑнтсӑт

Пермской сӑран нє Еле­на Коньшина рәт ясӊӑӆн хурамӑӊ ӆўӊӑтты арӑт хӑн­шӑӆ, ар оӆ финно-угорс­кой писателят ёх и нумӑсн вәӆ. Тӑм оӆн ӆўв президентс­кой грант нётупсы вух унтасн «Созвучие» нємпи киникайӆ єсӑӆсӑӆэ. Щи нєпекн арсыр финно-угорской писателятн хӑн­шум путрӑт па ӆўӊӑтты арӑт хӑншман вәӆӆӑт. Щит пӑта ӆўв рәт мўвӑӆа щи ёх мойӊа вохсӑӆэ. 
Щи хӑтӆӑтн мўӊ Коми-Пермяцкой округ вуӆаӊ Кудымкар вош эвӑӆт увӑс пєлка ӊхсўв. Кочёво па Сер­геевской кәртӑӊ ӑш­ко­лайӊӑн вәнӆтӑты ёх па няврємӑт пиӆа вәй­тантыйӆсўв. Мўӊ ӆывеӆа ӆўӊӑтты арӑт ӆўӊӑтсўв па арӑт арисўв. Ма няв­рємӑта хӑнты мир, мўӊ редакцияев оӆӑӊӑн пу­тӑрт­сум па Мария Вагато­вайн хӑншум стихӑт па Владимир Еновӑн хӑншум моньщ ӆўӊӑтсум. Ар хуят лупсӑт, муйсӑр хурамӑӊ хӑнты ясӑӊ.

Щӑта мўӊ уша вєрсўв, няврємӑт рәт пермской сӑран мир йис вәӆупсы оӆӑӊӑн уша вєрӆӑт, щирн рәт ясӑӊ вәнӆтуман арӑт ариӆӑт па якӑт якӆӑт. Ӆыв мўӊ пӑтэва етнхот аӆьсӑт. Шєӊк әмӑщ, Кочёво кәртӑн стихӑт хӑншты хәӆум нє вәс, щит Нина Исаева (Ба­дина), Татьяна Минина (Гон­чарова) (ӑнтәма йис) па Вера Мелехина, ӆўв мўӊ пиӆэва няврємӑт пи­ӆа вәйтантыӆӑс.

Мўӊ пӑтэва щӑта вәӆты ёх арисӑт па яксӑт. Кочёво кәртӑн вәнӆтӑты ёх хўвн «Ариты сӑм» нємпи тӑхи ӆэщӑтсӑт, шєӊк хурамӑӊа арисӑт. Сергеевской кәр­тӑӊ ӑшколайн няврємӑт пермской сӑран мир як аӆьсӑт.
Кудымкар вошн мўӊ педагогической коллед­жа па «Герой Советского Союза Николай Кузне­цов» нємпи 1-мит вошӑӊ ӑшколая ӊхсўв. Щӑта ищи ӆўӊӑтты арӑт ӆўӊӑтсўв, мўӊ хәӆсўв, муй щирн ай­ӆат ёх ӆыв стихӆаӆ ӆў­ӊӑтсӑт. Щи тумпи няв­рє­мӑт иньщӑссӑт, муй щирн путрӑт муй ӆўӊта­рӑт хӑншты оӆӊитты. 

Юхи хӑщум хӑтӆӑн Ку­дымкар вошн М.П. Ли­хачёв нємпи киникайт ӆўӊӑтты хотн ӊта пӑсан вәс. Щӑта финно-угорской писателят тӑм йис суртӑт па щитӑт тўӊматты вєрӑт оӆӑӊӑн путӑртсӑт. Интӑм финно-угорской ясӊӑт айӆ­тыева вәтшӑӆӆўв, щирн пи­сателят киникайӆаӆ кӑт ясӑӊӊӑнӑн хӑншты питсӑт. Щи тумпи ӑшколайт хуща рәт ясӑӊ урок факультатив иты вєрсы, щирн няврємӑт щив ӑн ӊхӆӑт. Щи вєрӑт тўӊматты щира интӑм ху­ӆыева киникайт аудио щирн вєрты мосӆ, щи тумпи ай кинайт вєрты па аӆьты мосӆ, ӆәӆн няв­рємӑта па айӆат ёха әмӑщ ат вәс.

Финно-угрӑт пермской сӑран мир оӆӑӊӑн уша вєрсӑт

Вәйтантупсэт тумпи мў­ӊева пермской сӑ­ран мир йис вәӆупсы оӆӑ­ӊӑн путӑртсы па йис пур­мӑсӑт ӆавӑӆты хотӑта тәтьӆясыюв.

Щиты мўӊ Пармайлово кәрта ӊхсўв па щӑта х эвӑӆт вєрум пермской сӑ­ран мир йис путрӑт, монь­щӑт эвӑӆт арсыр утӑт, ӆәӊ­хӑт вантсўв. Щит 1993-мит оӆн х нюхрантты хә Егор Фёдорович Утробин вєрты оӆӊитӑс. Мєт сыры тӑм тӑхийн рәпитты имет арӑт ариман ещаӆт єтсӑт – пермской сӑран ясӑӊ шєӊк хурамӑӊ, итәх ӆыв ясӑӊӆаӆ мўӊ хӑнты ясӊев пиӆа и хурпет. 

Арсыр х пурмӑ­сӑт аӆьман ма хәӆсум: «Тӑм пӑӆтап ут – щит вәнтӑн вәӆты кўӆь», ма юхӆы луп­сум, мўӊ хӑнты ясӊевн ищи­мӑщ кўӆь ясӑӊ па щи ут ищи вәӆӆяӆ.

Юхи хӑщум артӑн мўӊ пермской сӑран мир єпӆӑӊ ӆєтутӑтн ӆапăтсыюв. Ма веӆщи щи арат арсыр пӑӆ нянь ӆєсум – капуста пиӆа, тулхӑт пиӆа па па арсыр утӑт пиӆа. Экскурсовод нє лупӑс: 

- Мўӊ пўӊӆэвн «Си­бирский тракт» вән ӛш вәӆ, хәнты хўвн па хон пєлӑк Китай мўв эвӑӆт тыв тынєсты щурас ёх юх­тыйӆсӑт. Ӆыв тӑта щи пу­райн мўӊ пӑӆ няньӆўв ӆє­сӑт, ӆывеӆа щимӑщ ӆєтут шєӊк мәстӑс, щирн ӆыв ищи щимӑщ утӑт вєрты питсӑт – ин лупӆӑт, мӑтты ки, щит китайской ӆєтут. Ӑнтә, щит мўӊ пермской сӑран мирев йис ӆєтут. 

Еӆӆы мўӊ Кудымкар вошн П.И. Субботин-Пермяк нємпи крае­вед­ческой музейн вәсўв. Щи тӑхи 1921-мит оӆн хур хӑншты хә Пётр Ива­нович Субботин-Пермяк пўншӑс. Ин щӑта 87 щурӑс арсыр пурмӑс ӆавӑӆман тӑйӆы. Щи кўтн мєт вуӆаӊ – щит йис пура вўш эвӑӆт хӑщум сӑран мир пурмӑсӑт: кар­ты анӑт-сәнӑт, тўрӆопсӑт, йис хотӑт, х ӆәӊхӑт, ӆә­мӑтсухӑт, хурӑт па па утӑт. Мӑнєма щӑта «Йис Пар­ма моньщӑт» ай кина иты вєрум ут шєӊк әмӑщ вантты вәс. Вакуль мӑӆӑӊ кўӆь оӆӑӊӑн ай кина мєт пӑӆтап вантты вәс. Щӑӆ­та уша вєрсум, пермской сӑран мир мўӊ мирев иты и хурпи хопӑт, пәнӑт па па утӑт тӑйӆӑт. Вантэ, йистєӆн тӑм вәнт мўва юхӑтмеӆн ӆыв хўӆ па вой веӆпӑсӆӑсӑт, щӑӆта айӆтыева арсыр ӆєтутӑт омӑсты питсӑт.
Щи тумпи Кудымкар вошн мўӊева Вуӆаӊ Оте­чественной ӆаӆьн ӆаӆя­сум ёх кев хурас аӆьсы. Щӑ­та пермской сӑран мир икет нємӑт хӑншман вәӆӆӑт, ӆыв веӆпӑс хуятӑт иты ищи тәса вуракӑт пиӆа ӆаӆяссӑт.
Ма веӆщи щи арат пермс­кой сӑран хуят вант­сум, щит шєӊк мир пєӆы сӑмӑӊ ёх, рәпатайӊ ёх. Ӆыв йис вәӆупсэӆ, рәт ясӊеӆ сӑмӑӊа тӑйӆэӆ.

Путӑр хӑншӑс: 
Людмила Гурьева