Ас нопӑтты тыӆӑщ 12-мит хӑтӆ вўш эвӑӆт па иса 14-мит хӑтӆӑт вәнты Ёмвош округев ӆуваттыйн вәӆты киникайт хӑншты хәйт-нєӊӑт Югра мўв писателят IV-мит мирхота ăкăтсыйт. Щимӑщ вуӆаӊ мирхот «Россия» национальной центр тӑхийн нємасыя пўншсы. Щи киньща ищи пурайн поэтӑт па писателят пиӆа вәйтантыйӆсўв па кўтэвн путрємӑсўв. 

Имуӆтыйн щи хӑн­нєхуятӆўв кўтн мўӊ йисӑӊ-нәптӑӊ тәс ӆўӊ­та­рӑт хӑншты вухаӆь ими Мария Двинянинова пи­ӆа вәйтантсўв па ӆўв ищи­ты щи мўӊева айкеӆӑт вәӆты-хоӆты щирӆаӆ па литературной вєрӑт оӆă­ӊăн мсыева тәс.
Мария Тихоновна Дви­нянинова (эви щирӑӆн Номина) путӑртӑс, хуты 1951-мит оӆн Сўмӑтвош райо­н Няксимволь кәртӑн вой-хўӆ веӆпӑсӆӑты хот­тєӆ ёх хуща тӑм нуви тә­рум иӆпия юхтӑс па ай­тєӆн иса вухаӆят кўтн вәс па єн­мӑс.

Ӛхӑт, 1968-мит оӆн, тӑм эвие Няксимволь кәр­тӑӆн нивӆ класс вўшӑт вәнты ӑшкола-интер­нат етшуптӑс. Щитӑӆ сухнуп­тумӑӆ пийн ӆўв Сў­мӑтвош кўтуп ӑшколайн ртъяӊ па яӊмит классӑтн еӆӆы вәнӆтыйӆты питӑс. Тӑм нє вєрум айкеӆӑт щирн, мўӊ уша павӑтсўв, щи йисн шєӊк ар няврєм щӑта вәс. Мосӆ лупты щи вєр оӆӑӊӑн, хуты щи кўтуп ӑшкола-интернатн вәӆтаӆ муй па вәнӆтыйӆтаӆ кўтӑтн Мария тўрсыйӆ вәтшӑты питӑс. Щи киньща итәх щосӑтн иса путӑртты щир ӑн па тӑйс. Щи вєр пӑта арсыр урок мӑнты пу­раитн ӆўв па нєпекӑт хў­ватн вәнӆтыӆӑс. Ӆўвеӆ вәнӆтӑты нєӊӑта па хәя­та ар пєлӑк щиты щи ӆўв вєрум айкеӆӆаӆ нєпека хӑншӑс па туметн щитӑт ӆўӊӑтсыйт, ӛхӑтшӑк ушӑ­ӊа-сащӑӊа вєрсыйт. Щиты вухаӆь эвие араттєӆн хәт тыӆӑщ мӑр тўрсыйӆ иса хуӆт пєӆы мӑнӑс. Хән кў­туп ӑшколайӆ етшуптӑты питӑс, мєт юхи хӑщум тыӆ­щӑтн Мария веӆщи тум­така йис па тўрсыйӆ ӆўв хущеӆа йиӆпа щи юхтӑс.

Ищи пурайн ӆўвеӆ вәнӆ­тум хӑннєхуятӑт щиты лупсӑт вухаӆь эвия, хуты ӆўв еӆӆы тәп арсыр хӑн­нєхә мәшӑт мӑӆты нєӊа вәнӆтыйӆты щирӑт тӑйӆ.  Вантэ, ӑшколайн няврє­мӑт вәнӆтӑты тўрсыйӆ мәш вєр пӑта рәпитты и пўша иса ӑн па вєритӆ. Щит пӑта Мария нәмӑсты питӑс, ху­ты еӆӆы медицинской учи­лищая мӑнты мосӆ.

Щи киньща Сўмӑтво­шӑӊ кўтуп ӑшкола-ин­тернат етшуптумаӆ пийн Мария Номина Ялуто­ровск вошн веӆщи пўн­шум медицинской учи­лищая мӑнӑс па щи тӑхийн оӆӑӊ тӑӆ акушер нє щи­ра еӆӆы вәнӆтыйӆты вўсы. 
Нӆ-вет тыӆӑщ мӑнум пийн ӆўв фельдшер щирн вәнӆтӑты тӑхия па­вӑтсы.
Кашӑӊ пўш медицинс­кой практикая ӆўв Сўмӑт­вош район пәӆьница хо­та щи ӊхӑс. Ӛхӑт па щи тӑхеӆ эвӑӆт 1974-мит оӆн Хулимсунт кәрта фельд­шер нє щирн рәпитты китсы. Хулимсунт вухаӆь ясӊеӆ эвӑӆт рўщ ясӑӊа-ки кєрӑтты, щит «мевтэӊ юхан». Щиты 1996-мит оӆ вәнты Мария Тихоновна ӆўв мирӆ хәйт-нєӊӑт па няв­рємӑт арсыр мәш вєрӑт мӑӆтуман вәс, вещката рәпитӑс.

Имуӆтыйн ма иньщмӑ­сєм ӆўвеӆ, муӆты ӆавӑртӑӊ муй щухӆасӑӊ вєрӑт, аӆ­па, ӆўв ай тохтура вәӆты рәпатаяӆн вәсӑт. Юхӆы пє­ӆы Мария Тихоновна лу­пӑс, мӑтты ки 1986-мит оӆн щимӑщ ӆавӑртӑӊ вєр рәпатайӆ хуща ищи­па ӆик­мӑс.

Ӆыв Хулимсунт кәртэӆ мухты, вантэ, газовой трасса ӆэщӑтсы. Щи тӑ­хетн ар рәпата вєрты хӑн­нєхуятӑт кўтн вәнт ху­ща и няврєм шӑӊкап ӆа­вӑртӑӊ мәшн юхӑтсы. Вәнт кәр­тэӆн рәпитты па газопро­вод ӆавăӆты хәйт-нєӊӑт нємасыя ӆыв пәӆьница хо­тэӆа айкеӆ рация хўватн китсӑт, хуты ай пухлэӊкие вевтам мәша вєра питӑс. Щи тӑӆн Хулимсунт кәр­тӑӊ фельдшерско-аку­шерской тӑхи хуща ай няврємӑт лекщитты тох­тур, щӑӆта акушер нє па вәс. Ӆын китумтак ай няв­рєм тӑйсӑӊӑн па щи пӑта газопровод трасса хуща вәӆты вәнт кәрта мӑнты ӑн кашащсӑӊӑн. Мария Тихоновна сора ӑктӑщӑс па тухӆăӊ хопн щив ищи кўрумн тәсы. Хән ӆўв щи няврєм хуща юхтӑс, уша павӑтсăӆэ, хуты ӆўв ӆа­вӑр­тӑӊ щирӑтн турӑх мә­шн юхӑтсы. Щӑӆ­та санавиация вертолёт рация хўват вохӑс, ӆәӆн щи мәшӑӊ няврєм Игрим вошӑӊ пәӆьница хота сора тәты па мәшӆаӆ тўӊматты. Щи киньща кимит хӑтӑӆн тухӆӑӊ хоп юхтӑс па ӆўв щи ай пухлэӊки лекщит­ты щи тәсӆэ. Ӛхӑт Мария Тихоновна кимит тухӆӑӊ хопн юхи Хулимсунт кәр­тӑӆа щи юхтӑс.

Мєт юхи хӑщум кўтн тӑм йисӑӊ-нәптӑӊ вухаӆь ими мӑнєма лупӑс, хуты ӆўв хуӆна Няксимволь кәртӑӊ ӑшкола-интернатн вәнӆтыйӆмаӆн сыр-сыр стихӑт хӑншты вўянтӑс. Тӑмхӑтӆ Мария Тихонов­на вухаӆь па рўщ ясӑӊӑн ӆўӊтарӑт тәса па шєӊк әм­ща ӆэщӑтӆ. Ин тӑта ӆўв мӑнєма «Перелётные птицы» нємуп стихӑӆ м­сыева ӆўӊӑтсӑӆэ:

Перелётные птицы на юг улетают,
Виднеясь в осенней дали сероватой.
На зимнее время они улетают,
Тепло забирая с собой.
Только  я не хочу улетать, 
Остаюсь на родимой земле.
Суждено мне навеки здесь жить
На богатой Югорской земле … 

Путӑр хӑншӑс: 
Владимир Енов