Шуши мирев культура - Культура обско-угорских народов

Вет щурӑс арат километра Сахалин пәхӑр эвӑт Ёмвош округ-Югра вәнты. Щи пәхӑр увӑс пєлӑкн Поронай нємуп юханӑн (Охотской щорӑса увӑ) Поронайск вош омӑс. Щӑта 15-кєм щурӑс хуят вә, щи мир кўтн нивхӑт — щит шуши мир. «Ма Поронайск вошн вәум. Хәум хӑт па хәум ат тыв йисум. Хәум тухӑң хопн мӑнсум. Мєт сыры поездӑн нивкєм щос областев вуаң воша мӑнсум. Ӛхӑт Южно-Сахалинск эвӑт Хабаровск вәнты и щос мутас йисум.

Тәнуп тыӑщ 21-мит хӑтӑн Ёмвошн «Торум Маа» тӑхийн мир «Тыӑщ поры» емӑңхӑт постӑты ӑктӑщсӑт. Тӑм емӑңхӑт нивӑмиткєм пўш щи постӑы.

«Лєпк» шуши мир община ёх тӑм о Россия президент грант ёша павӑтсӑт. Щит павӑтты ыв «Торум Маа» пурмӑсӑт вантӑты па шавиты тӑхийн па хӑнты па вухаь ясӑңңӑнӑн этты газетайңӑн нётсыйңӑн. 

Ас потты тыӑщн Ёмвошн КТЦ «Югра-Классик» нємуп хот йитн округ Союз писателят тӑхи 20-мит оа питум емӑңхӑт постӑсы. Щи кӑт хӑт мӑр 50 арсыр нєпекӑт хӑншты хӑннєхуятӑт Югра мўв эвӑт ияха юхтыйсӑт па ыв кўтэн мирхот вєрсӑт.

Г.С. Райшев хотн тәнуп тыӑщ 8-мит хӑтӑн «Легенда о Тонье» нємуп вантупсы пўншсы. Щӑта нух эхтум хурӑт Геннадий Степанович хӑнты моньщӑт посн хӑншӑс. Щитӑт ӛхӑт «Най Аңки» хӑрн «Тонья. В поисках легенды» нємуп кинайн вантӑты питыйт. Щи ут айкеӑт ӑкӑтты па кинайт вєрты нє Ольга Корниенко эщатӑс. ўв Вән па Ай Юхана яңхман шуши ёх эвӑт арсыр путрӑт хӑншӑс, щи ёх Тонья похатўр оӑңӑн ищи моньщӑт моньщсӑт.

Тәнԯуп тыԯӑщ яңмит хӑтӑԯн Ёмвошн А.В. Филипенко нємуп тӑԯ кӑсупсэт ԯэщӑтты хӑрн «Лыжня России – 2018» нємпи ԯўхӑң кӑсупсы мӑнӑс. Тӑта тәня о иты 500 муԯтас вошӑң мир кўтэԯн кӑсты вєритсӑт.

Щимӑщ нєм тӑюм етнхот Ас хӑты тыӑщ 13-митн Ёмвошн Краснопартизанской вош хулыйн вәты няврємӑт пӑты киникайт ўңӑтты хотн вәс. Щит щӑта рәпитты кӑтңӑн эщӑтсӑңӑн — Алла Иштимирова-Посохова па Надежда Постика.

Йис пурмӑсӑт ӑкӑтты щира яңхты вєр — щит мосты па нємасыя научной вєр. Вантэ, йис пурмӑсӑт ӑкӑтты па шавиман тӑйты кашӑң тӑхи катра пурмӑсӑт вантупсыя эщӑтӑ, ән кашӑң хӑннєхә щи пурмӑсӑт хўват арсыр мирӑт вәупсы оӑңӑн уша ат павтӑс.

Тәня III-мит Мўвтє художественной культура мирхотн ияха нєпекӑң ёх па вєртут вєрты мир ӑктӑщийсӑт. И хӑтӑн «Югра-Классик» хотн «Лицо Мастера» нємуп вантупсыйн вєртут вєрты ёх пурмӑс вєрсӑт па щитӑт мира вантӑсӑт. Щи ёх кўтн Раиса Рифкатовна Хусаинова вәс, ўв аканят ёнтты нє па «Историко-культурный центр «Старый Сургут» нємуп хот рәпатнек.

Тәня он ван хӑтуп тыӑщ сухӑнты артӑн Ёмвош ремёслайт хотн «Славим человека труда!» нємуп кӑсупсы мӑнӑс. Щи ут Уральской федеральной округ хўваттыйн РФ Президент єсум поступсы вўраңӑн вєрӑнты. 596-мит поступсыйн хӑншман, хәс вет миллион арат йиуп рәпата тӑхи пўншты нумӑс вә. Щит эщӑттыя «Славим человека труда!» нємуп кӑсупсы вєрты питсы, ән уша павӑтты, хуйтат мєт ям инженерӑт, пурмӑс вєрты ёх па па рәпатнекӑт.