Шуши мирев вәԯупсы - Жизнь хантыйского народа

Мосум мўвн ар оӆ вой-хўӆ веӆпӑсӆуман хӑрщи хӑнты ики Алек­сей Степанович Молданов имеӆ Анна Тимофеевна пиӆа вәсӊӑн.

Арсыр мўвӑтн йис пу­райт вўш эвӑӆт вєртутӑӊ хӑн­нєхуятӑт вәӆӆӑт. Ӆыв рәт миреӆ культура йис вєрӑт ӆавӑӆман тӑйӆӑт.

Ёмвош округевн ищи щимӑщ хуятӑт вәӆӆӑт. Мўӊ хӑнты па вухаӆь мирӊӑӆўв кўтн вєртутӑӊ ёх ар. Ма тӑм нєпекн Ирина Кузь­минична Фирсова оӆӑӊӑн хӑншты ӆӑӊхаӆум. Ӆўв Россия народной мастер нєм тӑйӆ па Ас нопӑтты тыӆӑщн сєма питум хӑтӆӑӆ вўш эвӑӆт 55 тӑӆа йис. 

Ас нопӑтты тыӆӑщ 3-мит хӑтӆӑн хӑнты ими Альбина Ильи­нична Дьякова (эви опращ нємӆ Юмина) 70 оӆа йис.

Ӆўв Сўмӑтвош рай­он Сўмӑтнюӆ кәр­тӑн 1950-мит оӆн сєма питӑс. Ӑӊкеӆ-ащеӆ – Ан­на Гри­горьевна па Илья Ни­ко­лаевич Юмин­ӊӑн – ­нивӆ няврєм єнмӑӆ­сӑ­ӊӑн. Ӑӊкеӆ ӆап­кайн пиркашека рәпи­тӑс, щӑӆта вой сух ӆэщӑтман вәс. Ӆўв колхосн ар оӆ мӑр рәпитӑс. 

Тӑмхӑтӆ ма хӑнты ики Алексей Михайлович Мол­данов шәӊӑт оӆӑӊӑн хӑнш­ты ӆӑӊхаӆум.

Мӑнум газетайн ма Саранпауль кәртӑӊ 80 оӆа вум сӑран имие Агафья Ивановна Хо­зяинова (Вокуева), ӆаӆь хӑрн ухӆ пунум ащеӆ Иван Трофимович па Вуӆаӊ ӆаӆь пӑта тарма рәпитум ӑӊкеӆ Павла Алексеевна Вокуевӊӑн оӆӑӊӑн нынӑна ай павӑтсум. Интӑм Агафья Ивановна вәӆупсэӆ па ӆавӑрт ӆаӆясты айӆат пурайӆ оӆӑӊӑн хӑншты ӆӑӊхаӆум.
 

Мўвевн Вуӆаӊ Отечественной ӆаӆь 1941-мит оӆн оӆӊитумн ар хә ёх ӆаӆясты мӑнсӑт. Ёмвош округ Касум мўв эвӑӆт Вўт­вош ай кәртые эвӑӆт ищи 20 муӆтас хӑн­нєхә ӆаӆя тәсыйт. Ӆыв хуӆыева вой-хўӆ веӆпӑсӆуман, вўӆы тӑйман йис шуши мир вәӆупсыйн вәсӑт. 
 

Николай Ивано­вич Терёшкин ван хӑтӆуп тыӆӑщ 25-митн 1913-мит оӆн Ёмвош районӑн сєма питӑс. Ӑшкола пийн Ёмвошӑӊ педучилище етшуптӑс. 1940-мит оӆн Ленинградн Увӑс мир институт ет­шуп­­тӑс. Ӆаӆя вўсы. Лыпӑт єнумты тыӆӑщ 22-митн 1941-мит оӆн младший лейтенант Терёшкин солтатӆўв пиӆа Ленинград вош вуракӑт эвӑӆт ӆав­ӆӑс. Немӑщ ясӑӊ ма тӑймаӆ пӑта раз­ведчика вәс. 1944-мит оӆн ӆавӑрта мәшмӑӆса, юхи китсы. Щи пийн айӆат ёх хӑнты ясӑӊа вәнӆтӑс, диссертация нєпек хоӆумтӑс, ки­ни­кайт хӑншӑс. Н.И. Терёшкин – оӆӑӊмит хӑнты мир учёной хә.

Илья Петрович Пух­­ленкин вәйт ӆор тыӆӑщ 2-митн 1914-мит оӆн Сәрханӆ район Сохали кәртӑн сєма питӑс. 1936-мит оӆн армияя вўсы. Ӆаӆь еӆпийн ми­лиционе­ра вәс. Васы мӑнты тыӆӑщ 4-митн 1941-мит оӆн ӆаӆя тәсы. Ас потты тыӆӑщ 10-митн Новосибирск вошн ди­визия ӆэщӑтсы, ӆўв пехотайн разведчика йис. Волоколамск вош ӆавӆӑс. Вәйт ӆор ты­ӆӑщ 6-митн 1942-мит оӆн вєра ӆавӑрта мәш­­мӑӆ­са, сємӆы пи­тӑс. Ас нопӑтты ты­ӆӑщ 27-митн 1943-мит оӆн юхи китсы.

Павел Фомич Сай­нахов 1916-мит оӆн Щекурья кәртӑн Сўмӑтвош уездӑн ву­хаӆь хоттєӆ ёх хуща сєма питӑс. Ӛхӑтшӑк хәя-воя вмаӆн нє тәс па семьяиӊа йис. Ӆўв ху­щеӆа хәӆум няврєм тӑм нуви тәрум иӆпия юхтӑс, щит Сергей вән пухӑӆ, Евдокия па Наталья эвеӊӑӆ. Тӑм хә иимеӆ няврємӆаӆ пи­ӆа атэӆт хӑщӑс, хән ӆўв ӆаӆясты мӑнӑс. Мосӆ луп­ты, хуты Павел Сай­нахов Сўмӑтвош райвоенкомӑтн вәщ тыӆӑщн 1941-мит оӆн Вуӆаӊ ӆаӆя вохсы. Тӑм хә Ленинградской фрон­тӑн ӆаӆясӑс па ар пєлӑк эвӑӆт немщӑтн лӑп вўюм Ленинград вош ӆавӑӆман вәс. Ас потты тыӆӑщ 1942-мит оӆн вухаӆь хә ӆаӆь хӑрн пӑратсы.

Иван Васильевич Ен­дырев Мули­кәр­тӑн (тӑм йисн Ок­тябрьской районӑн) хўӆ па вой веӆпӑсӆӑты хӑнты хот­тєӆ ёх хуща сєма питӑс. 
Ӆўв мєт оӆӑӊ Мули­кәртӑӊ ӑшколайн хӑнты няврємӑт вәнӆтуман вәс па рәпитӑс. Ӛхӑт ищи­­ты Вуӆаӊ ӆаӆя вох­­­сы. Ӆаӆь мєт оӆӑӊ хӑтӆ вўш эвӑӆт па иса сухнуптӑты оӆӑт вўш вәнта арсыр тӑхетн тарма ӆаӆясӑс.