Вўт кәртӑтн вәӆты па йис вєрӑт тәты шуши мир тўт хәрӑтты вєр пăта вухн нётты питӆыйт. Щи оӆӑӊӑн округ кәщайт шуши мир вәӆупсы оӆӑӊӑн поступсыя нух хӑншсы. 

Интӑм шуши мир нє­масыя тўт хәрӑтты щўӊк пиӆа хир па па мосты утӑт ӆәтӆӑт ки, юхӆы щи пӑта вух ёша хоӆумӆӑт.
Щи оӆӑӊӑн округ кә­щайт мирхотн уша йис. Югра мўвев губернатор хә Руслан Кухарук ясӊӑӆ щирн, щит вўт кәртӑӊ мир пӑта тўт хәрӑтты вєрн вән нётупсы.

- Интӑм тўт хәрӑтты вєр пӑта аршӑк мосты пур­мӑс ӆәтты рӑхӆ – щит вўт кәртӑн вәӆты мир пӑта вән нётупсы. Вантэ, юхи хӑщум хәӆум оӆ мӑр вәнт шушетн нивӆ тўт ёсупсы вәс, ар хот тўтн ёссы. Щирн тӑм ву­хӑӊ нётупсы – мосты вєр, –Югра мўвев кәща хәев лупӑс.

Округ вәӆупсы вант­ман тӑйты департамент кә­ща хә Кирилл Харитонов лупӑс, тўт хәрӑтты хирн вәӆты огнетушительн тәп тўтн ӆєвум турн хәрӑтты рӑхӆ, щи утн хотӑт муй вән пурмӑсӑт хәрӑтты ӆа­вӑрт. Ин кашӑӊ хӑннєхә вєритӑӆ тўт хәрӑтты пӑта арсыр мосты утӑт ӆәтты.
Кәртӑӊ муй вошӑӊ кә­щайт рәпитты хотн уша вєрты мосӆ, хән щи вухӑӊ нётупсы ёша вўты пăта вохты нєпек хӑншты мосӆ.  

www.admhmao.ru
айкеӆ хӑнты ясӑӊа тулмащтӑс: Людмила Гурьева