Йистєӆн шуши мир йис путрӑт тӑйсӑт, щит эвӑӆт уша йис, муй щирн Тәрум, Мўвев-Йиӊкев, Най-Вәртӑт, хӑннєхә па па утӑт тывсӑт. Сорни-Най оӆӑӊӑн йис путӑр кашӑӊ шуши хӑннєхә вәятӆ. Тӑм ванӑн «Сорни-Най» нємпи опера ар тывӑс. 

Муй щирн щит ты­вӑс, щи оӆӑӊӑн мў­ӊева Югра мўвев опера арӑт ариты нє Софья Алек­сеевна Шесталова пу­тӑртӑс:

- Щи оӆӑӊӑн мин икєм, вухаӆь мир оӆӑӊмит ком­позитор хә Владимир Иванович Шесталов пиӆа хўвн нәмӑссумн. 2012-мит оӆн ӆўв «Увӑс мўв ар сув» нємпи арӑӊ щўӊк дискӑӆ єсӆӑс. Щӑта Югра мўвев духовой оркестр ёх (дирижёр хә Антон Яковлев вәс) арсыр нарӑс хӑтн В.И. Шесталовн хӑншум ар сувӑт нарӑссӑт, щи тум­пи щӑта шуши мир на­рӑс х па хутӑӊ х сащ­сӑӊӑн. Ма юӆн щи диск тәса хәӆӑнтмємн роман Владимир икєма ястӑсум: «Володя, щи ар сувӆӑн шєӊк хурамӑӊӑт, щирн ариты ӆӑӊхаӆум. Тӑм ар сувӆӑн хўват опера ар хӑнш­ӆумн!» Ӆўв кашащӑс, тәп така лупӑс, щи опера ар тәп мӑнєма ариты мосӆ!

Софья Шесталова ясӊӑӆ щирн, щи оӆӑӊӑн айкеӆӑт ӑкӑтты хә Виктор Журав­лёв «Тюменские извес­тия» газетайн (23.11.2012-мит оӆ) хӑншӑс. Щи айкеӆ эвӑӆт С.А. Шесталова ӆў­ӊӑтӆ: 

- Владимир Иванович Шесталов лупӆ: «Ма – вухаӆь мир композитор хә, щирн шуши мир йис путӑр эвӑӆт опера ар хӑншты вўтщийӆӆум. Мо­сӑӊ, еӆӆы ма хӑншум сим­фонической ар сувӆам хўват «Сорни Най» нємпи опера ар тывӆ. Ин итәх арияйт имєм Софья Алек­сеевна вәнӆтӑӆ, ӆўв, ван­тэ, драматической сопра­но тўр сый тӑйӆ».

Софья Алексеевна лупӆ, «Сорни-Най» опера ар – щит Шесталов рәт и ну­мӑс эвӑӆт тывум ар. Мєт сыры вухаӆь мир писа­тель хә Юван Николаевич Шесталов 1976-мит оӆн «Сорни-Най хӑня» нєм­пи путрӑӆ хӑншсӑӆэ, 2005-мит оӆн Владимир Шес­талов, ӆўв пухӆ, вухаӆь мир оӆӑӊмит композитор хә, «Сорни-Най» сюита ар сувӆ хӑншсӑӆэ. 2013-мит оӆн В.И. Шесталовн хӑншум «Музыка и ми­фология Медвежьего праздника обских угров» киникайн Сорни-Най оӆӑ­ӊӑн ар хӑншман вәс, щит Софья Шесталова хӑншӑс. Щиты айӆтыева шуши мир йис путӑр эвӑӆт опера ар тывты питӑс.
2011-мит оӆн Юван Николаевич Шесталов ӑнтәма йис, ӛхӑт 2014-мит оӆн ӆўв пухӆ Владимир хўв пӑнта шәшмӑс, щирн щи рәпата вуӆыйс. Вантэ, опера ар хӑншты вєр – щит вән рәпата, щит, мӑтты ки, ар сув путӑр. 

- Опера ар – щит ипўӆяӊ нарӑсты, ариты па якты вән путӑр, щӑта ищи оӆӑӊмит путӑр, мєт вуӆаӊ вєр па сухӑнтты вєр вәӆӆяӆӑт, – Софья Шесталова лупӑс.

Тәп м арат оӆ пийн Софья Алексеевна опера ар еӆӆы хӑншты питсӑӆэ, щӑта Ю.Н. Шесталов ӆўӊ­тарӆаӆ вәӆӆӑт, щи тумпи Софья ищи хӑншӑс.
Ма С.А. Шесталова эвӑӆт иньщӑссум, муй оӆӑӊӑн «Сорни-Най» опера ар питӆ, юхӆы ӆўв лупӑс:

- Ма тәса щи оӆӑӊӑн нәмӑссум. Опера арн мєт сыры увертюра – щит муй оӆӑӊӑн путӑр. Щӑӆта оӆӑӊмит ар – щит Мўвев сєма питум вєр, кимит – Сорни-Най сєма питум вєр, хәӆмит – щит Куӆь Отыр Сорни-Най пиӆа тарӑнӆăӆ, нӆмит – щит Сорни-Най хӑня, ветмит – щит Сорни-Най оӆӑӊӑн тывум йис путӑр, хәтмит ар оӆӑӊӑн ин путӑртты ӑн питӆум, хӑняя тӑйты питӆєм. Вәщ тыӆӑщ 8-мит хӑтӆӑн опера ар хӑншты вєрєм сухнӑс.
Интӑм «Сорни-Най» опера ар ариты пурайн етнхот аӆьты вєр оӆӑӊӑн нәмӑсӆум. Щи вєрн мӑ­нєма «Хӑтӆ» нємпи хӑнты-вухаӆь мирӊӑн театр ар­тистӑт, «Ёмвош ёх» тӑхи ариты нєӊӑт па «Моньщ хот» ариты-якты няврємӑт нётӆӑт.

Тӑм опера 35-кєм ми­нута арат сащты питӆ.
Софья Шесталова ясӊӑӆ щирн, щи операйн арсыр европейской нарӑс хӑт эвӑӆт шуши мир нарӑс х, хутӑӊ па пеньщӑр сащ­ты питӆ. Мосӑӊ, еӆӆы щи опера ар вухаӆь ясӑӊа тул­мащтӑты нётӆы.
Софья Алексеевна Шес­талова – творческой хӑн­нєхә, щирн ин хуӆна ӑн лупӑс, хән ӆўв «Сорни-Най» опера ариты питӆ, тәп щи вєр тӑм оӆн тывӑӆ.
Мўӊ ӆўвеӆа ар м ясӊӑт лупӆўв, ӆәӆн тӑм мосты вєр ма ат тывӑс, ар хуят «Сорни-Най» опера ат хәӆӑнтсӑт!     

Путӑр хӑншӑс: 
Людмила Гурьева