Йис пурмӑсӑт шавиты «Торум Маа» тӑхийн литературной вәйтантупсы вәс, хута монь­щӑт па путрӑт хӑншум вухаӆь ими Анна Мит­рофановна Конькова оӆӑӊӑн путӑртсы. Ӆўв вәщ тыӆӑщ 28-мит хӑтӆӑн ӆәӆн 110 тӑӆа йис.

Анна Митрофановна Евра юхан хонӑӊӑн ай вухаӆь кәртӑн сєма питӑс. «Евра – ма сӑмєм хущи!» – лупиӆӑс ӆўв. Кәртӑӊ хуятӑт нәмӑӆ­мийӆсӑт, Хән Нюра эвие сєма питӑс, кәрт нўмпийн вот хўв пуӆӑс. 
Эвие Акулина Дани­ловна – Околь щащеӆ путрӑт хәӆӑнтман єнмӑс. 

- Околь щащєм хәӆӑнтӆўв … нємӑӆт сый ӑн сащӆ. Ӆўв вухаӆят оӆӑӊӑн путӑртӑӆ, мўӊ пӑӆӆўв ясӊӑӆ вәтшӑты, – нәмӑӆмиӆӑс Анна Митро­фановна.

Щиты Аня ай эвие мў­вев-йиӊкев хәӆӑнтты вәнӆ­тыӆӑс. Увӑс мир культура хущи, ясӑӊ – щит ӑнтә тәп сый, щит пӑнт, мӑта ут сӑмн иса кєши хӑщӆ. Ясӑӊ па путрӑт мухты йис нє­мӑт нумӑсн хӑщӆӑт, мир вәӆупсы оӆӑӊӑн уша вєрӆўв. 
Вәӆупсэӆ кєн ӑнтәм вәс. Аня ӆапӑт тӑӆ вўш эвӑӆт па няврємӑт вантман тӑйс, Вася апщеӆ пиӆа омсӑс. Щи пура вўш эвӑӆт ӆўв айкємн моньщӑт па путрӑт путӑртты вәнӆтыӆӑс. 
Хән Аня 14 тӑӆа йис, Ев­ра ай кәртӑн ӑшкола пўншсы. Ӆўв вәнӆтыйӆты пи­тӑс па уша вєрсӑӆэ, путрӑт ӑнтә тәп путӑртты, нух хӑншты ищи рӑхӆ.

1933-мит оӆн Остяко-­Вогульской педагоги­ческой училищая вәнӆ­тыйӆты мӑнӑс. Щи пийн ӆўв Иван Косполов икеӆ пиӆа Пыжьян мӑӆӑӊ пўӊӑӆн вәнт кәрта рәпитты мӑнӑс. Ӆўв юрнӑт пиӆа вәӆман ӆыв ясӊеӆа вәнӆтыӆӑс.
Ӆаӆь тывӑс па икеӆ Ле­нинградской фронтӑн хуӆт пєӆы тәсы. Ӆўв няврємӆаӆ пиӆа атэӆт хӑщӑс, Ёмвоша кєрӆӑс па оӆӑӊмит ӑш­колайн рәпитты питӑс. Анна Митрофановна 34 оӆ ӑшколайн рәпитӑс. 

- Хән пенсияя рўтьщӑты мӑнсум, путрӑт хӑншты питсум, – путӑртыӆӑс ӆўв. 

Хӑншум путӑрӆаӆ округ газетайн єтты питсӑт. Мєт оӆӑӊ «Васька» путрӑӆ па «Ко­лыбельные вечерины» моньщӑӆ 1976-мит оӆн єт­сӑӊӑн. 1981-мит оӆн «Огонь-камень» моньщӑӊ киникайӆ єтӑс. 1982-мит оӆн «И лун медлительных поток» нєпекӆ єсӑӆсы. 1985-мит оӆн «Сказки бабушки Аннэ», мӑта ки­ни­кайӆ арсыр ясӊӑта тулмащтӑсы. 

Сўс пурайн ӆўв ванкўт­ӆы вәнта ӊхӑс, айӆтыева щӑта шәшиӆӑс, тови пура вәнты вәнт пиӆа па м вәӆум вєрӑс. Вухаӆь мир поэт хә Андрей Тарханов щи пӑта «Прощание» нємпи арӑӊ путӑр хӑншӑс. 
Тӑмхӑтӆ Анна Митро­фановна Конькова мирн нәмӆы, ӆўв хӑншум моньщ­ӆаӆ ӆўӊӑтӆыйт. Щи монь­щӑт хўват вәнӆтӑты хуятӑт няврємӑт пиӆа сыр-сыр ванӆтупсэт па етнхотӑт вєрӆӑт.

Ёмвошӑӊ няврємӑт вәнӆтӑты этнокультурно-образовательной тӑхийн рәпитты нє Ольга Норова хиӆнєӊӑӆ пиӆа тӑм вәй­тантупсы пурайн Анна Конькова хӑншум моньщ ӆўӊӑтсӑӊӑн. Ӆўв путӑртӑӆ:

- Щит м, нявлӑк моньщӑт, ӆыв няврємӑт вәнӆтӑӆӑт вантты, хута м вєрӑт, хута атум вєрӑт вәӆӆӑт. 

Анна Митрофановна мўӊева хӑншум моньщ­ӆаӆ, путӑрӆаӆ хӑйс, мўӊ ӆўв оӆӊӑӆн иса нәмты питӆўв.    

Путӑр хӑншӑс: Надежда Вах