Йис Югра мўвевн Юсюм ай эвие вәс. Ӑӊкеӆ-ащеӆ эвиян шєӊк сӑмӑӊа тӑйсӑӆӊ, щирн нюки хот эвӑӆт хўва ӊхты ӑн єсӑӆсӑӆӊ. И пўш ащеӆ воша ӊхӑс па щӑта эвеӆа арсыр оӆьпӑӊ хӑншты х па альбом нєпек ӆәтӑс. Юсюм ар щос юӆн омӑсман хурамӑӊ юха­нӑт па мӑӆӊӑт, войт – ню­хӑс, сос, ущхўӆь тухӆӑӊ войт, хӑт – нюлхӑт па нохӑр хӑт хăншăс. Щитӑт ӆўв әмӑщӆуман вантӑс, хән ащеӆн итәх пурайн пӑнӑн веӆпӑса тәтьӆясы. И пўш ӆўв хурасӑӊ эви хӑншӑс па Ворнэ нємн мӑсӆэ. Ӆўв нємӆ вухаӆь ясӑӊ эвӑӆт тулмащтӑты ки, щит «Вәнт нє».

Ӆўв ӑӊкеӆ хот рәпата вєрӑс, ащеӆ вәнтыты ӊ­хиӆӑс, ӆәӆн щемьяеӆ ӆа­пӑтты. Ванкўтӆы эви юӆн атэӆт хӑщиӆӑс, Ворнэ пи­ӆа путӑртӑс, ӆўвеӆа вўт кәртӑӆ оӆӑӊӑн моньщӑт моньщӑс.

И пўш Юсюм аӆӑӊ пу­райн нух киӆӑс, ӑӊкеӆ-ащеӆ хуӆна уӆсӑӊӑн. Ӆўв Ворнэӊа вушийӆ, хуты нюки хот пўӊӑӆн еша шә­шийӆ, сора нирӊӑӆ ват­тємӑс, сӑхӆ ӆәмӑтсӑӆэ па ким єтӑс. Тӑӆ пура вәс. Вўт кәрт хўват хәхӑӆман ӆўв кирум вўӆэт шиваӆӑс. Ӑн нәмӑсман әхӆа омсӑс па екрӑт хўват нуви ӆоньщ, хурамӑӊ кӑрӑщ хәӆ па нохӑр хӑт пєӆы вантман мӑнӑс. Роман тәрмаӆ так вотаса кєрӆӑс. Так вотасн Юсюм әхӑӆ пиӆа ӆӑрӊăӆ­ты питсы.

Роман шитама йис. Юсюм әхӑӆ эвӑӆт нявлӑк ӆоньщ пая иӆ питӑс. Му­хӑӆая ӑӊкӑрмӑс, тәп вәнт па ӆоньщ, вўт кәрт вәнты ӛш ӑнтәм. Шитам.

– Ай-е! Ай-е! Щикєм пӑӆтап!

Эвие ёш пӑтэӊӑӆ вєн­шӑӆа пунсӑӆэ па хоӆӆӑты питӑс. Тәп еша вәс вуӆымаӆ, сємӊӑӆ пўншсӑӆэ па ӆўв еӆпеӆн хурасӑӊ нєӊие шиваӆӑс, ӆўв Юсюм эвие ух пӑты вощхийсӑӆэ.

– Нӑӊ хуй? – хоӆӆуман Юсюм ӆўвеӆ иньщӑссӑӆэ.
– Ма – Ворнэ! Нӑӊ муй мӑнєм уша ӑн вєрсэн? – хурасӑӊ нє иньщӑсӑс.

Тәп веӆьщи Юсюм мут­шӑсӆэ, щит ӆўв хӑншум хурасӑӊ нєӊиеӆ.

Ворнэ эвие лупӑс, щит пирӑщ щăртӑӊ хәйн мўӆтсы, ӑӊкеӆ-ащеӆ ӑн хәӆӑнтмаӆ пӑта эвие рәт вўт кәртэӆ эвӑӆт хўваншӑка питӑс.

– Ин ма тӑта ищкийн потӆыюм!? – йиӆпа эви хоӆӆупа йис.
– Ма пиӆєма ва! – Ворнэ вохсӑӆэ па эви пӑнӑн вўсӆэ.

Ӆын хўв мӑр тӑӆ вәнт хўват шәшсӑӊӑн, Юсюм әмщӑсӑс, муйсӑр хурамӑӊ тӑхийн вәӆ.

Ворнэ хуща нюхсӑт, сосӑт, ӆаӊкет, ёхум нюхсӑт, ӆошекӑт ванамӑсӑт. Ӆўв нўмпеӆн лўкӑт, ӆәнтӑт, кўркӑт, васэт ӆӑрисӑт. Ӆўв кашӑӊ воя муй тухӆӑӊ воя м, тӛпӑӊ ясӑӊ лупӑс, воньщуп эвӑӆт єпӆӑӊ ӆєтутн ӆапӑтсӑӆэ.

Щиты айӆтыева Юсюм кял-келе (вухаӆь ясӑӊ эвӑӆт щит ай хот) ов хопа юхтӑс, имухты хошма йис. Щухал пўӊӑӆн хош­мӑӆтыӆӑс, хўӆӑӊ ӆант ӆєс па иӆ вўюмсы. 
Нух вєрӆумаӆн шива­ӆӑс, Ворнє тунты ӆара­щӑӆн муӆты кӑншӑс.

– Та, катӆэ!– Ворнэ лупӑс па тунты ӆаращ эвӑӆт сорни хӑншӑӊ сӑх вўс.
– Щикєм хурамӑӊ сӑх! – Юсюм амтӑӊа ўвтӑс.
– Тӑм хошум сӑхн нӑӊ ищкийн ӑн потӆайн!
– Щит-т-т мӑнєм-м-ма? – Ворнэ эвӑӆт эвие иньщӑсӑс.
– Па муй, щит нӑӊена. Ӆәмтэ! Ин нӑӊена юхи мӑнты мосӆ. Тәп хәӆӑнта, муй ма нӑӊена лупӆум!
Мўӊ вәнтэв ӆавӑӆман тӑе! Войт, тухӆӑӊ войт аӆ шәката! Нӑӊ йис па ву­ӆаӊ Югра мўвн сєма питсӑн! Щит нӑӊ рәт мўвен! Щи оӆӑӊӑн иса пурайн нәм­ман вәӆа! 

Юсюм ким єтӑс па кирум вўӆєӊ әхӑӆ шиваӆӑс. Ӆўв әхӆа омсумтӑс па имухты нюки хотӆа юхтӑс. Ӆўв нә­мӑсӑс, хуты ӆўв ӑӊкеӆн-ащеӆн ӆавӑӆӆы. Тәп нюки хота ӆуӊмаӆн шиваӆӑс, ӆын хуӆна уӆӆӑӊӑн.

Юсюм альбом нєпекӆ пўншсӑӆэ, Ворнэ пєӆы ванттыйн нх мулӑӊа йис па айӆтыева лупӑс:

– Пәмащипа!

Щӑӆта ӆўв сора ӆә­мӑтсухӆаӆ єӊхсӑӆэ па хошум уӆты нурӑӆа уӆӑс, ванӑн Ворнэӊӑн мойӆум сӑхӆ пунсӑӆэ. 

Алёна Чепчуренко, «Увӑс тәрум тўт» тӑхийн вәнӆтыйӆты эви, Мегион вош
Хӑнты ясӑӊа тулмащтӑс: Людмила Гурьева