Хӑнты ими Зинаида Иосифовна Рандымова Ямал мўвн Пуӆӊа­вӑт вошн вәӆ. Ӆўв хӑнты ясӊуп словарят па няврємӑт хӑнты ясӑӊа вәнӆтӑты пӑта киникайт хӑншӑс.

Тӑм ими Ямал мўвн сєма питӑс па єн­мӑс. Ащеӆ – Иосиф Пав­лович Сязи – вўӆы ӆа­вӑӆты хәя вәс. Ӑӊкеӆ Собь кәртӑн єнмӑс, рәтӆаӆ хўӆ веӆпӑсӆуман вәсӑт. Хо­тэӆн хәӆум няврєм єн­мӑс, Зинаида вән эвия вәс. Ӑӊкеӆ-ащеӆ вўӆы ӆавӑӆман вәсӊӑн. Ӆўв ин вәнты ма нәмӆӑӆэ щать­щащеӆ ясӊӑт, ӆўв пу­тӑртӑс, хутыса вўӆы әхӑӆн Пуӆӊавӑт вош эвӑӆт Омск вош вәнты мӑӊ­хӑтӆа ӊхӑс.

Зинаида Иосифовна Катравош кәртӑн ӑшко­лайн вәнӆтыӆӑс, щи пийн Пуӆӊавӑт вошн педучилища етшуптӑс. Щӑӆта Санкт-Петербург воша А.И. Герцен нєм­пи государственной пе­дагогической уни­вер­ситета еӆӆы вәнӆ­тыйӆты мӑнӑс, рўщ ясӑӊа па ли­тературая вәнӆтӑты нєӊа йис. Ӆўв вуӆаӊ нєпек ёша павтӑс па Ёмвоша «Институт повышения квалификации» тӑхия рәпитты китсы. 

Ӆўв ясӑӊӆаӆ щирн, рәпитты шєӊк ӆавӑрт вәс. Щи пурайн нємӑӆт программа, киника ӑн­тәм вәс. Ӆўв няврємӑт хӑнты па вухаӆь ясӑӊа вәнӆтӑты пӑта мосты нє­пекӑт хӑншӑс. Зинаида Иосифовна Ёмвош округ хўваттыйн ӑшколайт хў­ват ӊхӑс.

- Ма иса районӑт хў­ват ӊхсум. Хуӆыева ӑш­колаятн, хута няврємӑт рәт ясӑӊа вәнӆтӑсыйт, ма вәсум. Щит Касум, Тэк, Мосум мўв, Угут, Аган па па кәртӑт. Сыры урокӑтн няврємӑт вәнӆтӑты ёх рәт ясӑӊӑн путӑртсӑт. Русскинской па Угут кәртӊӑн хущи мӑнєма шєӊк әмӑщ вәс. Щӑта хуӆыева няврємӑт хӑнты щирн путӑртсӑт. Интӑм няврємӑт рўщ ясӑӊӑн путӑртӆӑт, – ӆўв лупӑс.

Зинаида Рандымова Ёмвошн няврємӑт рәт ясӑӊа вәнӆтӑты ёх пӑта вәнӆтӑты хӑрӑт ӆэщӑтӑс. Округ кәртӑт эвӑӆт няв­рємӑт вәнӆтӑты ёх иха ӑктӑщийӆсӑт па рәпатаеӆ пєӆы еӆӆы вәнӆтыйӆсӑт. Ин вәнты Зинаида Иоси­фовна юӆн щи пурайн вєрум хурӑт пєӆы вантӑӆ па щи пура оӆӑӊӑн нәмӑӆмӑӆ. Ӆўв кимит шәп оӆ Ёмвошн вәс па рәпитӑс, щи пийн Ямал мўва кєрӆӑс. Ӆўв лупӑс:

- Ма Ёмвошн вәӆты хотн ӑн мӑсыюм, щирн, аӆпа, рәт мўвєма кєрӆӑсум. Мӑнєма рәт ёхӆам такӆы вәӆты ӆавӑрт вәс, ӆыв такӆэӆа мӑрєм вәс. Щи тумпи вўӆы нюхи па ӆыӆӑӊ хўӆ такӆы шєӊк мӑрємӑсыюм. 

Щиты Зинаида Ранды­мова Ямал мўва юхтӑс па Пуӆӊавӑт вошн «Инс­титут повышения ква­лификации» тӑхия рәпит­ты вўсы. Ешавәс вәӆты хотн мӑсы. Щи пурайн Зи­наида Иосифовна хӑнты ясӊев ӆєрамтты ну­мӑсн юхӑтсы. 

Ӆўв Томс­кой госу­дарст­венной университета аспиран­турайн вәнӆ­тыйӆты пи­тӑс. Ӆўв вўӆы ӆавӑӆты вєр оӆӑӊӑн нау­ка щирн хӑн­шӑс, еӆӆы «Оленеводчес­кая культу­ра приуральс­ких хантов» киника ӆэщӑ­тӑс.

- Ма Ленинград вошн вәнӆтыйӆмємн словарь киникайт хӑншсум. Тӑта ма няврємӑт хӑнты ясӑӊа вәнӆтӑты пӑта киникайт вєрсум. Щӑӆта «Словарь диалектов приуральских хантов» киника хӑншсум. Тӑм ванӑн ӆорвош хӑнтэт путрупсыйн словарь әх­тыйн рәпитсум. Щи тумпи Евдокия Андреевна Нё­мысова пиӆа касум хӑнтэт путрупсыйн 4-мит классӑн вәнӆтыйӆты няврємӑт пӑта киника хӑншсумн, – лупӑс Зинаида Иосифовна.

Ӆўв нӆхущъяӊ оӆ мӑр научной центр хущи рәпитӑс. Ӆўв хӑншум киникайӆаӆ хўват ин вән­ты Ямал мўв ӑшколаятн няврємӑт вәнӆтӑӆыйт.

Мосӆ лупты, 1984-мит оӆн Ёмвошн вәӆман Зи­наида Иосифовна икеӆ пиӆа вәтаӊа йис, щит Ка­сум мўвн єнмум хӑнты хә Виктор Николаевич Рандымов. Пиӆӊӑн кӑт няврєм єнмӑӆсӑӊӑн – Павел па Марина. Ин ӆын семьяяӊа йисӊӑн, рәпитӆӑӊӑн.

- Интӑм мин кӑт хиӆнє тӑйӆумн. Икєм пиӆа хӑн­ты щирн путӑртӆумн. Ӆўв упиӆаӆ Ульяна Николаев­на па Евдокия Николаев­на хӑнты ясӑӊӑн арăт ари­сӑӊӑн, ӆын хӑнты мир йис арӑт, моньщӑт, путрӑт ма вәйтсӑӊӑн, – лупӑс Зинаида Рандымова.

Мўӊ, «Хӑнты ясӑӊ» га­зетайн хӑншты ёх, Зинаи­да Иосифовная па ӆўв хотӑӊ ёхӆаӆа м вўща ясӑӊ лупӆўв! Тӑӆаӊа, уяӊа-пищӑӊа, ма вәӆаты!

Путӑр хӑншӑс: 
Надежда Рагимова