Ёмвошн лыпӑт хойты тыӆӑщ 8-мит хӑтӑӆн Ас-угорской институтн киника ӆўӊӑтты хотн хӑнты па вухаӆь хуятӑт рәт ясӑӊӑн диктант хӑншты ӑктӑщийӆсӑт.

Тӑм хӑтӆ Россия Пре­зидент Владимир Путин ёш посн Расул Гам­затов шә­ӊӑт сєма пи­тум хӑтӆ па­мятной хӑтӆа вєрса.
Расул Гамзатов авар­ской па рўщ ясӑӊӑн нум­сӑӊ нєпекӑт хӑншум хуята вәс. Тӑм хӑтӆ постӑса, ӆәӆн Россия мўв ӆуваттыйн вәӆты ар мир ӆыв рәт ясӑӊ­ӆаӆ аӆ юрємӑсӆаӆ, ӆа­вӑӆман ат тӑйсӑӆӆаӆ па еӆӆы єнумты ай ёха щит ат хӑ­щуптӑсăт.

РАН Институт языка хӑнш­ты хўватн мўӊ Россия мў­вевн 193 арсыр ясӑӊ тӑйты мир вәӆ па 295 ясӑӊ щирн путӑртӆӑт. Мўӊ округевн 2020-мит оӆн перепись населения щирн 139 ар­сыр ясӊуп мир вәӆ.

«Югра мўв мирӑт хот» тӑхийн рәпитты  нє Ольга Князева ястӑс: 

- Мўӊ округевн 71 тӑ­хийн мир рўщ ясӑӊӑн диктант хӑншты щира ӑк­тӑщийӆсӑт, щит округев хўват кашӑӊ ӑшколайн, киника ӆўӊӑтты хотн па па тӑхетн. Мўӊ нумӑс вєрсўв диктант путӑр хӑн­ты па маньщи ясӑӊӊăна тул­мащтӑты. Щит вўраӊӑн щи ут Ёмвошн кӑт тӑхийн хӑншсўв: Ас-угорской институтн па Югорской университетн. Па оӆӑтн ӆӑӊхаӆўв хӑнты ясӑӊӑн дик­тант аудио файла хӑншты, ӆәӆн округевн хӑнты па маньщи мир ищи рәт ясӊеӆн диктант ат хӑншсӑт.

Тӑм пўш диктант – щит «Россия – Дом народов» Расул Гамзатов хӑншум нумсӑӊ нєпекӆаӆ эӆты вўюм путӑр шәпăт. Ин тӑм хӑтӆ Ас-угорской институ­та хӑнты па маньщи ясӑӊ вәйтты ёх юхӑтсӑт, финно-угорской хӑншты ёх VI-мит вән мирхота юхтум хуя­тăт па диктант хӑншсӑт.
Щи путӑр филологи­ческой наукайт кандидат нє, газетаев редактор хуят Людмила Гурьева хӑнты ясӑӊа тулмащтӑс па юхтум мир пӑта ӆўӊтӑс.
Маньщи ясӑӊа щи путӑр вухаӆь газета от­ветственный секретарь Свет­лана Ромбандеева тул­мащтӑс. Галина Кон­дина, «Луима сэрипос» газета кәща ӆӑӊкӑр нє, щи диктант ӆўӊтӑс. 

Еӆӆы хӑншум диктант путӑр ӆўӊтаты: 

- Ма рәт ясӊєм! Нӑӊ ма тащєм, арсыр мәшӑт эвӑӆт пуртәнєм. Ма сӑмємн ар ар, ма тўрсый тӑйӆум. Щи турсым – щит нӑӊ, ма рәт ясӊєм. Нӑӊ ма ёшєм вўйман ай пух иты мӑнєм вән вәӆупсыя, хӑннєхуятӑта тәтьӆясӑн, па ма ӆывеӆа рәт мўвєм оӆӑӊӑн путӑртӆум. Нӑӊ мӑнєм вән хӑннєхәя ва­намăсэн, ӆўв нємӆ – вуӆаӊ рўщ ясӑӊ. Ӆўв ищи ма пӑтєма рәта йис, ӆўв па ёшєм вўйман арсыр па хон пєлӑк мўвӑта тәтьӆясӆэ. Ма мирєм, кашӑӊ ма киникам кӑт ӑӊки тӑйӆ. Оӆӑӊмит ӑӊки – рәт мўв. Тӑта ма сєма питсум, тӑ­та ма веӆщи рәт ясӊєм хәӆсум, вәнӆтыйӆсум, па ӆўв ӆыпєма па вўрєма ӆуӊӑс. Тӑта ма оӆӑӊмит пўш рәт арӆам хәӆсум па оӆӑӊ ар арисум. Тӑта ма веӆщи йиӊк па нянь єпӑӆ вәйт­сум. Муйкєм арат пӑсты кев хўват хәӊхийӆсум па мәшмӑӆсыюм, тәп рәт мўвєм йиӊкӑн па турнӑн нюӆумӆам мӑӆтсыйт. Кимит ӑӊкєм – вуӆаӊ Рос­сия мўв. Ӆўв мӑнєм єн­мӑӆсăӆэ, вутӑӊ ӛша тәс­ӆэ, мўвев тәрум кӑтн-кўт ванӆтӑс, иса мўв ванӆтӑс. Кӑт ӑӊ­ки – щит кӑт тухӑӆ иты, ёш­ӊӑӆам иты, сєм­ӊӑӆам иты, кăт ар иты. Ӑӊки­ӆамн ухєм вощхийӆсы па мосты пу­райн пӑӆӊӑӆам катӑӆсӑӊăн. Ма пух иты ӑӊ­киӊӑӆам еӆпийн арная вәӆӆум.

Путӑр хӑншӑс: 
Наталья Краснопеева