Сўмӑтвош район Игрим вошн «Тружени­ки Отечества» нємпи тӑхи рәпитӆ. Щив хә хуятӑт па тәса ёнтӑсты, тыйты нєӊӑт ӊх­ӆӑт. Ӆыв тӑм йис ӆаӆьн вуракӑт эвӑӆт хӑнятыйӆ­ты пӑта хоӆупӑт тыйӆӑт. 

Щи тӑхия ӊхты нє Наталия Голина лупӑс:

- Мўӊ тӑхев 2023-мит оӆ ван хӑтӆуп тыӆӑщ 16-мит хӑтӆ вўш эвӑӆт рәпитӆ. Мєт оӆӑӊ пўш пирӑщ хуятӑт ӑк­тӑщсӑт. «Труженики Оте­чества» тӑхи Галина Ива­новна Сорокина па Галина Петровна Кочен­ко пўншсӑӊӑн. Ӆын Игрим сообществайн щи оӆӑ­ӊӑн хӑншсӑӊӑн. Ӛхӑтшӑк ӆын хущана хӑннєхуятӑт юхӑтты питсӑт па ӆыв иха ӆаӆя мӑнум хәята нётты вўянтсӑт. 

Галина Ивановна сыры хўӆ веӆпӑсӆӑты ёх пиӆа тўтӑӊ хопн рәпитӑс. Щирн оӆӊӑӆн иса хоӆупӑт хўӆ веӆпӑсӆӑты ёхн тыйсыйт. Оӆӑӊмит хоӆупӑт арсыр сухӑт эвӑӆт вєрсыйт. Юхтум мир щи сухӑт ёшн эвӑтсӑт. Щӑӆта мўӊ нємасыя утӑт вєрсўв, интӑм щи утн сух эвӑтӆўв. Ин спанбонд сух эвӑӆт хоӆупӑт вєрӆўв. 

Оӆӊӑӆн мўӊ мәшӑӊ ёх тӑхийн хот йитн щи вєр пӑта мӑсыюв. Щит шєӊк ай хот йит вәс, имухты ар хуят щӑта рәпитты щир ӑнтәм вәс. Ӛхӑтшӑк мўӊ Преображения Гос­подня мӑӊ хотн хот йитн мӑсыюв. Интӑм мўӊ ху­щева аршӑк хуят ӊхӑӆ. 

Мўӊ Игрим вошевн оӆӑӊмит ӑшколайн па Гавриил Собянин нємпи ӑшколайн хоӆуп тыйты щўӊкӊӑн омӑссўв. Щирн интӑм щи ӑшколайӊӑнӑн па тӑта мўӊ аршӑк хоӆуп тыйӆўв. Няврємӑт исто­рияя вәнӆтӑты нє Нелли Леонидовна Шишкина ун­тасн интӑм няврємӑт па ӆыв ӑӊкиӆаӆ-ащиӆаӆ хоӆупӑт тыйты юхӑтӆӑт. 

Николай Николаевич Сорокин иса пурайн мў­ӊева нётӆ, вєрум хоӆупӑт па мирн ӑктум нётупсы тәтьӆяӆ. Мўӊ вошев депу­тат Вадим Александро­вич Прокопьев юхи хӑщум пурайн ищи тыв юхӑтӆ па нётӆ.

- Наталия Владимировна, муй арат хоӆуп нын вєр­сӑты?

- Мўӊ иса нєпека хӑнш­ӆўв, муй арат хоӆуп тый­сўв. Вәщ тыӆӑщ 28-мит хӑт­ӆӑн кӑт хоӆуп вєрсўв – щит 1110-мит па 1111-мит. Оӆ­ӊӑӆн Галина Ивановна па нєӊӑт пиӆа интернетн вантсӑт, хутыса хоӆуп тый­ты мосӆ. Щитӑт арсыра вєрты рӑхӆ. Ӆаӆьн вәӆты ёх ясӑӊӆаӆ щирн, мўӊ м па так хоӆупӑт вєрӆўв. 

- Тӑм йис ӆаӆя мӑнум ёх пиӆа нын путӑртӆӑты?

- Мўӊ ӆыв пиӆэӆа пу­тӑртӆўв па уша вєрӆўв, муй ӆывеӆа шєӊк мосӆ. Мўӊ кашӑӊ хоӆупа пищ­ма хӑншӆўв, хуты щит Сўмӑтвош район Игрим вошн вєрсы. Щи тумпи мўӊ ӆєтутӑт па па арсыр мосты пурмӑсӑт ӑкӑтӆўв па Курской областя кит­ӆўв. Игрим вошн па Ӆэв вошн вәӆты мир мў­ӊева вухн нётӆӑт, щи вухн мосты пурмӑсӑт ӆәт­ӆўв. Ӆаӆь эвӑӆт хәйт мў­ӊева пәмащипа ясӊӑт пищмайтӑн хӑншӆӑт, щи пищмайт мўӊ шавиман тӑйӆӑӆўв, хән ӆыв юхи рўтьщӑты юхӑтӆӑт, мўӊ иха хурӑт вєрӆўв. Щи хурӑт ищи тӑта тӑйӆӑӆўв. И хә мўӊева вот вой сух мойӆӑс, и хә шеврон мӑс. 

Пәп ики щи хоӆупӑт мӑӊ йиӊкӑн рывийӆ, ӆәӆн иса хәйт Тәрум ащийн ӆа­вӑӆман ат тӑйӆыйт. Мєт әмӑщ вәс, тӑм оӆ имет мӑӊхӑтӆа ӆаӆьн вәӆты хәйт мўӊева кашӑӊ имия хурамӑӊ ухшам китсӑт. Мўӊ вән пәмащипа ясӊӑт ӆывеӆа лупсўв. 

Интӑм мўӊ аршӑк хо­ӆуп вєрты па ӆывеӆа кит­ты ӆӑӊхаӆўв, ӆыв ясӑӊ­ӆаӆ щирн, хоӆупӑт ӆы­веӆа шєӊк мосӆӑт. Мўӊ вә­ӆэв, кашӑӊ хоӆуп мўӊ няв­рєм­ӆўв, пухӆўв, хә хуятӆўв вә­ӆупсы ӆавӑӆты пӑта вєрӆўв. 

Мўӊ Нх воша па Сў­мӑтвоша ӊхсўв па щӑта волонтёрской группай­ӊӑн хӑннєхуятӑт пиӆа вәй­тантыйӆсўв. Мўӊ и вєр тәӆўв, кўтэвн ӆәхсӑӊа вәӆ­ӆўв.
«ВКонтакте» хуща мўӊ «Труженики Отечества» нємпи сообщества тӑй­ӆўв, щив 600-кєм хӑннєхә хӑншаньщман вәӆ. Мўӊ военно-патриотической арӑт мӑӊхӑтӆа ӊхӆўв, ӆаӆь пура оӆӑӊӑн арӑт ариӆўв, ишӑк нєпекӑн мӑсыюв.

- Нын муй ӆуват хоӆупӑт тыйӆӑты?

- И хоӆуп вўтатӆ хәӆум мєтра па хўватӆ хәт мєтра вәӆ. Сыры па нивӆ мєтра па кӑтхущъяӊ мєтра хў­ваттыйн хоӆупӑт па тыйсўв – щит вән тўтӑӊ хопӑт лӑп лаӊкты пӑта. Интӑм ӆўӊ пурайн мўӊ вусты хоӆу­пӑт вєрӆўв.

Мўӊ, «Хӑнты ясӑӊ» па «Луима сэрипос» га­зе­тайӊӑӆўвн рәпитты ёх, вән пәмащипа ясӊӑт лупӆўв «Труженики Оте­чества» тӑхи хуятӑта па иса мира, хуйтат ӆаӆьн мўӊ мўвев ӆавӑӆты хәята нётӆӑт. Тӑӆаӊа, ма вәӆаты, щи ӆавӑрт пура сорашӑк ат сухнӑӆ.

Светлана Ромбандеева хӑншум путӑр 
хӑнты ясӑӊа тулмащтӑс: Надежда Рагимова