Михаил Сергеевич Кечимов айтєӆн вәнт кәртӑн вәс, пасыр вәӆупсыя ӑн па питыӆӑс. Ӆўв кәртӑӆ Татьягун юхан хонӑӊӑн вәӆ. Щит Русскинской вош эвӑӆт еша увӑс пєӆа вәӆ. Тӑта ӆўв вўӆы тӑйӆ, вой-хўӆ веӆпӑсӆуман вәӆ, нюр щатьщащиӆаӆ вәӆум щира вәӆ. 

Михаил Елена имел пиӆа вет няврєм тӑйӆӑӊӑн: вән эвăн Лера, щӑӆта Милена, Алина па Алиса, мєт ай пухăн – щит Сёма. Елена имеӆ Лянтор вошн сєма питӑс, щӑӆта кәрта юхтӑс.

Ищи кәртӑн, тәп атэӆт хотн Михаил ӑӊкеӆ вәӆ, Кирилл ай пухӑӆ пиӆа па Миӆана эвеӆ пиӆа. Ӑӊкеӆ нємӆ Анна Александровна, эви опращ нємӆ Мултано­ва. Ӆўв Угут вошн сєма питӑс, щит Юган нємуп юхан хуща вәӆ. 

Тӑм оӆӑтн Михаил Кечи­мов пўпи хот нумӑсн вәӆ­ты питӑс, иса пўш ӆӑӊхӑӆ щи йис вєрӑт ма уша вєрты. Щи вєрӑтн ӆўвеӆа Данил Николаевич Покачев иса пўш нётӆ. Щи икен хўв тєӆн ӆўв ма вәӆӆэ.

Мєт оӆӑӊ пўш Михаил Мегион воша пўпи хота вохса, щӑта «Хӑтӆые» нє­муп мӑӊхӑтӆӑт вєрӑнт­ӆайт. Па щи кўтн пўпи хот вєрӆа. Ӆўв Расима Иб­раевайн щив вохса, щи имен иса пўш хӑнтэт пиӆа рәпитты рәпата тӑйӆ, ӆўв хӑнтэт пєӆа сӑмӑӊ ими. И оӆ щив ӊхты вєрӆ ӑн тывӑс, кимӑт оӆн щив щи ӊхӑс.

Сыры вәӆмаӆн Михаил пўпи хот ӑн па вантыӆӑс, пирӑщӆаӆ ӆўв вәӆты му­вӑӆн хуӆасӑт, айшӑк ёх нємӑӆт ӑн вәӆӑт. Щит пӑта тӑта пўпи хотн ӆўвеӆа вє­ра әмӑщ вәс. Ӆўв тӑта па ёх эвӑӆт сыр-сыр пўпи хот вєрӑт уша вєрсӑӆӆэ, ар­сыр пищӑта вәнӆӑс.

Ӆўв ясӊӑӆн: 

- Ма щирємн, м мӑӊ хот тывӑс, мӑнєма әмӑщ вәс. Ма хуӆна шимӆ вєр вәӆум. Иса утӑта щи вєр ма вәты мирев эвӑӆт ма вәнӆтыйӆты мосӆ. Ма ин еӆӆы пўпи хот нумӑсн вәӆ­ӆум. Щи вєрӑт ма тӑй­ты ёхӆамн иса пўш сащ­мӑӆӆаюм, путӑртӆаюм.  

Михаил айкємн пўпи хот арсыр пищӑт уша щи вєрӆӑӆэ. Кашӑӊ вєр имух­ты хән тывӆ. Ӆўв ин каш тӑйӆ еӆӆы арӑӊ хәя йи­ты пӑта пўпи хот арӑт вәнӆ­тӑты. Тӑм хӑтӆ ӆўв Данил Николаевич путăртум моньщӑт тӑйты питӑс. 

- Ар хуят мӑнєма монь­щӑт путӑртсӑт, муӆ­ты пӑ­та нумӑсн иса ӑн хӑщсӑт. Хән Данил Нико­лаевич моньщӑӆ, щирн тәх монь­щӑт нумӑсн хӑщ­ты пит­сӑт. Тәх утӑт ин па нумӑсн тӑйӆӑӆам па путӑртты пăк­ӆум, – Ми­хаил Кечимов путӑртӑӆ. 

Ӆўв ясӊӑӆн, йис вєрӑт ӑӆ ки путӑртты, уша вєрты пищ ӑнтә. Иса вєрӑт сємн вантты мосӆ, щӑӆта нумӑ­са пунты па ӛхӑт щитӑт вєр­ты, путӑртты, ариты. Ӆўв лупӑс: 

- Ма щимӑщ хӑннєхә, карты щўӊкӑт хўват муӆ­ты вантӆум ки, муй ӑӆ пу­тӑртӆаюм, вєрєм ӑнт тывӆ. Мӑнєма сємн вантты мосӆ, щӑӆта щи вєр вєрты мосӆ, оӆӑӊ ювраяшăк ат тывӆ, ищимурт вєрты мосӆ. Муӆ­тыя вәнӆтыйӆты каш ки тӑйӆум, щи вєр мӑнєма иса пўш вєрты мосӆ.

Вәнт кәрт вәӆупсэӆн ӆўв ищиты вәӆ. Вўӆы тӑйты вєр, веӆпӑсӆӑты вєрӑт – щитӑт тәп иса пўш вєрман ма тывты питӆӑт. Тӑм пўпи хот вєрӑт ищиты щи, вєрты питӆ ки – тывты питӆӑт. «Хӑтӆые» нємуп мӑӊ­хӑтӆ еӆпийн Михаил вошӑтн вєрты мӑӊхӑтӆӑта ӑн ӊ­хиӆӑс. Ин па щитӑта ӊхты нумӑс тӑйӆ. Вохӆа ки, ӊх­ты питӆ па еӆӆы щи йис вєрӑта вәнӆтыйӆты питӆ.
Хән путрємн пўпи хот еӆӆы мӑнты вєрӑт оӆӑӊӑн мӑнӑс, Михаил иса пўш айӆат ёх пєӆа нумсӑӆ кєрӆӑс. Ӆўв ясӊӑӆн, айӆат ёх эвӑӆт шимӆ хуятэв пў­пи хот вєрӑт пєӆа вант­ман вәӆӆӑт. 

- Тәп айӆат мирев щи мӑӊ пўпи хот вєрӑт вўша ки юхӑтӆӑт, щирн щи йис вєрев еӆӆы мӑнӆ, – Михаил лупӆ.

Ӆўв ищи щи пӑнт хўват тәп оӆӑӊ сәхум вєрӑс. Хуӆ­на ар вєр уша вєрты мосӆ: арӑт вәнӆтӑты, пойк­щӑты ясӊӑт уша вєр­ты. Щит пӑта щи тӑхетн кар­кама вәӆты мосӆ, рома ӑнт омӑсты.

Тӑмхӑтӆ кәртӑӆ хуща ёхӆаӆ пиӆа Михаил вўӆы тӑйман, веӆпӑсӆуман вәӆ. Ин па нумсӑӆн йис пойк­щӑты вєрӑта па пўпи хот вєрӑта таӆты питса.

Щиты щи хӑннєхә йис вєрӑт вўша юхӑтӆ, хән ӆўв щи вєрӑт вєрӆ. Мосӑӊ оӆӑӊ пўш муӆты юврая мӑнӆ, ищи мурт вєрты мосӆ, щирн тәп кашӑӊ вєр айӆтыева ма тывты питӆ. Ӛхӑт па щи вєрӑт и тӑмиты айкємн няврємӑта кантӆыйт. Щирн тәп хӑнты вәӆупсы еӆӆы мӑнӆ.   

Путӑр хӑншӑс: Пётр Молданов