Валентина Викто­ровна Молданова 43-мит оӆ мӑр Сўмӑт­вошн центральной район­ной пәӆьницайн рә­питӆ.

Ӆўв товийн 1964-мит оӆ ай кєр тыӆӑщ 2-мит хăтӆан Сўмӑтвошн сєма питӑс.

Ӑӊкиеӆ – Анисья Ива­новна Молданова, ащеӆ па Виктор Никитович Мол­данов. Щи пурайн ӆыв Ваньщавӑт кәртӑн вәсӑт.  Щӑӆта па Тэк кәрта вәӆ­ты щира мӑнсӑт. Щӑта Ва­лентина ӑшколая мӑнӑс па 1980-мит оӆн ӆапӑтмит класс етшуптӑс. Щи пийн Валентина Людмила вән упеӆ иты ищи Ёмвоша медицинской училищая ай леккара вәнӆтыйӆты мӑнӑс. Валентина щӑта шєӊк ма вәнӆтыӆӑс па 1983-мит оӆн етшуптӑслэ. Рәпитты щира Сўмӑтво­ша китса.
Валентина Викторовна Сўмӑтвош пәӆьницайн рәпитты щира юхӑтмаӆ вўш эвӑӆт иса и тӑхийн терапевтической отделе­нияйн рәпитӆ. Ӆўв уколӑт, капельницайт па арсыр процедурайт вєрӆ. 
Щӑта Валентина иса рәпитмаӆ хўват па еӆ­ӆы вәнӆтыӆӑс, щирн «Сест­ринское дело» мєт вән квалификационной ка­тегория тӑйӆ. 

Туӊа-щирӑӊа, мсые­ва хӑннэхә мӑӆты вєрӑт вәятӆ. Шєӊк ма кӑши-мәш функциональной диаг­ностика вєр вәйтӆӑӆэ. 
Арсыр хӑннєхә мәшит­ман пәӆьницая тәтьӆяӆа, Валентина имухты уша вєрӆӑӆэ па мєт оӆӑӊа хош­ты щира мәшӆ мӑӆ­ӆӑӆэ. 
Ӆўв пилэӆа пәӆьни­цайн рәпитты хуятӆаӆн Валентина сӑмаӊа тӑйӆа. Ӆўв хӑннєхә пєӆы оты па мир пєӆы сӑмӑӊа вәӆ. Вош хўлэт хўват шәштӑӆ пурайн ӆўв лекщитум хуятӑт пиӆа ещаӆт ки вәйтантыйӆ, м вўща ясӑӊӑн ястӑӆа.

Тәсыева, ма, ушӑӊа рә­питтаӆ хўватн районной пәӆьница кәща ёхн ар мой­ӆупсэтн, вухн па ишӑк нє­пекӑтн мийӆяӆа.
Ӆўв 2005-мит оӆн «Че­ловек года 2005» кӑ­суп­сыйн «медицинский ра­ботник года» щирн нух питӑс. Щи пурайн ӆўв «Золотая чаша» мой­ӆупсыйн мойӆӑса. 

Валентина Викторовна хӑннєхуятӑт мӑӆты вєрӑт, щит ӆўв йис Неттин рәтӆаӆ эӆты, аӆпа, йиты пищӑт па рўвӑт вәӆӆӑт. Щӑӆта вән аӊщащиӆаӆ па вән аӊкаӊкиӆаӆ хӑннєхә мӑӆ­ты арсыр пищ па ӛр тӑйсӑт.

Ван хӑтӆуп тыӆӑщн 2024-мит оӆн йис пурмӑ­сӑт шавиты «Торум Маа» тӑхийн Неттинӑт рәт ёх ӆєрӑт оӆӑӊӑн ванӆтупсы вәс. Щӑта Валентина Вик­торовна оӆӑӊӑн путӑр па мӑнăс, ӆўв хурӆаӆ па щӑ­та вәсӑт. 
Валентина Викторовна ин тӑм хӑтӆ вәнты рәпитты тӑхеӆ эӆты нух вуӆыты нумӑс ӑн тӑйӆ. Тӑӆаӊ ёш, тӑӆаӊ кўр наӊена, ешӑк хуятые! Ар ӛр, м нумӑс нӑӊена!

Путӑр хӑншӑс: 
Наталья Краснопеева