Лыпӑт хойты тыӆӑщ 16-мит хӑтӆӑн вәнтӑт ӆавӑӆты ёх ӑктупсы вәс. Щимӑщ вәйтантупсы кашӑӊ оӆ вәнтӑт ӆавӑӆты ёх мӑӊхӑтӆӑн вєрӑнтӆа. «Югра-Экспо» хуща вәнтӑт ӆавӑӆман рәпитты ёх, нәмӑӆта мўвӑт вантман ӊхты авиалесоохрана ёх ӑктӑщсӑт. Щӑӆта па тӑта мўвӑт ӆавӑӆман паркӑт па заповедникӑт хуща рәпитты мирев вәсӑт, щи щира вәӆты кәща ёх па арсыр хуятӑт.

Ӑкмум ёх ещаӆт Мўв иӆпи питы вуй па газ вўты вєр па мўвӑт-автӑт, йиӊкӑт ӆавӑӆты вєр тәты департамент хуща кәща ӆӑӊкӑр хәя вәӆты хӑннє­хә Егор Збродов оӆӑӊ ясӑӊ вўс.
Ӆўв ӑкмум мирев ещаӆт м вўща ясӑӊ лупӑс. Ӆўв ясӊӑӆн: 

- Мўӊ округев хуща иса 50,4 млн гектар арат вәнт тӑйӆўв, щи кўтн 49,4 млн гектар – щит ӆа­вӑӆ­ман тӑйты вәнтӆўв. Мўӊ округев хуща сопаса 3,2 млрд кубометра х тӑйӆўв. Щи х сопасӑт ӆа­вӑӆман тӑйты мосӆ.

Егор Збродов ясӑӊӑн, тӑм отчёт нєпекӑт мухты мўӊева кӑӆӆӑт тарма рә­питты вәнтӑт ӆавӑӆты ар­сыр мирев, мӑта ёх ӛрн вәнт тащев тӑӆаӊа тӑйты пӑкӆэв.
«Вәнт мирхотн» вәнт тўтӑт оӆӑӊӑн мєт хўв па мосты путӑр мӑнӑс. «База авиационной и наземной охраны лесов» тӑхи хуща кәща хә Андрей Ерицев ясӑӊӑн: 

- 2026-мит оӆн Югра мўвевн иса 578 вәнт тўт вәс, щит 51,9 щурăс гектар мўв тўтн ёссы. Щӑӆта па тӑм оӆ 26 ландшафтной тўт вәс, щитӑт ищи  хәрӑтсайт.

Кӑт ӆўӊ тыӆӑщӆўв, щит лыпӑт па вәщ тыӆӑщ вєра каврум тыӆӑщӊӑн вәсӑт, щит пӑта вәнтӑт иса пўш ма вантты мосӑс. Вәнтӑт пиӆа рәпитты мирев иса пўш муӆты йиӆуп пи­щӑта вәнӆтыйӆӆӑт, муй вўрн сора уша вєрты, муй тӑхетн йиӆуп тўтӑт тыв­сӑт, муй вўрн щи тутӑт со­рашӑк хәрӑтты. Тӑм оӆ Неф­теюганск вошн «База авиа­ционной и назем­ной ох­раны лесов» йиӆуп тă­хи пўншса. 

Па путӑр мӑнӑс хӑннєхә такӆы ӊхты тухӆӑӊ щўӊкӑт оӆӑӊӑн, муй щирн щитӑт мухты вәнт тўтӑт вәйтты.
Ӑктупсы хуща путӑрт­сӑт, муй вўрн вәнт мўвӑт ӆавӑӆты ёх вәнӆтӑты. «База авиационной и наземной охраны лесов» хуща щимӑщ вәнӆтӑты тӑхи вәӆ. Щӑта ёх вәнӆ­тӑӆыйт десантник-по­жар­ника, парашютист-по­жарника, диспетчера па вәнт тўтӑт хәрӑтты кәща ёха. Щӑта и щирн нєпекӑт мухты вәнӆтыйӆӆӑт, кимӑт щирн – щит нємӑсыя тўтӑт хәрӑтӆӑт. Ӆыв пиӆаӆа вәнт тўтӑт оӆӑӊӑн иса вєр вәты сащӑӊ ёх рәпитӆӑт. Тӑмиты щи вәнӆтыйӆты ёх ищи иса вєрӑт уша вєрӆӑт.
м вўща ясӑӊ мир ещаӆт лупӑс Югра кәща ӆӑӊкӑр хә, Округ информационной технология вєрӑт тәты департамент кәща хә Павел Ципорин. Ӆўв яс­ӊӑӆн: 

- Вәнт – щит мўӊ тащев. Вәнт такӆы Югра мўвев вәӆты пищӆ ӑнтә. Кашӑӊ хӑтӆ вәнт мўв оӆӑӊӑн нә­мӑсты ёх тыв щи ӑкумсӑт. 

Вәйтантупсы вєрум хӑт­ӆӑтн «Годичное кольцо − 2026» ванӆтупсы вәс, щӑӆта вәнт тўтӑт хәрӑт­ты сыр-сыр пурмӑсӑт ванӆ­тӑсыйт. Ӑкмум ёх ӑш­колайтн вәӆты лес­ничества оӆӑӊӑн путӑрт­сӑт, муй вўрн «Сад памя­ти» па «Сохраним лес» мўвев ӆавӑӆты акцияйт вєрӑнтӆайт. Путӑртсӑт, муй вўрн тўтӑӊ ёсум вәнтӑт ӆыӆӊуптӑты, муй вўрн муниципалитетӑт хуща рәпитты ёх вәнтӑт ӆавӑӆман рәпитӆӑт.
мӑӊхӑтӆ пӑта вєрум ӑктупсы хуӆаты еӆпийн каркама рәпитум ёх мой­ӆупсыйн мӑсыйт. «Хозяин тайги» нємуп кӑсты тӑхийн Сәрханӆ мўв лесничества хуща рәпитты хә Евгений Шабанов нух питӑс. Щӑӆта па ар хуят федеральной па окружной ишӑк нєпекӑтн мӑсыйт. Щи ёх кўтн авиа­лесоохрана, лесхозӑт па арсыр тӑхетн рәпитты мир, мӑта ёх ӛрн вәнт мўвев тӑӆаӊа вәӆ.
Вәнтӑт ӆавӑӆты ёх ӑк­тупсы хуща па и пўш ӑк­тӑщсӑт щи мирев, мӑта ёх сӑмӑӊа мўӊ вәнт мўвев пєӆа вәӆӆӑт, мӑта ёх кашӑӊ хӑтӆ вәнт нумӑсн вәӆӆӑт. Ӆыв ӛреӆн, вәнт мўвӑт еӆӆы єнумты мирев пӑта тӑӆаӊа хӑтьӆӑт. Тӑмӑщ рә­патайн вәӆты мирев ну­мӑсн па ӛрн мўӊ вәнт мў­вев тӑӆаӊа хӑтьӆ, вәнт мўв тащев еӆӆы памӑт­ӆэв. Югра мўв вәнтӑт ху­ща ху­ты мўӊ йис вәӆуп­сэв, мўӊ йис нумсэв.

Путӑр хӑншӑс: Пётр Молданов