Щиты ястӑс Тэк кәртӑӊ ӑшкола кәща нє Светлана Леонтьевна Токушева (Новьюхова). Ӆўв тӑта сєма питӑс, єнмӑс, ӑшкола етшуптӑс, еӆӆы рўщ ясӑӊа, литературая вәнӆтӑты нєӊа вмаӆ пийн кәртӑӆа кєрӆӑс. Еӆӆы педагога-психолога вәнӆтыӆӑс. Ар оӆ тӑм ӑшкола кәща нєӊа рәпитӆ. Тӑм ванӑн Тэк кәрта ӊхмємн ма ӑшколая ӊхсум па ӆўв пиӆэӆа вәйтантыйӆсум па путӑртсум.

Мєт сыры иньщӑс­сєм, хән тӑм хӑнты кәртӑн ӑшкола тывӑс? Уша вєрсум, 1933-мит оӆн Катра Тэк кәртӑн ай ӑшкола омӑссы. 1934-мит оӆн тӑ­та няврємӑт вәнӆтыйӆты оӆӊитсӑт. 1939-мит оӆн тӑм ай ӑшкола 8 няврєм етшуптӑсӑт. 1940-мит оӆн кәрт Ай Ас па пєлка ка­сӑӆ­ман ӑшкола хот ищи щив тәсы. Ӆавӑрт ӆаӆь пурайн няврємӑт вәнӆтыйӆсӑт па урокӑт пийн вән ёха хўӆ веӆпӑсӆӑты, турн сэвӑрты, кӑртәпка омӑсты па па вєрӑтн нётсӑт. 1952-мит оӆн кәртӑӊ мир Йиӆуп Тэк кәрта касӑӆсӑт, тăта ӑшкола катра контора хотн вәс. 1961-мит оӆ вәнты Тэк кәртӑн тәп ай ӑшкола вәс, 8-мит класс ӑшкола Сэй Нюӆ кәртӑн вәс. 1973-мит оӆн Тэкн сот няврєм пӑта нивӆ клас­суп ӑшкола пўншсы. Тәп 1986-мит оӆн Тэкӑӊ кәртӑӊ ӑшкола кўтуп ӑш­колая йис.
Еӆӆы Светлана Леон­тьевна лупӑс:

- Ас потты тыӆӑщ 7-мит хӑтӆӑн 2022-мит оӆн мўӊ йиӆуп ӑшколаева ӆуӊсўв, мўӊ пӑтэва щит вуӆаӊ хӑтӆ, вантэ, щи хӑтӆӑн 1933-мит оӆн Тэк кәртӑӊ ӑшкола тывӑс. 2023-мит оӆн мўӊ ӑшколаев 90 оӆ постӑсўв. Иса оӆӑт мӑр ӆўӊӑтты ки, щит нӆмит ӑшкола хот.
Мўӊ хущева ар хуят рәпитсӑт, щит Александр Иванович па Ли­дия Си­доровна Ал­фё­­ровӊӑн, Лю­бовь Анд­реевна Фролова, Анас­та­сия Алексеевна Но­вью­хо­ва, Евгения Гри­го­рьевна Новьюхова, Ни­ко­лай За­харович Боко­вой, На­талья Петровна Ряб­чи­кова, Евдокия Геор­гиев­на Отшамова, Алек­сандра Георгиевна Ла­рио­но­ва (Отшамова), Да­рья Георгиевна Гын­ды­ше­ва, Зоя Абрамовна Но­вьюхова, Галина Ми­хай­ловна Курганова, Зи­наида Ивановна Ря­занцева там пура вәнты мӑӊхӑтӆӑт ӆэщӑтты нётӆ. Ар м хуят мўӊ хущева рәпитсӑт. 

Интӑм Тэкӑӊ ӑшколая «Шовӑр» нємпи хӑтӆ мӑр ай няврємӑт ӆавӑӆты тӑй­ты хот па интернат ӆуӊӆӑ­ӊӑн. Иха ӆўӊӑтты ки, щӑ­та хәс хуят рәпитӆ, щит ар пєлӑк мўӊ кәртӑӊ ёхӆўв. Ӑшколайн 45 няврєм вәнӆ­тыйӆ, 13 пушхие хӑтӆ мӑр ай няврємӑт тӑйты хота ӊхӆӑт. 
Тӑм оӆ лыпӑт єнумты тыӆӑщн тәп кӑт эви 9-мит класс етшуптӑсӊӑн, 11-мит классӑн няврєм ӑн­тәм вәс. Щи кӑт эви Ём­воша колледжа вәнӆтыйӆты мӑн­сӑӊӑн. Лы­пӑт хойты ты­ӆӑщ 1-мит хӑтӆ вўш эвӑӆт ӑшколая нӆ няв­рєм 1-мит класса юхӑтсӑт, интернатн хәӆум няврєм вәӆты питӆӑт, ӆыв Пәкӑр кәрт эвӑӆт, катра пурайн Юханкәрт, Сэй Нюӆ па Шайтанка кәртӑт эвӑӆт вәсӑт. Ӑшколайн ар пє­лӑк хӑнты няврємӑт вәнӆ­тыйӆӆӑт.

Ма кәща нє эвӑӆт рәт ясӑӊ урок оӆӑӊӑн инь­щӑссум. Юхӆы ӆўв лупӑс, няврємӑт 1-мит класс вўш эвӑӆт 11-мит класс вәнты рәт (хӑнты) ясӑӊ вәнӆтӑӆӑт. Ӆапӑт мӑр «Рәт ясӑӊ» урок кӑт щос, «Рәт литература» – и щос мӑнӆ. Няврємӑт рәт ясӑӊа Олеся Вячеславовна Хандыбина вәнӆтӑӆ. Ӆўв няврємӑт рәт ясӑӊ па литература хўват арсыр кӑсупсэта ӆэщӑтӆ. Щи тумпи О.В. Хандыбина вәнӆтӑты нє иты арсыр кӑсупсэтн кӑсӆ, тәняӆ ӆўв «Рәт ясӑӊ вәнӆтӑты хуят» кӑсупсыйн кимит тӑхия питӑс. Интӑм «Няврємӑта сӑмєм мӑӆєм» нємпи Сў­мӑтвош район кӑсупсыя «Шовӑр» нємпи хӑтӆ мӑр ай няврємӑт тӑйты хотн рәпитты нє Надежда Ива­новна Катрычева вохты нєпекӑӆ китсӑӆэ.
Щи тумпи Тэк кәртӑӊ ӑшкола няврємӑт арсыр Россия мўвтєӆ мир кӑ­супсэтн кӑсӆӑт па нух питӆӑт. 
Тэк кәртӑӊ ӑшкола кә­ща нє амтӑӊа ястӑс:

- Шєӊк әмӑщ, хуты интӑм Санкт-Петербург вошн А.И. Герцен нєм­пи государственной пе­дагогической универси­тет хуща вәӆты Увӑс мир институтн мўӊ ӑшколаев етшуптум няврємӑт вәнӆ­тыйӆӆӑт. Ин, вантэ, ар пєлӑк 9 класс етшуптум эвет-пухӑт Игрима, Ну­ви сӑӊхум воша муй Ём­воша мӑнӆӑт па щӑта кол­леджӑтн вәнӆтыйӆӆӑт.

Тэкн вәӆмємн щи пу­райн щив Сўмӑтвош вәнӆ­тӑты вєр тәты комитет эвӑӆт артаӆӑты хә юхтыӆӑс, ӆўв тәса нух вантӑс, муй щирн няврємӑт вәнӆтӑты вєр ӆэщӑтман вәӆ, хутыса ӆа­пӑтӆыйт па па вєрӑт нух вантӑс. Уша йис, хуты Тэк кәртӑӊ ӑшколайн иса ма ӆэщӑтман вәӆ. 

Путӑр хӑншӑс: 
Людмила Гурьева