Нина Тимофеевна Конева хӑнты хоттєӆ ёх хущи Ямал мўвн Питляр кәртӑн сєма питӑс па єнмӑс. Ӆўв хӑнты мир йис вєрӑт ма вәӆӆэ. 

Ӑӊкеӆ Марфа Илла­рионовна Пароват кәрт эвӑӆт вәс, ащеӆ Ти­мофей Андреевич Тыр­лин Хашкәртӑн єнмӑс. Ӆын рәт ёхӆӑн вой па хўӆ веӆпӑсӆуман вәсӑт. Нина Тимофеевна ай пура оӆӆаӆ вәнтӑт па юханӑт кўтн мӑнсӑт. Ӆыв хотэӆн ӆўв мєт ай эвия вәс, кӑт упи па яй тӑйс. Ӆыв Хашкәртӑн вәсӑт. Нина ая вәӆмаӆн ӑӊкеӆ пиӆа ай хопн хўӆ веӆпӑсӆӑты, вәнта воньщумут воньщты ӊхӑс. ма нәмӆӑӆэ, хутыса кәртӑӊ пухӑт пиӆа иха юнтсӑт. Әмӑщ пура вәс.
Нина Горки вошн (хӑн­ты щирн Йиӆуп вош) ӑш­колайн вәнӆтыӆӑс. Щи оӆӑӊӑн ӆўв щиты путӑртӑс:

- Сыры репрессия пу­райн арсыр мўвӑт эвӑӆт ёх Увӑс мўва китыйӆсыйт. Горки вошн немщӑт, кал­мыкӑт, хӑтанят па па ёх вәсӑт. Ар хуят щӑта вәс. Калмыкӑт Калмыцкой рєпн вәсӑт, ӆыв щӑта мўв хотӑт вєрсӑт па щӑта щи вәсӑт. Ванкўтӆы кӑши-мәшн юхтыйӆсыйт па ӑн­тә­ма йисӑт. Интӑм Горки вән воша йис, хӑннєхуятӑт щӑ­та ма вәӆӆӑт, тәп щи Калмыцкой рєп ин вәнты вәӆ, щиты щи нємăтӆы.

Ӑшкола етшуптумаӆ пийн Нина Тимофеевна Пуӆӊавӑт вошн культур­но-просветительской учи­лищая вәнӆтыйӆты мӑ­нӑс. Вуӆаӊ нєпек ёша павтӑс па Питляр кәрта кєрӆӑс, вўӆы ӆавӑӆты ёх няврємӆаӆ пиӆа рәпитты питӑс. Ӆўв интернатн щи пушхиет ӆавӑӆман рә­питӑс. Щӑӆта щи кәртӑн кўлупн кәща нєӊа вәс. Ӆўв хурамӑӊ тўр сый тӑйӆ, кәр­тӑӊ мӑӊхӑтӆӑт пурайн хӑнты ясӑӊӑн хурамӑӊ арӑт арийс.

1976-мит оӆн Нина Тимофеевна икия мӑнӑс. Икеӆ Алексей Иванович Конев совхозн, щӑӆта пәщтайн рәпитӑс. Ӛхӑт оӆӑтн ӆўв мўвӑт, нӛрмӑт ӆавӑӆман рәпитӑс. Ӆўв тухӆӑӊ хопн тўтн ёсум тӑхет хўват ӊхӑс па тўт хәрӑтӑс. Щи пийн рўть­щӑты мӑнӑс па, Нина Тимофеевна ясӑӊӆаӆ щирн, «ковид» ӆавӑрт мәшн юхăтсы па ӑнтәма йис. 
Пиӆӊӑн хәӆум няврєм єнмӑӆсӑӊӑн: Анастасия, Алёна па Иван. И эвӑн ин­тӑм Пуӆӊавӑт вошн вәӆ па рәпитӆ, кимит эвӑн Тю­мень воша касӆӑс, пу­хӑн ищи щи воша мӑнты нумӑс тӑйӆ. 
Мосӆ лупты, Нина Ти­мофеевна ӛхӑт оӆӑтн ищи Тюмень воша вәӆты мăнас. Щӑта ӆўв сыры оӆӑт иты рәт хӑнты мир йис вәӆуп­сы еӆӆы тәӆ. Ӆўв Любовь Дмитриевна Собянина пиӆа вәтаӊа йис. Щи имен Тюмень вошн «Хэс» нємпи якты-ариты тӑхи кәщая вәӆ. Нина Тимофеевна ищи щи тӑхия ӊхты питӑс. Ӆыв хӑнты щирн ариӆӑт, якӆӑт. Имет Тюмень вошн ӑшколайт, колледжӑт па па тӑхет хўват ӊхӆӑт па хӑнты мир йис вєрӑт, йис вәӆупсы ванӆтӑӆӑт.

- Тӑм ӆўӊӑн лыпӑт ты­ӆӑщ 12-мит хӑтӆӑн Тюмень вошн мӑӊхӑтӆ пурайн мўӊ вошӑӊ мир пӑта ванӆтӑсўв, хутыса нюки вей ёнтты мосӆ, хутыса вўӆы сух тӑ­нӑӆты, хутыса ваньщăсты мосӆ. Вошӑӊ мира щи вєр оӆӑӊӑн уша павӑтты шєӊк әмӑщ вәс. Ма айтєӆн няврємӑт пӑта нәй сӑх, ӑнтуп кеӆ, акань па намӑт ёнтты хошӆум. Тюмень вошн вәнӆтӑты хӑрӑта ӊ­хийӆӆум, юрн па сӑран акань ёнтты вәнӆтыйӆсум. Щи­ты мўӊ вән вошн рәт ми­рев йис вєрӑт ӆавӑӆ­ӆўв па еӆӆы тәӆўв, – лупӑс Нина Тимофеевна Конева.   

Путӑр хӑншӑс: 
Надежда Рагимова