Ас нопӑтты тыӆӑщ 19-мит хӑтӆ вўш эвӑӆт па 23-мит хӑтӆ вўш вәнты Югра мўвев ӆу­ваттыйн финно-угорской мир писателят вәйтантупсы мӑнӑс. Щи киньща Ас нопӑтты тыӆӑщ 21-мит хӑтӑӆн киникайт хӑншты хәйт-нєӊӑт Кондинской района «Силава» этнопарк тӑхи вантты тәтьӆясыйт. Ищи пурайн ма Марий Эл мўв киникайт хӑншты нє Лидия Иксанова пиӆа вәйтантыйӆсум па путрємӑсум.

- Лидия Геннадьевна, хута сєма пит­сӑн, єнумсӑн па еӆӆы вәнӆтыйӆсӑн?

- Ма тӑм нуви тәрум иӆпия Марий Эл мўв Моркинской район Кумужъял кәртӑн 1966-мит оӆн юхӑтсум. 1973-мит оӆ вўш эвӑӆт па 1984-мит оӆ вәнты Кумужъял кўтуп ӑшкола хуща вәнӆтыйӆсум. Щӑӆта па 1984 – 1989-мит оӆӑтн историко-филологической факультетн Ма­рийской государственной уни­верситетн еӆӆы вәнӆтыйӆсум.

Университет етшуптумєм пийн оӆ мӑр киникайт єсӑӆты тӑхийн рәпитсум. Ӛхӑт Шуарсолинской кўтуп ӑшколайн няврємӑт рўщ ясӑӊа па литературая вәнӆтуман вәсум. Тӑмхӑтӆ И.С. Палантай нє­муп культура па искусства кол­ледж тӑхийн няврємӑт вәнӆтуман рәпитӆум. Ма мкєм арат ӆўӊтар хӑншсум. Щит пӑта поэтесса, пи­сатель па драматург нєӊа ищиты щи ӆўӊтӑсӆум, Россия писателят Союз тӑхи хуща вәӆӆум па пе­да­гогической наукайт кандидат нєӊа йисум. Араттєӆн вәӆупсы хўватн 11 ӆўӊтарӑӊ нєпек хӑншсум па єсӑӆсум. Щиты 11-мит киникам «Мўвн вәӆ­тыя м вош» нємн кантсєм. Ма, вантэ, ар пєлӑк мари ёхӆам рәт мир ясӑӊӑн арсыр ӆўӊтарӑт па путрӑт кашӑӊ пўш хӑншӆум. Тәп юхи хӑщум пураитн рўщ мир ясӑӊӑн ма ищиты щи киникайт хӑншты питсум. Щӑӆта щи вєр тумпийн арсыр поэ­тӑт хӑн­шум хурамӑӊ ӆўӊтарӑт-путрӑт ма рәт мирєм ясӑӊа тулмащтӑты питсум.

Кашӑӊ йиӆпа юхӑтты хӑтӑӆн мўӊ рәт ясӑӊӆўвн шєӊк шимӆ хӑннєхә нєпек ӆўӊӑтӆ, щи вєр пӑта мўӊева рўщ ясӑӊӑн ищиты тӑмхӑтӆ ар ки­ника єсӑӆты мосӆ. Ӆәӆн мўӊ мари ёхӆўв литература па культура рўщ ясӑӊ унтасн ищи мсыева еӆӆы ат тәсы. 

- Лидия Геннадьевна, нӑӊ лупсӑн, хуты тәп рәт ясӑӊӑн ӆўӊтарӑт па путрӑт хӑншӆӑн, мӑтты киника, аӆпа, рўщ ясӑӊӑн хӑншсӑн па єсӑӆсӑн?

- Мўӊ щикўш арсыр мосты вєрӑт вєрӆўв, ӆўӊтарӑт па путрӑт мари мир ясӑӊ щирн кашӑӊ пўш тәса ӆэщӑтӆўв па хӑншӆўв, ищипа мўӊ ясӊев па культура вєрӑт айӆат ёхӆўвн юрємӑӆыйт па еӆӆы ӑн тӑйӆыйт. Щит пӑта ӛхӑт ма кӑт ӆўӊтарӑӊ киника иса рўщ ясӑӊӑн хӑншсум па єсӑӆсум. Оӆӑӊ утєм – щит «Я подарю свою любовь». Щи киника хуща хӑннєхәйт ӆывеӆа мосты вєрӑт оӆӑӊӑн тўӊщирӑӊа па тәса ӆэщӑтсєм. Кимит нєпекєм «Мелодия ночного танго» нємн кантсєм. Ма щирємн, мосӆ лупты, хуты тӑм нєпекӊӑӆам айӆат ёхӆама хӑншсӑӆам. Ма нәмӑстємн, ищипа мўӊ хӑншум ӆўӊтарӆўв ӆўӊӑтӆыйт .
- Ин мӑтты хурамӑӊ ӆўӊтар, аӆпа, мўӊ газетаев ӆўӊӑтты ёхӆўва ӆўӊӑтӆӑн?

- Тӑмхӑтӆ мўӊ шєӊк ар тӑта кӑт ясӑӊ тӑйты щирӑт оӆӑӊӑн иха путӑртсумн, щит пӑта ма ӆўӊтар тӑйӆум «Два языка, как родина одна», ин щи ӆўӊӑтӆєм:

Я рождена марийкою в колхозе,
И воспитал меня отец-мари.
Я не встаю в напыщенную позу:
Насколько же я русская внутри.

Два языка живут во мне красиво.
И благородно уступают, когда вдруг
Душа трепещет, ищет то лишь слово,
Которое ждёт самый близкий друг.

Пусть будет он чуваш или татарин,
Но я когда скажу: «Салам, йолташ»,
Поймут, я знаю: подают мне руку,
По-русски «здравствуй» говорят, обняв … 

- Лидия Геннадьевна, мосӆ муй ӑнтә кашӑӊ оӆ тӑмӑщ Финно-угорской мир писателят литературной вәй­тантупсэт Югра мўвн ма ӆэщӑтты?

- Ма щирємн, тӑмӑщ вәйтантупсэт кашӑӊ оӆ ӆэщӑтты мосӆ. Ӑнтә тәп нын Югра мўв округн хуща кашӑӊ пураитн щит вєрты. Мўӊ Марий Эл мўвевн па па финно-угорской мирӑт вәӆты мўвӑтн па щитӑт ӆэщӑтты мосӆ. Ма нын увӑс мўвн хуща мєт оӆӑӊ пўш вәсум. Тащӑӊ па шєӊк хурамӑӊ мўвн нын вәӆӆӑты. Ма нәмӑстємн, тӑмӑщ ищки Югра мўвн нумсӑӊ, ушӑӊ-сащӑӊ хӑннєхуятӑт єнумӆӑт па ин тӑмхӑтӆ вәнты ма вәӆӆӑт!

Путӑр хӑншӑс: 
Владимир Енов