Ас хӑӆты тыӆӑщ 21-мит хӑтӆӑн Любовь Кузьмовна Тарлина 75 оӆа йис. Ӆўв пиӆэӆа ма ван хӑтӆуп тыӆӑщ 2024-мит оӆн Сәрханӆ вош пўӊӑӆн Барсово кәрт «Валикас» нємпи рўтьщӑты тӑхийн имет ёнтӑсты хӑрн вәтаӊа йисум па ӆўв вәӆупсэӆ оӆӑӊӑн иньщӑссєм.

Тӑм хӑнты ими Ниж­невартовской район Комсомольск кәртӑн сєма питӑс. Ащеӆ Кузьма Афанасьевич Манин хўӆ па вой веӆпӑсӆӑс, ӑӊ­кеӆ Фёкла Яковлевна Каткалева ӆўвеӆа нётӑс па хот рәпата вєрӑс. Ӆыв щемьяеӆн хәӆум эви вәс: Елизавета, Нина па Татьяна. 

- Упеӊӑӆам сєма пи­тум нєпекӊӑӆаӆн хӑнш­ман Елизавета Кузьми­нична Манина, Нина Кузь­ми­нична Манина, тәп ма нєпекємн хӑншсы – Кузь­мовна, – лупӑс Любовь Кузьмовна Тарлина. 

Щӑӆта Комсомольск кәрт лӑп тәхӑрсы, щирн Манин щемья Корлики кәрта касӆӑс. Тӑта Люба эвие ӑшколая мӑнӑс, вән классӑтн Ларьяк кәр­тӑн вәнӆтыӆӑс. Нивӆ класс етшуптумаӆ пийн Ёмвоша мӑнӑс, тӑта пе­дучилищайн вәнӆ­тыйӆты питӑс. 1971-мит оӆн нє­пекӑӊ айӆат нє ӆўв рәт Нижневартовской район Корлики кәртӑӆа рәпитты китсы, тәп ӆўв тўтӑӊ хопн Сәрханӆ воша мӑнӑс. Щӑта район кәщайт рәпитты хота юхтӑс, ӆўв Дарко-Горшково кәрта рәпитты китсы. Щӑта ӆўв икеӆ пиӆа вәтаӊа йис. Щӑӆта тӑм кәрт лӑп тәхӑрсы, щирн Любовь Кузьмовна Лемпино кәр­та рәпитты китсы. Щӑӆта икеӆ Сәрханӆ вошӑӊ хотӑт омӑсты тӑхия рәпитты вохсы. Щи пурайн Любовь Кузьмовна Ленинград воша А.И. Герцен нємпи пединститута нємасыя курса вәнӆтыйӆты китсы. Оӆ мӑр вәнӆтыӆӑс. Еӆӆы 1977-мит оӆ вўш эвӑӆт Сәрханӆ вошн кимит ӑшколайн ай няврємӑт вәнӆтӑс. 

- Ма Сәрханӆ район ӑш­колайтн яӊ оӆ рәпитсум, Сәрханӆ вошн – 15 оӆ, щиты 25 оӆ няврємӑт вәнӆтуман вәсум, – лупӑс Л.К. Тарлина.

Сәрханӆ вошн ӆыв щемьяеӆн хәӆум няврєм Наталья, Татьяна па Ев­гений сєма питсӑт. 
Ӛхат Любовь Кузьмовна Сәрханӆ вош кәщайт рә­питты хотн вошӑӊ шуши мир вєрӑт нух вантман па нўшайт тўӊматман рәпитӑс. Щӑӆта ищимӑщ рәпата Сәрханӆ район кәщайт рәпитты хотн тәс. 
1997-мит оӆн рўтьщӑ­ты мӑнӑс. Рўтьщуман ӆўв арсыр ванӆтупсэта, мирхотӑта, вәнӆтыйӆты хӑрӑта ӊхты питӑс. Няв­рємӆаӆа арсыр овощӑт єнмӑӆты нётӆ. 

- Ма «Катра Сәрханӆ» музей хуща м арат оӆ методиста рәпитсум. Юхи хӑщум оӆӑтн щӑта ван­кўтӆы шуши мир арсыр вєрӑта вәнӆтыйӆты хӑрӑт ӆэщӑтӆыйт. Ма щи пурайн ищи тунты, ӆюм х эвӑӆт арсыр пурмӑсӑт вєрты вәнӆтыйӆсум.
Вухаӆь нє Валентина Шадрина ищи шуши мир ими вєрӑта вәнӆтыйӆты хӑрӑт ӆэщӑтты питӑс. Мосӆ лупты, ма катрайн нємуӆт пурайн ӑн ёнтсум. Ин айӆтыева рәт мирєм имет вєрӑта вәнӆтыйӆты щи оӆӊитсум. Интӑм ма хӑнты рнас ваньщӑсты па ёнтты вәнӆтыйӆӆум. Ма айтєӆн вантсум, муй щирн ӑӊкєм ӆәмӑтсухӑт ваньщӑсӑс па ёнтӑс, тәп щи вєр оӆӑӊӑн уша ӑн вєрсум. Интернатн вәӆмємн мўӊ ищи ӑн ёнтсўв, – Любовь Кузьмов­на нәмӑӆмӑсӆэ. 

Ӆўв няврємӆаӆ вәна йисӑт, хуӆыева рәпитӆӑт. Татья – юриста вәнӆтыӆӑс, Сәрханӆ вошн депутата нётӑсты нєӊа рәпитӆ. Ев­гений пухӆ «Промстрой» тӑхийн рәпитӆ. Любовь Кузьмовна хәӆум хиӆы, щит Диана, нёмӑсӊӑн Ярослава па Святослав єнмӑӆты нётӆ. 

- Нёмӑсӊӑн пиӆа щикўш ӆавӑрт, ӆын ӑшкола тумпи арсыр секцияйта ӊхӆӑ­ӊӑн. Ма хиӆыӆам пиӆа «Катра Сәрханӆ» нємпи музея арсыр шуши мир мӑӊхӑтӆӑта ӊхийӆӆум. Хӑнты мирєм оӆӑӊӑн пу­тӑртӆум, йис путрӑт, монь­щӑт моньщӆум. Щирн ӆыв вәӆэӆ, хуты ӆыв хӑн­ты мир эвӑӆт, – Любовь Кузьмов­на лупӆ. 

Юхи хӑщум артӑн ма Любовь Кузьмовна эвӑӆт мӑнум ёнтӑсты хӑр оӆӑӊӑн иньщӑссум. Ӆўв лупӑс:

- Шєӊк м, хуты Сәрханӆ вошӑӊ нєӊӑт пӑта ищи әмща вәӆ шуши мир имет рнӑсӑт ваньщӑсты па ёнтты. Тӑм ёнтӑсты хӑр тәса ӆэщӑтман вәс – хәӆум хӑтӆ «Валикас» нємпи рўтьщӑты тӑхийн вәнӆтыйӆсўв па вәӆсўв-хоӆсўв. Тӑта кўтэвн вәтаӊа йисўв па еӆӆы ӆәхсӑӊа вәӆты питӆўв.

Ешӑк Любовь Кузь­мовна, сєма питум хӑтӆэн пиӆа! Нӑӊ нәптэн 75 оӆа йис, еӆӆы хўв йис, хўв нәпӑт тумтака, уяӊа-щўняӊа вәӆа!

Путӑр хӑншӑс: 
Людмила Гурьева