Югра правительства ёх вәйтантупсыйн йиӆуп поступсы вєрса, щи унтасн ӆаӆь хӑрн вәӆум хӑннєхәйта аршӑк нётупсы вух сухуптӑты питӆа. Щи вухӑт ёша павӑтӆӑт щи мирев, мӑта хуятӑт лаӆь хӑра мӑнмеӆн социальной контракт тӑйсӑт, щӑӆта па поступсы щирн вух сухуптӑты питӆа ӆаӆясум ёх имиӆаӆа, щит икеӆ I муй па II группа  инвалидность тӑйӆ ки. 

Ӆаӆясум мирев и пўш пӑкӆӑт 350 000 вух вўты, сыры щимӑщ вух сухуптыйӆса тәп щи хуятӑта, мӑта ёх Югра прожиточной минимум киньща шимӆ вух ёша павтыйӆсӑт.

Па лупты мосӆ, «осу­ществление инди­ви­дуа­льной предпри­нима­тельской деятельности» соцконтракт ӆаӆьн вәӆум ёх пиӆа тәп и пўш вєрты пищ вәӆ.

- Щимӑщ поступсы мўӊ вєрсўв ӆаӆьн вәӆум мирев па ӆыв хотӑӊ ёхӆаӆ мўӊева ар пўш хӑншмеӆ пӑта. Тӑм нётты поступсы – щит па и нётты пищ, щи киньща Российской Федерация па округев хуща щи ёх пӑта па арсыр нётупсэт вәӆӆӑт, − лупӑс Югра кәща Руслан Кухарук.
Социальной развития департамент кәща ики Антон Терехин ясӑӊӑн, ван хӑтӆуп тыӆӑщн 1-мит хӑтӆӑн 2025-мит оӆн щимӑщ нётты вух 12 хӑннєхә ёша павӑтcӑт.

- Вәӆупсы па щира кєрӆум пєӆа ванттэвн, еӆӆы вәӆтэвн, тӑмӑщ вух ӆаӆьн вәӆум аршӑк хӑннєхәйта мосмӑтӆ, кашӑӊ оӆ щимӑщ вух вўты 100-кєм хӑннєхә питӆӑт, – лупӑс Антон Терехин.

Щи нётты поступсы вә­ӆупсы вўша юхӑтӆ, хән Ёмвош округ Дума миревн вантӆа па поступсы щира ӆэщӑтӆа.

Хӑнты ясӑӊа тулмащтӑс: 
Пётр Молданов