Щиты лупӆ киргиз ими Карачач Джумаев­на Исмаилова. Ӆўв тәняӆ нємасыя па мўвӑт эвӑӆт касӑӆты вєр поступсы щирн па хон пєлӑк Киргизия мўв эвӑӆт Россия мўвева касӆӑс. Мєт сыры Москва хон воша юхтӑс, щӑӆтаса вәӆты па рәпитты щира Ёмвошев пирийс. Тыв юхтӑс па округ вәнӆтӑты вєр тәты институтн рәпитты питӑс. 

Ӆўв мўӊ редакцияе­ва мойӊа юхтыӆӑс па вәӆупсэӆ оӆӑӊӑн путӑртӑс. Карачач Джумаевна ай кєр тыӆӑщ 12-мит хӑтӆӑн 1968-мит оӆн Киргизской АССР Чуйской область Ке­минской район Ильич кәртӑн сєма питӑс. Ӆўв лу­пӑс, Карачач нємӆ киргиз ясӑӊ эвӑӆт тулмащтӑты ки, щит «питы әпӑт». Йина па тӑм ими питы әпӑт тӑйӆ.
1985-мит оӆн Карачач ӑшкола етшуптӑс па Фрун­зе вошн Бишкекской гуманитарной университет «рўщ ясӑӊ па литература» факультетн вәнӆтыйӆты питӑс. Ӛхӑт нєпекӑӊ айӆат нє ӑшко­лайн няврємӑт рўщ ясӑӊа па литературая вәнӆтӑс. 2005-мит оӆн Киргизия мўв кәщая вәнӆтыйӆты академия хуща вәнӆ­тыӆӑс. Еӆӆы лупӑс:

- Рәт мўвємн ма ӑшко­лайн рәпитсум па арсыр оса рәпатайт тәсум. Щиты «Ось мира Манас» нємпи оса тӑхи пўншмємн ма кӑт вән мўвтєӆ мир мирхот вєрӑнтсум, щив арсыр вән учёнойт юхтыйӆсӑт. 2020-мит оӆн Киргизия мўв президента йиты вўратсум, щирн пирєсты вєрн кӑссум. 2023-мит оӆн депутата йисум па арсыр киргиз мир нўшайт тўӊматты нётсум. Щи пурайн президент хәев С. Жапаров эвӑӆт «Ось мира Манас» научно-кос­мической тӑхи омӑсты пӑ­та яӊ гектар мўв вохсум, тәп российской инвестор ӑн вәйтсы, щирн щи вєр хуӆна ӑн вєрсы. Вет оӆ киргизской учёной ёх пиӆа тӑм вән вєр тўвман рәпитсўв, киргиз мир вә­ӆупсы оӆӑӊӑн кӑт вән ки­ника єсӑӆсўв. Щӑӆта ма Бишкек вошн юхи хӑщум вән мирхот вєрӑнтсум, ма вєрӆам па ёха мӑсӆам, ӆәӆн еӆӆы ат тәсэӆ па нє­масыя поступсы щирн Россия мўва касӑӆсум. 

Тәняӆ Ёмвоша юхӑт­маӆн Карачач Джумаевна имухты округ шуши мир оӆӑӊӑн уша вєрты питӑс. «Торум Маа» музея ӊхӑс, хӑнты мир худож­ник Геннадий Райшев хурӑт вантӑс, шуши мир писателятн хӑншум ки­никайт ӆўӊтӑс па па вєрӑт оӆӑӊӑн уша вєрӑс. Ӆўв щиты лупӆ:

- Мєт сыры вухаӆь мир йис путӑр ӆўӊӑтсум па уша вєрсум, муй щирн тӑм мир тывӑс, муйсӑр Найт-Вәртӑта пойкщӑӆӑт па па әмӑщ вєрӑт оӆӑӊӑн. Юван Шесталовӑн хӑн­шум ӆўӊтарӑт ӆўӊӑтмємн нумса юхӑтсум – муйсӑр вуӆаӊ поэта ӆўв вәс. Ере­мей Айпинӑн хӑншум путрӑт эвӑӆт ищи уша вєр­сум, муй вўрн тӑта, Увӑс мўвн, советской ӆащ вєрум пурайн шуши мира ӆавӑрт вәс. Ма хуӆыева ӆўв путӑрӆаӆ ӆўӊӑтсаӆам.

Щи тумпи Карачач Джумаевна Ёмвошн ӆэ­щӑтум шуши мир мӑӊ­хӑтӆӑта юхтыйӆ, ӆў­веӆа әмӑщ «Ёмвош ёх» нєӊӑт ариюм арӑт хәӆӑнт­ты, ӆўв мўӊ хущева округ мир творчества хота мойӊа юхтыӆӑс. 
Ёмвошев оӆӑӊӑн щиты путӑртӑӆ:

- Ёмвош – шєӊк хурамӑӊ вош! Хуӆна вошӑӊ мир эвӑӆт оӆӑӊмит губернатор хә Александр Васильевич Филипенко оӆӑӊӑн м яс­ӊӑт хәӆӆум. Вантэ, ӆўв ок­руг кәщая вәӆмаӆ пурайн Ёмвош хурамӑӊа йиты питӑс – арсыр йиӆуп па хурамӑӊ хотӑт омӑсты питсыйт. 
Тӑм вошн ма хӑнты мир поэтесса Мария Вагатова, писатель хә Еремей Айпин пиӆа вәтаӊа йисум. Щи тумпи округ шуши мир вәӆупсы ӆавӑӆман тӑйты па нётты нє Людмила Ал­фёрова, «Ёмвош ёх» ариты тӑхи кәща нє Фаина Иштимирова па па м хуятӑт пиӆа вәй­тантыйӆсум. 
Югра мўв йиӆуп кәща хә Руслан Кухарук пиӆа вәтаӊа йисум. Ма щирємн, ӆўв Югра мўв пӑта иса муй вєрӆ, ӆәӆн округ еӆ­ӆы тащӑӊа па хурамӑӊа ат йис.  

Мосӆ лупты, Карачач Джумаевна 2020-мит оӆ вўш эвӑӆт киникайт хӑншты оӆӊитӑс. Щиты нєпекӑт хӑншты ёх кўтн «Чеховская осень – 2020» литературной кӑсупсыйн кӑсӑс па лауреата йис. 
Интӑм ӆўв ӆӑӊхаӆ, ӆәӆн ӆўв рәт Кыргызстан мўвеӆн Вуӆаӊ Екатерина па Атак батыр, ӆыв Кур­манжан Датка хон имеӆ па рўщ генерал хә М.Д. Ско­белев пӑта кев хурасӑт ат омӑссыйт. Вантэ, тӑм йисн єнмӑӆты айӆат ёха вәты мосӆ, хуты ӆыв ӛрӆаӆ унтасн Кыргызстан мўв тывӑс.   

Путӑр хӑншӑс: 
Людмила Гурьева