Катра йисән кашәӊ мир моњщ-путәр вєрәс, моњщәс. Моњщ путәр унтасән вөӆәпсы ӆавәрт йитән мир вөтща њотәсман вөсәт. Моњщ-путәр унтасән опращӆәв төрәм тывәм оӆәӊән путәртсәт, муй щирән мўв, тўт, вот, пӑӆәӊ тывәӆ, муй пӑта төрәм па хурасәпа йиӆ, муй щирән мўвән хӑннєхө, вой-хўӆ, ӆөӊхәт па вөртәт тывсәт. Щит ӑӆ моњщ хөн, щит йис путәр кєм, төп йємәӊ. Мир щи йисән моњщ-путәра эвәӆсәт. Кашәӊ моњщ-путәр унтасән мўӊ уша вєрӆэв, муй пӑта, муй щирән тӑм-тум утэн тывәс.

Мухәӆайа вөӆты йўх-йєӊкэв, вой-хўӆэв иса йємәӊ вөс. Щит пӑта мўӊ мўвэв-йиӊкэв ӆавәӆман тӑйсэв, йисән войэв-хўӆэв иса мўӊ рөтнайа тӑйсэв. Щиты сөх, вўнш, кўрәӊ вой ищи акийа щи ӆўӊәтсәӆӆәв. Ар өмәщ моњщ-путәр хӑнты мирэв тӑйәӆ. Ма па њаврємәт пӑта щимәщ ӆўӊтар мирєм мөњщәм пос хўват хӑншсәм. Йа, ӆўӊтаӆән, пушхийэт. 

Сөх акэв

Сөх акэв хөнтты йисән
Мӑттэ, єӆпәӆ карты вөс.
Шӑнш ӆўвӆаӆ кэши йўкан,
єӆәӆ ищи карты ӆўв.

Хӑнты мира йуврємәӆ,
Хопәт па са тӑхәӆ,
Хоӆпәт ара мӑншәӆ,
Пуӆәт иса шўкатәӆ.

«Ма мєт йөр», - уркащәӆ.
Йуврәӊ йӑм хөн тӑйәӆ.
Төрәм ащэв партмаӆ:
«Картыӆаӆ хуӆ рывӆәт!».
Щӑӆта сөхэв рома йис, 
Ишәк вєрәӆ хӑйәс,
Урәк вєрәӆ хӑщәс.

Кўрәӊ вой па Мощ хө
Хөӆәнтсэн муй, мирыйєм,
Мӑтта йисән щи вєр вөс:
Кўрәӊ войэн йємәӊ вөс,
Хөт йошапэн кўрәпи, 
Төрәм њопэн пӑсты вөс,
Йуӆта, муӆнєм, йухәтӆы.

Йємәӊ њопэн хўв пӑнт төс,
Пӑнтәӆ кэв вўр пєӆа вөс. 

Ай Мощ хөйэн, йөхӆәӊ вөрт
Хоп йўхи ар вўр хӑйәс,
Йємәӊ войэн йєӊки пӑнт
Хӑншаӊ кэв шӑнш пєӆа вөс.

Ай Мощ хөйән йуӆта төсы,
Нўм кэв оӆӊа Мощ хө йис, 
Тови пойтэк пӑсты кўр
Щи мурт пӑста хөхәӆмаӆ,
Ин њопәӆ щӑта вөйтмаӆ.

Мощ хөйэн войәӆ мўӆәс:
«Па йэӆӆы вөӆты йисән
Њӑӆ йошпи войа ат йиӆ,
Тӑм вөӆты йємәӊ хурэн
Нўм төрәма кӑӆәмәӆ,
Па мирэв щивэӆ ољмәӆ. 

Йӑм йэӊки пӑнтєм оӆӊәӆ
Ӆыв төрәм хуща вантӆэӆ. 

Валентина Соловар