Тӑта мосванăн Ём­вошн вәӆты Конда мўв вухаӆь ими Валенти­на Дмитриевна Гель­манова 50-мит оӆ постӑс, хуты ӆўв ӑш­колайн няврємӑт пиӆа рәпиттыя вєрӆ щи арӑт оӆ ӆувата юхтӑс. 

Тӑм нє сырыя 1975-мит оӆн педу­чи­ли­щайӆ етшуптӑсӆэ па иса щи пурайӆ вўш эвӑӆт ай пухӑт-эвет пиӆа вуӆкємӑӆ. Оӆӑӊӑн 18-мит оӆ вўша юхтум нє кәщаитн оӆӑӊмит класс па хәӆмит классӑт вўшӑт вәнты няврємӑт пиӆа ай ӑшкола хотн рә­питӑс, ищи тӑхеӆн кәща кана вәс.
Ӛхӑт па хәӆмит клас­сӑӊ ӑшкола хота Омс­кой государственной А.М. Горький нємуп педа­гогической институт тӑхи эвӑӆт па хӑннєхуятӑт рә­питты китсыйт.

Щи оӆ пураитн Ва­лентина Дмитриевна йиӆпа юхтум няврємӑт вәнӆтӑты ай ёха вєритты кємн кашӑӊ хӑтӑӆн арсыр нётупсы вєрӑс. Еша вәс щи ӑшкола эвӑӆт ӆўв Омск вош кўтуп ӑшкола хота вәншӑк пухӑт-эвет вәнӆтӑты китсы. Щи кўтуп ӑшколайн ӆўв няврємӑт рўщ ясӑӊа па литературая вәнӆтăты питӑс. Шєӊк сӑмӑӊа па каркама айӆат ёх пиӆа рәпитмаӆ пӑта вән кәщаитн КПСС тӑхия вўсы па коммунист нєӊа йис. 
Еӆӆы Валентина Дмит­риевна педагогической университет етшуптӑс. Щӑӆта аспирантура тӑхийн вәнӆтыӆӑс. Вәнӆтыйӆты пурайн и тӑхийн хән рә­питӑс.

Щиты Германской Де­мократической Рес­пуб­лика хон пєлӑк мўвн няв­рє­мӑт рўщ ясӑӊа па ли­те­ратурая вәнӆтӑс. Ищи оӆӑтн сыр-сыр ӆўӊтупсэт не­мӑщ хә ёха, мӑта хуятӑт рўщ ясӑӊ пиӆа рәпитсӑт, ӆўв вєрӑс.

Германо-советской ӆәх­сӑӊа вәӆты щир па вещ­ката рәпитмаӆ пӑта ӆўв щеӆ вухӑӊ мевӆ посн не­мӑщ кәща ёхн кантсы.

Юхи хӑщум 18-кєм оӆ мӑр Валентина Дмит­риевна Гельмано­ва Ём­вошн вәӆ па кăшăӊ-мәшăӊ пушхăт тăйты ӑшколайн няврємӑт рўщ ясӑӊа па литературая мсыева па вещката вәнӆтӑӆ. 2025-мит оӆн ӆўв 50 оӆ постӑс, хуты ӑшколайн рәпитӆ.

Наталья Скосырева, ЮГУ хущи вәнӆтыйӆты эви
Хӑнты ясӑӊа тулмащтӑс: Владимир Енов