Мӑнум оӆ юхи хӑщум тыӆӑщн Ёмвошн «Ӆыӆӑӊ союм» тӑхийн әмӑщ вәйтантупсы вєрӑнтсы. Щит «И рат хăр ёх» вєр щирн Сўмӑтвош эвӑӆт юхтум Решетниковӑт хоттєӆ ёх пиӆа вәйтантыйӆты щир вәс. Вошӑӊ па мойӊ мир ӑктӑщсӑт, ӆәӆн хәӆӑнтты, хутыса тӑм хоттєӆ хуятӑт вәсӑт, муйсӑр әмӑщ па мосты вєрӑт рәт мўвеӆ пӑта вєрсӑт. 

Оӆӊӑӆн няврємӑт вәнӆтӑты тӑхийн рәпитты нє Ирина Бе­лявская «И рат хӑр ёх» вєр оӆӑӊӑн путӑртӑс. Тӑм вєр ӆыв 2022-мит оӆн оӆӊитсэӆ па интӑм хәӆмит хоттєӆ ёх оӆӑӊӑн айт ӑкӑтсӑт. 
И.В. Белявская Ер­ныховӑт хотӑӊ ёхӆаӆ оӆӑӊӑн путрӑт ӑктӑс. Мєт оӆӑӊӑн ӆўв ӑӊкеӆ рәтӆаӆ оӆӑӊӑн киникайт хӑншӑс, ин па ӆўв еӆӆы тӑм вєр тәӆӆэ. 
Щӑӆта Ольга Норова Анямовӑт вухаӆь рәт ёх­ӆаӆ оӆӑӊӑн путӑр тәс. Ӆўв рәтӆаӆ Увӑс Кев хущи вәӆӆӑт. Щатьщащеӆ – Илья Васильевич Анямов вўӆы тӑйты хәя па вой веӆпӑсӆӑты хуята вәс. Аня – щит вухаӆь щирн «оӆӑӊмит» па ищиты «хурамӑӊ».
Тӑм пўш па Решет­ни­ковӑт хоттєӆ ёх оӆӑӊӑн путӑр мӑнӑс. Григорий Петрович Решетников Ёмвошн сєма питӑс па єнмӑс, тӑта ӆўв рәтӆаӆ вәӆӆӑт. Ӆўв па интӑм Сўмӑтвошн семьяйӆ пиӆа вәӆ. Имеӆ Валентина Андреевна Решетникова (Головина) Сўмӑтвош районӑн сєма питӑс па єнмӑс. Ӆўв Ванзетур кәртӑн сєма питӑс, ӑш­кола пийн Ёмвошн ме­дицинской училищайн вәнӆтыӆӑс, акушер тохтура йис. Дмитрий пухӑн па Татьяна эвӑн Ёмвошн вәӆӆӑӊӑн. Евгений пухӑн строителя вәнӆтыӆӑс, ин Сўмӑтвошн вәӆ па рәпитӆ. Тӑм вәйтантупсыйн Ре­шетниковӑт Сўмӑтвош, Хулимсунт кәрт па Ёмвош эвӑӆт вәсӑт. Ин ӆын нивӆ хиӆы па хиӆнє тӑйӆӑӊӑн.
Валентина Андреевна Головинӑт хоттєӆ ёхӆаӆ оӆӑӊӑн путӑртӑс. Ӆўв ащеӆ рўщ хә – Андрей Алексеевич Головин Са­ранпауль кәртӑн сє­ма питӑс. Андрей Алексее­вич ӑшкола пийн Ём­вошн фельдшерско-акушерской ӑшколайн вәнӆтыӆӑс. Щит етшуптум пийн Устрём кәртӑн пәӆьницайн еша рәпитӑс, щӑӆта армияя вўсы. Армия пийн Тўкъякӑӊ кәрта рәпитты китсы, щӑта ӆўв ай тохтура аӆьщӑсы. Ин тӑм вәнты ӆўв щӑта нәмӆы па м ясӑӊӑн ӆўв оӆӊӑӆн путӑртӆы. Ащеӆ хӑнты па вухаӆь ясӑӊӊӑн вәйтӑс па шуши мир пиӆа ма путӑртӑс. Щӑӆта Ванзе­тур кәртӑӊ па Сўмӑтвош пәӆьницайӊӑн хущи тохтура рәпитӑс. Ма ӆўв оӆӊӑӆн атэӆта ӛхӑт путӑр хӑншӆум.
Ӑӊкеӆ Нина Фуатовна, щит хӑтань опращ нєм тӑйс, ӆўв Нина Фёдоров­на щирн аӆьщӑсы. Ӆўв Сў­мӑтвош район Суреи кәртӑн сєма питӑс, ӛхӑт ӆын 1950-мит оӆӑтн, хән колхозӑт ха кӑрӑтсыйт, ӑӊкеӆ Марфа Семёновна Ользина пиӆа Тўкъякӑӊ кәрта касӑӆсӑӊӑн. Нина Фёдоровна аӊкаӊ­кеӆ Прасковья Констан­ти­новна Ользина (Се­бу­рова) шєӊк сӑмӑӊа тӑй­сӑӆэ. Аӊ­каӊкеӆн арсыр мос­ты вє­рӑта вәнӆтӑсы, ӆўв нянь вєрты нєӊа рәпитӑс, мир мӑӆты хошӑс.  
Ӑӊкеӆ Нина Фёдоров­на Поӆнавӑт кәртӑн вәнӆтыӆӑс, агронома йи­ты шєӊк ӆӑӊхас, тәп щи­ты ӑн тывӑс, ӆўв колхосн рәпитӑс. Ӛхӑт заочной щирн Тәпӑӆ вошн культ­просветучилища ет­шуптӑсӆэ па Ванзетур кәртӑн киникайт мӑты хотн библиотекаря вәс. Ӆўв оса рәпата тәс, арсыр мойӆупсэтн па ишӑк нєпекӑтн мойӆыйӆсы, Культура вуӆаӊ рәпатнек, «Ветеран труда» нємӊӑн тӑйс. 
Валентина Андреевна ӛхӑт няврємӆаӆ пиӆа Тўкъякӑӊ па Суреи кәрт­ӊӑна ӊхсӑт, вантсӑт, хута опращӆаӆ вәсӑт, кәртӑӊ мир пиӆа путӑртсӑт, ӑӊкеӆ-ащеӆ па рәтӆаӆ оӆӑӊӑн нәмӑӆмӑсӑт.  

Мосӆ лупты, хуты Ре­шетниковӑт-Головинӑт м тўр сый тӑйты арӑӊ ёх, ӆыв хуӆыева ариты хошӆӑт. Андрей Алек­сее­вич Головин ма ари­ты хошӑс па кўлупн етн­хо­тӑтн арийс. 

Дмитрий Решетников хиӆэӆ «Хӑтӆ» нємпи Ас-угорской театр хущи хәнты юнтӑс, ӆўв ищи тәс тўр сый тӑйӆ. Ин ӑшколайн няврємӑт нарӑсты вєра вәнӆтӑӆ. Тӑм вәйтантупсыйн ӆыв ищи хурамӑӊ арӑт ари­сӑт. Валерия хиӆнєӊӑӆ (Хулимсунт кәрт эвӑӆт) тӑм етнхотн «Вот поезд мчится на восток» ар арийс. Тӑм ар хәнты аӊщащеӆ Андрей Алексеевич арийс, па ӆыв хотӑӊ ёхӆаӆ пиӆа нумӑс вєрсӑт тӑм ар ариты па щи унтасн ай кина вєрты.  
Тӑм вәйтантупсы шєӊк сӑмӑӊ па вещкат вәс, хуӆыева, хуйтат тыв юх­тыйӆсӑт, м нумӑсн юхи мӑнсӑт.  

Путӑр хӑншӑс: Надежда Вах