Тӑта мосванӑн, ван хӑтӆуп тыӆӑщ 16-мит хӑтӑӆн, Ёмвошн «Россия» нємуп Национальной центр тӑхи пўншсы. Щимӑщ тӑхи сырыя Владивосток вошн ӆэщӑтсы, щӑӆта Красноярск вош хуща. Щи киньща па хәӆмит ищи хурасуп арсыр хот йитӑӊ тӑхи мўӊ Югра мўв округев 95-мит оӆа питум мӑӊхӑтӆ пурайн мсыева тӑта ӆэщӑтсы па пўншсы. 

Мєт оӆӑӊӑн «Россия» нємуп тӑхи Ёмвошн вантты па тә­са артаӆӑты Президент хуща ар­сыр поступсы вєрты ӆӑӊкӑр хә А. Жа­рич, округев кәща хә Р. Кухарук па ин йиӆпа пўншум тӑхи кәща нє Н. Виртуозова вәсӑт. Сырыя мойӊ хӑннєхәйт вўӆєӊ хӑн­тэт хуща нюки хотӑта ӊхсӑт, хута кавӑртум сорт хўӆн ӆапӑтсыйт па шайн яньщӆтӑсыйт. 
Щӑӆта кәща ёхӆўв «Россия» Национальной центр хота мӑнсӑт.
Щи тӑхийн ӆыв арсыр хот йитӑт хўват тәтьӆясыйт па сыр-сыр ванӆ­тупсэтн аӆьсыйт. И хот йитн мўв иӆпи тащ кӑншты хӑннєхәйт оӆӑӊӑн пурмӑсӑт па мосты щўӊкӑт вантсӑт. Кимит хот йитн мсыева уша вєрсӑт, муй щирн  хӑннєхуятӑт мўв иӆпи тащӑт нух ӑмӑртсӑт. Хәӆмит хот йитн хӑнтэт, вухаӆят па юрнӑт вәӆупсы щирӑт уша павӑтсӑт. Нӆмит хот йитн «Герои Отечества» ванӆтупсы артаӆӑсӑт па уша вўсӑт, муй щирн Югра мўв хәйт Вуӆаӊ ӆаӆь хӑрӑтн ӆаӆяссӑт. Щӑӆта вантсӑт, хуты ӆаӆь пураитн округ хуща пирщамум хәйт-нєӊӑт па айӆат пухӑт-эвет тар­ма рәпитсӑт. 
Щăӆта Югра мўв па мойӊ хӑннєхуятӑт мєт вән хот йит хуща ӑктӑщсӑт. Ӆыв еӆпеӆн онлайн щирн Россия мўвев Президент администрация тӑхийн рәпитты кәща хә С.В. Кириенко Россия мўвев Пре­зидент В.В. Путин китум айкеӆ тәс. Ӆўв тӑмиты путӑртӑс: 

- Әмӑщ вантты, «Россия» нємуп Национальной центр нын округн хуща тӑмхӑтӆ тўӊщирӑӊа пўншсы. Ма щирємн, щит шєӊк вән вєр. Вантэ, нын хущана иса ар мўв иӆпи тащ ар оӆ мӑр нух ӑмӑртӆы. Щи ун­тасн тӑмхӑтӆ нын Югра мўвн хуща арсыр кәртӑт па вошӑт омӑссыйт, кев па карты ӛшӑт вєрсыйт, йиӆпа вәӆты хотӑт, пәӆьницайт, ӑшколайт, колледжӑт, университетӑт па ар­сыр рўтьщӑты тӑхет ӆэщӑтсыйт. Нын округн тӑм пўш 95-мит оӆ мӑӊхӑтӆ постӑс, нын хущана шу­ши мирӑт, хӑнтэт, вухаӆят па юр­нӑт вәӆупсы щирӆаӆ ин тӑмхӑтӆ вәнты еӆӆы тәӆӑт. Щит нын вєрты вєрӆӑн. Тумтака, тӑӆаӊа тӑм нуви тәрум иӆпийн ищиты еӆӆы вәӆаты! 

Щи ясӊӑт пийн Уральской фе­деральной округ хуща вәӆты Россия мўвев Президент ӆӑӊкӑр хә А. Жога онлайн щирн вўща ясӑӊ Югра мўвев хӑннєхуятӑта китӑс. 
Ӆўв лупӑс:

- Ешӑк Руслан Николаевич па Югра мўв хӑннєхәйт, м вўща ясӑӊ ма нынана китӆум, Ёмвошн «Россия» нємуп Национальной тӑхи пўншсӑты! Нын мєт оӆӑӊӑн Уральской федеральной округ ху­ща щи тӑхи ӆэщӑтсӑты. Щит пӑ­та сыр-сыр культура вєрӑт, вәнӆ­тыйӆты щирӑт, мастер-классӑт муй вәйтантупсэт щимӑщ лӑщкам па вән хотн еӆӆы вәӆты-хоӆты щирӑтн тўӊщирӑӊа па тәса вєрты вєритӆӑты. Мєт вуӆаӊ вєр, ма щирємн, нын Югра мўвн оӆӑӊӑн арсыр ванӆтупсэт па Россия мўвӑт кўтн ин аӆьтыя щир тӑйӆӑты!

Округ кәща хә Руслан Кухарук м вўща ясӑӊ ар мир еӆпийн вєрӑс па путӑртӑс:

- Ешӑк хәйт па нєӊӑт, м щи вєр, хуты мўӊ Югра мўвевн тӑмхӑтӆ «Россия» нємуп тӑхи пўншсўв! Щит пӑта ма Президент хәя ищи лупсум, мўӊ шєӊк ӆӑӊхаӆўв тӑта щимӑщ вән хот ӆэщӑтты, хута ӆәӆн ар тӑхи эвӑӆт юхӑтты хӑннєхуятăт ищи ат вєритсӑт Югра мўв оӆӑӊӑн аршӑк вєр ушӑӊа-сащӑӊа вєрты. Тӑта мўӊ мўв иӆпи тащӑт кӑншты хуятӆўв оӆӑӊӑн арсыр айкеӆӑт хәӆӑнтты па вантты щирӑт тӑйӆўв, хӑнтэт, вухаӆят па юрнӑт вәӆты-хоӆты хурасӑт ищиты уша павӑтты вєритӆўв. Щи тумпийн тӑта арсыр ванӆтупсэт, аӆисупсэт, вән мирхотӑт па мӑӊхӑтӆӑт ищиты кашӑӊ пўш тўӊщирӑӊа ӆэщӑтты питӆўв. Шєӊк ӆӑӊхаӆум пәмащипа ясӑӊ лупты тӑм ар йитпи хотӑӊ тӑхев омсум хуятӑта! Мўӊ хуӆыева иха тӑм тӑхи омӑсты пӑта вещката рә­питсўв. Щит пӑта еӆӆы ма, тумта­ка вәӆаты!

Р. Кухарук щи тӑхи кәща нєӊа Н. Виртуозовая «За укрепление дружбы и сотрудничества» мевӆ пос мойӆӑс.
«Россия» нємуп тӑхи пўншты пийн, арсыр мосты ванӆтупсэт, мӑӊхӑтӆӑт, кӑсупсэт, еӆӆы ӆэщӑт­ты питӆыйт. 
Путӑр хӑншӑс: 
Владимир Енов