Ёмвошн ван хăтӆуп тыӆӑщн 9-мит хӑтӑӆн йис пурмӑсӑт шави­ты «Торум Маа» музей хущи «История Юва­на Бороды» ванӆ­тупсы вәс. Щит ву­хаӆь ики Иван Ильич Куриков оӆӑӊӑн ӆэ­щӑтса.

Сыр-сыр хурӑт, пур­мӑсӑт па йис ки­никайт тӑм ванӆтуп­сы ӆэщӑтты щира «От­ражение» йис пурмӑсӑт шавиты центр тӑхийн рә­питты нєӊӑт тәсӑт. Щи тӑ­хи Талинка вошн Советс­кой район хущи вәӆ. Тӑм пурмӑсӑт Иван Ильич эвеӆн  Анисья Ивановнайн тӑм тӑхия ипўша щира шави­ты мӑсӆэ.

Иван Ильич Куриков Ивдельской район Лямья паульн сєма питӑс. Ӆўв оӆӊӑӆн щимӑщ путӑр вәӆ, мӑтты, Иван Ильич ай пу­райн шєӊк мәша йис, щирн ӑӊкеӆн-ащеӆн пәп ики хущи мӑӆты щира тә­са. Ин мăӊ ики ястумаӆ, мӑтты, няврєм пєрна по­сӑн мосӆ пунты. Щӑӆта щи пийн ин няврєм ёшӆ нух щи пунсӑӆӆэ. Щи пәп ики щемья хущи ӆўв єнмӑс. Киникайт ӆўӊӑтты па хӑншты вәнӆӑс. Иван пух хўӆ, вәнт вой веӆпӑсӆӑты вєрӑта ма вәнӆӑс.

Ӆапӑтхущьяӊ оӆа в­маӆ пурайн Иван Ильич Мария Ивановна Дунаева Атымья пусӑӆн омӑсты Вершина кәрт эӆты имия вўсӆэ. ха мӑнман пийн ӆын Пелым пўсӆ хонӑӊӑн омӑсты Гарёвка кәрта вәӆты щира мӑнсăӊӑн. Щӑта вән хот омӑссӑӊӑн па хәт няврєм тӑйсӑӊӑн. Марья имеӆ, ястӑӆӑт, мӑт­ты айтєӆн пушканӑн веӆ­пӑсӆӑты хо­шӑс. Анисья эвеӆ ищи айтєӆн ӆаӊки веӆпӑсӆӑты хошӑс. 
Юван ики имеӆ пиӆа ар мис, ӆов, ош, щищкўрек тӑйсӑӊӑн. Ӆын ӆапӑт амп тӑйсăӊăн. Дамочка нємпи ампӑн вўӆы ӆавӑӆмаӆ, Вўрты ампӑӆ курӑӊ вой нӛхӆӑс, Паль нємпи ампӑн нюхӑс кӑншӑс, Шамша нємпи ампӑн па ӆаӊки вәйтӑс, Некши нєм тӑюм ампӑн мойпӑр вәйтӑс.

Юван ики тәсыева хо­шӑс саӊквылтапӑт вєрты па ма юнтты. Ӆўв шӑкӆяӊ вўрты тўш тӑймаӆ сайн, щирн Юван Борода нємн пунса. 

Ӆўв вәӆмаӆ хўват вў­ӆы ӆавӑӆман па вәс. Хә­ӆумсот кєм вўӆы тӑймаӆ.  Товийн, хән вўӆэт Кев пєӆы воштӑты пурая йиӆ, мӑнты ӛшӆ хўватн вәӆты мир вўӆэт ӆўв вўӆы тащӑӆа пиӆтӑщӆӑт, па Юван икен Кев пєӆы тащӑӆ воштӑӆӆэ. Щи пурайн вўӆы тащӑӆ щурӑс кєма йиӆ. Кева мӑнтэӆ еӆпийн поры вєр­ӆӑт, ӆәӆн вўӆы тащ ӆўӊӑн тӑйты тӑхет пєӆы тӑӆаӊа ат юхӑтсӑт. Ӆўӊ мӑр Юван ики вўӆэт щӑта тӑйӆӑӆэ па сўсн юхӆы воштӑӆӆэ. 

Пелыма юхтыӆыты Ле­ниград, Москва эӆты учёной мир Юван икен  оӆӑӊӑн щиты ястӑӆӑт: 

- Рўщ ясӑӊӑн ма пу­тӑртты хошӆ, рәт вәнт мўв­ӆаӆ шєӊк ма вәйт­ӆӑӆ­ӆэ. Ӆўв имеӆ па ма рўщ ясӑӊӑн путӑртты, ӆўӊӑтты па хӑншты хошӆ. 

Юван ики имеӆ пиӆа мойӊ ёх тўӊа-щирӑӊа ва­на вўӆӆӑн, ӆапӑтӆӑӆн, ӆын хотӑнӑн ар уӆты нуры тӑй­сӑӊӑн.
Тӑм ванӆтупсыйн Иван Ильич Анисья Ивановна эвеӆ па Елена Николаев­на Степанова хиӆнэӊӑӆ вәсӊӑн. Лена хиӆнєӊӑӆ ястӑӆ: 

 Ма аӊщащєм ма ӑн нәмӆєм, ӆўв ӑнтәма вмаӆ пурайн ма хуӆна ай вәсум. Тәп нәмӆєм, муй щирн хопн ӊхсўв, мӑ­нєм хўӆн ӆапӑтсӑӆӆэ. Ащєм аӊщащєм оӆӑӊӑн мӑнєма ар путӑртыӆӑс. Ащєм рўщ ики вәс, тәп аӊ­щащємн шєӊк сӑмӑӊа тӑйса. Хўӆ веӆпӑсӆӑты, вәнт вой мущатты, вўӆэт ӆавӑӆты пищӑта иса ӆў­веӆ вәнӆтӑсӆэ.

Иван Ильич ӑнтәма в­маӆ пурайн хәтъяӊ оӆа вантыйс. Ӆўв пеӆн Ив­дельской район хущи вў­ӆы тащӑт тӑйты нємӑӆт хуят ӑн хӑщӑс. Ин тӑм йисн Ивдельской районăн тәп 137 маньщи хуят вәӆ.

Путӑр хӑншӑс: 
Наталья Краснопеева