Ай кєр тыӆӑщ тыӆӑщн Касум вош эвӑӆт Андрей Савватеевич па Павла Михайловна Каневӊӑн вән мӑӊхӑтӆ постӑсӊӑн. Ӆын 50 оӆ мӑр ха вәӆӆӑӊӑн, хӑнтэт лупты щирн, 50 оӆ мӑр и мевӑӆн шәшӆӑӊӑн, и шӑншӑн шәшӆӑӊӑн.

Павла Михайловна 1954-мит оӆн вўӆєӊ ёх хотн сєма питӑс. Хетта юханӑн ӑӊкеӆ-ащеӆ пиӆа ай пурайн вўӆы тащн вәсӑт. Ӑӊкеӆ – Анастасия Ивановна, ащеӆ – Михаил Дмитриевич Тользинӊӑн. Ащеӆ па ӑӊкеӆ щӑта ка­сум совхоз бригадайн рә­питсӑӊӑн, няврємӑт єн­мӑӆ­сӑӊӑн – Илья, Мария, Галина, Павла, Иван, Па­вел, Римма. Павла Касум ӑшколайн вәнӆтыӆӑс, щӑӆ­та Елена Тоголмазова пи­ӆа Ӆапӑтнаӊк воша строительной училищая вәнӆтыйӆты мӑнсӑӊӑн, вәнӆтыйӆман, Тюмень во­ша практикая ӊхсӑӊӑн. 

Щи пурайн мўӊ мўвев вошӑт иса ӆэщӑтсыйт, хотӑт омӑсты тӑхетн ар­сыр мирӑт рәпитсӑт. ма вәнӆтыйӆман пӑта Москва хон воша китыйӆсыйӊӑн. Имуӆтыйн Павла юхи юх­тӑс па еӆӆы вәнӆтыйӆты ӑн мӑнӑс, ӑӊкеӆ-ащеӆ пиӆа вәнтӑн вәс.  

1975-мит оӆн ай кєр тыӆӑщн Касум совхозн рәпитты питӑс, 2009-мит оӆн пенсияя мӑнӑс, 34 оӆ мӑр рәпитӑс. 

Андрей Савватеевич Канев Касум вошн сєма питӑс, ӆўв вән сӑран се­мьяйн мєт ай пуха вәс. Николай, Мария, Вла­дис­лав, Петр, Клавдия яй­ӆаӆ па упиӆаӆ вәсӑт. 
Ӑӊкеӆ – Мария Ники­тична Канева, ащеӆ – Савватей Канев. Ӑӊкеӆ-ащеӆ вўӆы ӆавӑӆман рә­питсӑӊӑн. Ӆўв тәп кӑт оӆ ӆу­ват вәс, ӑӊкеӆ ӑнтәма йис. Аӊщащеӆ па аӊкаӊкеӆ пиӆа єнмӑс. 

Андрей Савватеевич ар оӆ бригадайн Касум совхозн вўӆы ӆавӑӆты хәя рәпитӑс. Кашӑӊ оӆ вўӆєң ёх кӑсупсыйн кӑсӑс. Вўӆы ӆавӑӆты вєрӑт па митрайт ма вәӆӆэ. Щи пурайн вән тащн атӆ-хӑтӆ рәпитсӑт.

Андрей па Павла ха мӑнум пийн вўӆы тащн нӆмит бригадайн рәпит­сӑ­ӊӑн, Касум вошн вәсӊӑн. Няврємӑӊа йисӊӑн, Ва­силий па Татьяна няв­рємӊӑн сєма питсӑӊӑн.

Вән пухиеӆ Чечня ху­ща служитӑс. Щи атум ӆаӆь вантум пухӑта юхи юхӑттэӆ пурайн юӆн вә­ӆупсыйн ӆа­вӑрт вәӆты, сӑмӆаӆ кӑшитӆӑт. Василий кӑт няв­рємӊӑӆ ая вәсӊӑн, хән ӑн­тәма йис. 

Татьяна эвиян Касум ӑшколайн вәнӆтыӆӑс, щӑӆта Нуви сӑӊхум вошн колледжа вәнӆтыйӆты мӑнӑс. Таня икия мӑнӑс па хоттєӆ ёхӆаӆ пиӆа Ваньщавӑт кәртӑн вәӆ­ӆӑт. Щӑта икеӆ пиӆа рә­питӆӑӊӑн, хәӆум няв­рє­мие єнмӑӆӆӑӊӑн – Аня, Ми­ша па Вова.

Тӑм вәна вум кӑтӊӑн ин и лотн ӑнт омӑсӆӑӊӑн. Андрей Савватеевич тӑм оӆ 70 оӆа йиӆ, ин вәнты щи вәнта вўӆы ӆавӑӆман ӆўӊӑн па тӑӆн вўӆыӆаӆ хуща ӊхийӆ. Павла Ми­хайловна пуркаит, вейт ёнтӑӆ. Ӆўв ёнтум хурамӑӊ ӆәмӑтсухӆаӆн няврєм­ӆаӆ, икеӆ ӊхӆӑт.

Касум вошн вәӆӆӑӊӑн, ӆын хущана рәтнайӆаӆ, хиӆыӆаӆ юхтыйӆӆӑт. И нумӑсн, и сӑмӑн вәӆты кӑтӊӑн пєӆа вєра әмӑщ вантты. 

Тӑм м хӑннєхәйӊӑн мўӊ ищи м ясӑӊӑн кит­ԯӑӆўв. Йисӑӊа-нәптӑӊа ат вәӆӆӑӊӑн, уяӊа-пищӑӊа ат вәӆӆӑӊӑн. 

Путӑр хӑншӑс: 
Светлана Рандымова