Мӑнум оӆн Югра мўвевн ар вуӆаӊ мӑӊхӑтӆ вәс. Вуӆаӊ ӆаӆьн нух питум хӑтӆ вўш эвӑӆт 80 оӆ постӑсы, округев 95 оӆа йис, Шаимской нефть пўншум хӑтӆ вўш эвӑӆт 65 оӆ мӑнӑс, Самотлорской мўв иӆпи тащ кӑншты тӑхи 60 оӆа йис. Щирн мӑнум оӆ «Йис вєрӑт нәмман тӑйты оӆа» аӆьщӑсы. Щи оӆӑӊӑн округ кәща хә Руслан Кухарук послание ясӑӊ лупты пурайн лупӑс. Щит ван хӑтӆуп тыӆӑщ 23-мит хӑтӆӑн вәс.

Округ кәща ясӑӊӆаӆ щирн, мӑнум оӆн мўӊ мўвевн вошӑт омсум, мўв иӆпи тащ кӑншум па вәйтум па па вуӆаӊ ёх вєрум вєрӑт нәмӑӆмӑсыйт. Щи вєрӑт пєӆы вантман интӑм мўӊ мўвевн вәӆты хӑннєхуятӑт вәнӆтыйӆ­ӆӑт, хутыса тарма рәпитты, кў­тэвн ӆәхсӑӊа вәӆты па еӆӆы шәшты мосӆ.  
Тӑмхӑтӆ Руслан Нико­лаевич лупӑс, муйсӑр мосты вєрӑт тӑм оӆн вєрсыйт па хутыса щи вєрӑт еӆӆы тәты мосӆ. Щи вєрӑт ӆўв нумса пунӑс, хән округ дума депутатӑт па округ мир пиӆа вәй­тантыӆӑс. Ӆўв ар м ясӑӊ лупӑс округевн мўв иӆ­пийн тащ кӑншты хуятӑт оӆӑӊӑн. Ӆыв рәпатаеӆ унтасн мўӊ округев ар­сыр вєрӑтн сыры шәшӆ. Щит «Газпром нефть», «Лукойл», «Роснефть», «Сургутнефтегаз», «Сибур» па па тӑхетн рәпитты ёх.

Щӑӆта округ кәща лупӑс, Тюмень па Ямал мўвӊӑн ёх пиӆа мўӊ ищи тәса кашащман вәӆӆўв па рәпитӆўв. «Иха мўӊ арсыр вєрӑт хоӆумӆўв», – лупӑс округ кәща хә. 
Ӆўв ясӑӊӆаӆ эвӑӆт уша йис, Нягань вошн пӑсанӑт, нурет па па хотӑӊ пурмӑ­сӑт вєрты тӑхи омӑсты оӆӊитсы. Советской вошн политехнической кол­ледж вәна вєрӆы, щӑта аршак няврєм вәнӆтыйӆты питӆӑт. Щивеӆт кашӑӊ оӆ 400-кєм рәпитты хӑннєхә єтӆ. 
Щӑӆта ӆўв лупӑс, ок­ругева аршӑк хӑннєхә рўтьщӑты щира юхӑтты питсӑт. Мӑнум оӆн щи ун­тасн округева 12 мил­лиард арат шойт вух йис. Тӑм ванӑн Ём­вошн «Россия» нємпи национальный центр хот пўншсы, щирн еӆӆы тыв аршӑк хӑннєхә юхӑтты питӆ. 

- Мосӆ иса муй вєрты, ӆәӆн мўӊ мўвевн мир ма рўтьщӑты щир ат тӑйсӑт. Йиӆуп оӆн Ёмвошн кӑт гостиница йиӆпатӆы па пўншӆы – «Югорская долина» па «Югра», – лупӑс Руслан Кухарук.

Ӆўв округевн вәӆты шуши мирӑт оӆӑӊӑн ар м ясӑӊ лупӑс, щит хӑнтэт, вухаӆят па юрнӑт. 

- Мўӊ пӑтэва интӑм ву­ӆаӊ вєр – щит шуши мирӑт йис вєрӑт ӆавӑӆты па еӆӆы тәты, па аршӑк хуятӑт щи вєрӑта вәнӆтӑты. Щи оӆӑӊӑн Россия мў­вев кәщайн постум нє­пекӑтн тәса хӑншман вәӆ – щит «Стратегия государственной нацио­нальной политики», «Основы государственной языковой политики», «Концепция устойчивого развития коренных ма­лочисленных народов Севера, Сибири и Дальне­го Востока». Тӑм нєпекӑт эвӑӆт кӑӆ, щи вєрӑт мўӊева тәса вантман тӑйты мосӆ, – лупӑс Руслан Николаевич. 

Ӆўв вухаӆь ясӑӊ на­циональной корпус вєрты щир оӆӑӊӑн лупӑс, ешавәӆ ищимӑщ рәпата хӑнты ясӑӊ пиӆа вєрӆы. Округ кәща ясӑӊӆаӆ щирн, 2025-мит оӆн шуши ми­рӑт вәӆупсы ӆавӑӆты па нух аӆумты щира 15 нётупсы вєрсы. Щи тумпи мӑнум оӆн шуши мирӑт вәӆупсы нух аӆумты щира уполномоченной хӑннє­хә рәпитты питӑс, щит Людмила Александровна Алфёрова. 
Щӑӆта Р. Кухарук лу­пӑс, интӑм мўӊ мўвев хўваттыйн шуши мир ӆєтутӑт мосман тӑйӆыйт. Югра мўвевн ӆєтутӑт ӆэщӑтты 12 тӑхи «Роска­чества» эвӑӆт «Органик» сертификат нєпекн пос­тӑсы, щирн интӑм ок­ругевн вєрум ӆєтутӑт арсыр мўвӑта ты­ныты щир вәӆ. «Товары земли Югорской» ванӆ­тупсы мӑнум оӆн Ёмвошн па Сәрханӆ вошн вєрӑнтсы, йиӆуп оӆн па вошӑтн ищи вєрӑнтты питӆы.
Округ кәща ясӑӊӆаӆ щирн, мӑнум оӆн «Развитие Арктической зоны в Югре» нємпи поступсы ӆэщӑтсы. Мўӊ округевн Нуви сӑӊхум па Сўмӑтвош районӊӑн Арктической мўвӑта аӆь­щӑӆыйӊӑн, щирн ин щи поступсы хўват щи районӊӑн хуща вәӆты ёх мосты вєрӑтн нётты питӆыйт. Мосӆ лупты, щи районӊӑн хуща 36 ай кәрт вәӆ, щив мӑнты щира кев ӛш ӑнтәм. 2025-мит оӆн щи ай кәртӑта мир тухӆӑӊ хопн тывеӆт-тухеӆт тәты щира 16 маршрут пӑта 700 миллион шойт сухуптӑсы. Щӑӆта Р. Кухарук лупӑс, муйсӑр округ мир пӑта мосты йиӆуп хотӑт омӑсты питӆыйт па па арсыр мосты вєрӑт оӆӑӊӑн. Мєт әмӑщ ӆўв эвӑӆтэӆа уша вєрты вәс, округевн ӛхӑт вет оӆ мӑр сыры оӆӑт киньщи 11,5 щурӑс аршӑка ар няврєм єнмӑӆты семья йис. 

- Няврємӑт єнмӑӆты айӆат ӑӊкета-ащета ма нётты мосӆ. Щирн ма ӆӑӊхаӆум йиӆуп 2026-мит оӆ «Айӆат хоттєӆ ёх оӆа» аӆьщӑты, – лупӑс округ кәща Руслан Кухарук.

Путӑр хӑншӑс: 
Надежда Рагимова